《台語荒漠甘泉（全羅版）》

 | | | 轉寄

"Hiòng tsîng kiâⁿ, koh kiâⁿ, koh kiâⁿ"

作者 陳清俊 翻譯 2007.02.11

listen










Jī ge̍h tsa̍p-it ji̍t

"Kàu kng phó͘-thiⁿ-ē ê Tsú Iâ-hô-hua ê iok-kuī ê tsè-si, in ê kha khiā tī Iok-tàn hô ê tsuí, Iok-tàn hô ê tsuí ... beh tsia̍t-tn̄g," (Iok-su-a 3:13)

Í-sik-lia̍t lâng bô thîng tī iâⁿ-pâng, tán kàu Iok-tàn hô ê tsuí tn̄g, tsiah tshut-huat. In pîng sìn-sim hiòng tsîng kiâⁿ. (I Ko-lîm-to 5:7) In thiah tiùⁿ-pâng, khuán pau-ho̍k-á, pâi tuī-ngó͘, bô tán tsuí ta, tsiū kiâⁿ ji̍p hô ni̍h.

Ká-sú in kiâⁿ kàu hô piⁿ, thîng lo̍h-lâi, tán hô-tsuí tn̄g tsiah beh ji̍p hô, tsiū tán mā bô tshái-kang. Tāi-tsì buē sîng. In-uī Thiⁿ-pē só͘ kóng ê sī "tsiong kha ta̍h ji̍p tsuí, tsuí tsiah beh tuān-tsua̍t."

Lán ha̍k-si̍p I ê uē, tsiàu I ê uē hiòng-tsîng ti̍t-ti̍t kiâⁿ, sīm-tsì tsîng-bīn khuàⁿ bô lō͘ lah. Uī-hô lán tú-tio̍h khùn-lân ê sî, uē thîng lo̍h-lâi, tsiū-sī ài tán lâng tsiong khùn-lân, tsó͘-gāi tû-khì. Lán liân tshì beh kiâⁿ-kè tsó͘-gāi, kái-kuat khùn-lân, iā lóng bô.

Kî-si̍t, pîng sìn-sim hiòng-tsîng kiâⁿ, lō͘ tsū-jiân uē uī lán lâi khui. Tān-sī lán tú-tio̍h tsó͘-gāi, thîng lo̍h-lâi, teh thìng-hāu lâng suá khui tsó͘-gāi. Si̍t-tsāi, lán ing-kai hiòng tsîng kiâⁿ, ū tsó͘-gāi ná tshin-tshiūⁿ bô tú-tio̍h tsó͘-gāi tsi̍t-iūⁿ. --- tuì "Àm-su" (Evinging Thooghts)

Ko-lûn-pò͘ (Tsristopher Columbus) tī bīn-tuì ki̍k khùn-lân ê sî, uē kian-tīng put-gî, ta̍t-tio̍h lán ê ha̍k-si̍p:

Sái kè A-jó-lí
Bô koh ū Bú-sian tshiⁿ,
Tē, huāⁿ bô khuàⁿ-kìⁿ,
Tsí ū hái liân thiⁿ.
Hù-siú kóng, sī kî-tó ê sî,
Khuàⁿ, liân tshiⁿ iā lóng bô khì
Ióng-kám ê tsûn-tiúⁿ, guá beh kóng sím-mi̍h?
Á-tio̍h mn̄g, kóng, “Hiòng tsîng sái khì, sái-khì, koh sái-khì”.

Ē-kha-tshiú tsi̍t-ji̍t tsi̍t-ji̍t ná huán-khòng,
In ê bīn-sik piàn pháiⁿ, thé-la̍t bô koh ióng-tsòng,
Ióng ê Hù-siú siūⁿ tshù ni̍h ê tāi-tsiòng,
Pha̍k kah o͘-o͘ jiâu-jiâu ê bīn-iông,
Ióng-kám ê tsûn-tiúⁿ, guá beh án-tsuáⁿ kóng,
Kàu thiⁿ kng, iáu sī tsi̍t-phìⁿ hái-iông,
M̄-bián mn̄g, kàu-sî tshut thài-iông,
Hiòng-tsîng sái-khì, sái-khì, sái-khì, siāng hong-hiòng.

Sái koh sái, Hù-siú mn̄g,
Huat-kông ê hái, kin-mî beh pìⁿ-sńg,
Huan tshuì-tûn, àm-tiong teh phah-sǹg,
Khui tuā tshuì, tsi̍t tshuì thun ji̍p tō͘-tn̂g.
Ióng-kám ê tsûn-tiúⁿ, kóng tsi̍t-kù hó uē khǹg,
Ǹg-bāng bô khì, lán beh án-tsuáⁿ tńg?
I ê uē ná kiàm lāi-sih-sih,
Hiòng tsîng sái khì, sái khì, koh sái-khì.

Bīn-sik pe̍h koh ià-siān, i khiā tī kah-pán tíng,
Ǹg o͘-àm khuàⁿ-khì, Ah! o͘-àm-mî ê hân-líng,
Siōng o͘-àm ê mî, khuàⁿ-tio̍h suè-suè kng-ting,
Ū kng, ū kng, ū kng, ū kng-ting.
Ná lâi ná kng, ū tsi̍t tui kng,
Tuà lâi sin sî-tāi ê sū-kng,
I tshē tio̍h sin sè-kài, khai-sí sin sè-kí,
Hō͘ sè-kài tsi̍t-ê kà-sī: "Hiòng-tsîng sái-khì, koh sái-khì."
--- Juaquin Miller

Hiòng tsîng kiâⁿ ê sìn-sim tit sìng-lī.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw