《台語荒漠甘泉（全羅版）》

 | | | 轉寄

"Tshin-kūn Tsú"

作者 陳清俊 翻譯 2009.11.08

listen


Tsa̍p-it ge̍h tshue-pueh (Tsa̍p-it ge̍h pueh ji̍t)

"Iâ-so͘ tuà Pí-tik, Iok-hān, Ngá-kok saⁿ-kap tsiūⁿ suaⁿ kî-tó. Kî-tó ê sî I ê bīn-māu ū koh-iūⁿ, I ê saⁿ pe̍h, koh kng nà-nà. ... Pí-tik kap tâng tī-teh ê lâng ... khuàⁿ-kìⁿ Iâ-so͘ ê îng-kng." (Lō͘-ka 9:28-29,32)

"Guá taⁿ nā tī Lí ê bīn-tsîng tit-tio̍h un-tián, kiû Lí tsiong Lí ê lō͘ tsí-sī guá." (Tshut-ai-ki̍p-kì 33:13)

Iâ-so͘ tshuā saⁿ ê ha̍k-sing tsiūⁿ suaⁿ, hō͘ in kap I ū tshin-bi̍t ê kau-puê, in "khuàⁿ-kìⁿ I ê îng-kng," koh kóng, "Lán tī tsia tsin hó." (Lō͘-ka 9:32-33) Tuì hiah-ê kun-tè Tsú tī suaⁿ-tíng ê lâng, thian-tông íng-uán sī buē tsin hn̄g.

Lán tiong-kan ū sím-mi̍h lâng tī bi̍k-sióng, kî-tó ê sī bô khuàⁿ tio̍h thian-kok ê mn̂g ah? Ū sím-mi̍h lâng kap Siōng-tè tan-to̍k kau-thong ê sî, bô kám-kak tio̍h lāi-sim tuā kik-tōng, tam tio̍h siū tsiok-hok hí-lo̍k ê tsu-bī ah?

Tsú kap I ê ha̍k-sing an-tsīng ê kau-tâm lóng sī tī ti̍k-pia̍t ê sî-kan kap tē-tiám. Ū tsi̍t pái tī Hik-bûn suaⁿ, koh-khah siông sī tī Kaⁿ-ná-suaⁿ. Muí tsi̍t ê ki-tok-tô͘ lóng ing-kai ū i ka-kī ê Kaⁿ-ná-suaⁿ. Kin-á-ji̍t, tuā-to-sò͘ ê lâng, ti̍k-pia̍t tuà tī to͘-tshī ê lâng, sing-ua̍h kín-tiuⁿ, tuì thàu-tsá kàu àm, bô-îng tshih-tshih, tsin tsió ū ki-huē thang bi̍k-sióng, tha̍k-king, kî-tó, sim-lîng kap Tsú ê kau-thong.

Tān-í-lí tuà tī tsông-pài ngó͘-siōng ê Pa-pí-lûn ê suan-nāu tiong ū i pún-sin ê Kaⁿ-ná-suaⁿ tī i ê pâng-king. Pí-tik tī Iok-phàⁿ ū tsi̍t ê thang kî-tó ê tshù-tíng. Lō͘-tik Má-ting (Martin Luther) ū tsi̍t king lâu-tíng tī Ui-tin-bó (Wittenberg) thang lîng-siu, kî-tó; kàu hiān-tsāi, hit só͘-tsāi siū jīm-tīng tsuè sìng-tē, teh hông tsham-kuan.

Tsa̍p-káu sè-kí Ing-kok Kong-lí-huē bo̍k-su Joseph Parker bat kóng, "Ká-sú lán tsuè kàu-huē, bô lîng-sìng ê īⁿ-siōng kìⁿ tio̍h thian-kok, bô siūⁿ khah tuā ê îng-kng kap sìⁿ-miā, lán uē sit-khì lán ê sìn-gióng, án-ni lán ê sìng-tuâⁿ tsí-sī tsit-tè ping-ping líng-líng, khang-khang ê tsio̍h-thâu, tit-buē-tio̍h thiⁿ lâi ê tsiok-hok." Hiān-kim sè-kài só͘ su-iàu ê tsiū-sī ū khuàⁿ kè Tsú ê lâng. --- tuì "sit-khì bi̍k-sióng ê gē-su̍t"

Tshin-kūn Tsú! Khó-lîng I kim-ji̍t tuà lí kàu suaⁿ-tíng, tsiū-sī I tuà iông-ī tshut-tshò ê Pí-tik, kap Ngá-kok, Iok-hān, tsiū-sī "luî ê kiáⁿ" (Má-khó 3:17) siông-siông gō͘-kái Tsú kap I sú-bīng, siông-siông khì ê só͘-tsāi. I bô lí-iû m̄ tuà lí khì, só͘-í m̄-thang kū-tsua̍t ka-kī kóng, "Hiah ê Tsú ê kî-biāu īⁿ-siōng kap khé-sī sī uī pa̍t-lâng, m̄-sī uī guá!" Kî-si̍t tsiah ê lóng sī uī-tio̍h lí! --- John Thomas Mcnneill

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com