《台語荒漠甘泉（全羅版）》

 | | | 轉寄

"Kuaiⁿ-mn̂g, khui-mn̂g "

作者 陳清俊 翻譯 2010.01.10

listen


Tsiaⁿ ge̍h tshue-tsa̍p (It ge̍h tsa̍p ji̍t)


"in-uī Sìng Sîn bat kìm in thuân tō-lí tī A-se-a," (Sù-tô͘ hīng-tuān 16:6)


Tse sī tsin tshù-bī ê sū, tsá-kî, Siōng-tè án-tsuáⁿ tài-niá tsá-sî thuân si̍p-jī-kè hok-im ê sù-tsiá. Hong-huat sī kìm-tsí in khì, in siūⁿ beh khì tān-sī put-ing-kai khì ê só͘-tsāi. Pó-lô siūⁿ beh khì A-se-a thuân hok-im, Sìng-lîng kìm-tsí in khì; in koh siūⁿ beh khì Sió A-se-a ê Pì-tshui-nî, I iā kìm-tsí in. Sui-jiân tsuè-āu Pó-lô tī buán-nî, tī A-se-a, só͘ kìm ê siâⁿ-tshī, ū tsuè siōng uí-tāi ê pò͘-tō sū-kang, tān-sī hiān-tsú-sî, Sìng-lîng khiok bô ín-tsún in khì, tsiong mn̂g kuaiⁿ khí-lâi, in-uī sî iáu buē kàu. Tuì Sat-tàn só͘ hông-siú kian-kiông ê só͘-tsāi tsìn-kong, pit-su sing hō͘ A-pho-lô tsuè ki-tsân ê kang-tsok. Tsit-sî Pa̍t ê só͘-tsāi su-iàu Pó-lô kap Pa-na-pa. In iā su-iàu khah tsuē ê tshau-liān, tsiah hū uē khí khah tuā ê tsik-jīm.

Tshin-ài ê pîng-iú, lí nā m̄-tsai beh kiâⁿ ê hong-hiòng, tsiū ing-kai kau hō͘ Sìng-lîng kuat-tīng. I beh kuaiⁿ só͘ ū ê mn̂g, tshun só͘ ing-kai kiâⁿ hit ê mn̂g khui. Lí thang tuì I kóng, “Sìng-lîng ah, guá sìn-jīm Lí tsiong bô ha̍h tī Siōng-tè tsí-ì ê mn̂g kuaiⁿ khí-lâi, hō͘ guá sūn-thàn Lí ê tsí-hui, uē thiaⁿ tio̍h Lí ê siaⁿ kóng, ‘hiòng tsó, hiòng iū’.” (Sin-bīng-kì 5:32)

Tsit-sî, lí ing-kai kè-sio̍k lí ê lō͘-thîng, kian-siú Siōng-tè ê ho͘-tiàu, nā bô Siōng-tè tshing-tshó ê tsí-sī, m̄ thang kái-piàn. Thiⁿ-lō͘ ê lú-kheh ah, Iâ-so͘ ê lîng án-tsuáⁿ tuì-thāi Pó-lô, iā beh án-ni tsí-sī lí. Lán ài sió-sim thiaⁿ suè-suè ê tsí-sī á-sī kíng-kò. Sìn-sim ê kî-tó, nā bô tsó͘-tòng, tsiū hòng-sim khì kiâⁿ. Bô tit kî-kuài, ū-sî lí tú-tú beh ta̍h tshut, mn̂g suah kuaiⁿ khí-lâi, hiòng tsó, hiòng iū ê mn̂g lóng kuaiⁿ khí-lâi, khiok sī beh ín-tshuā lí khì Ti̍k-lô-a tuā-lō͘ ê mn̂g tuā-khui. Tī hia ū tâng-kang Lō͘-ka teh tán lí. Īⁿ-siōng uē tsí-sī tó tsi̍t só͘-tsāi ū ki-huē, ū tiong-sim ê pîng-iú teh tán lí. --- F.B. Meyer



Jîn-sing tú-tio̍h būn-tê ê sî,
Tsiân-tô͘ bû-ti ia̍h sîn-pì,
Siōng-tè hián-bîng hō͘ lí khuàⁿ-kìⁿ,
I ū só-sî.

Lâng khuàⁿ hó sî-kî,
Siōng-tè khiok kuaiⁿ i,
Sìn-jīm thìng-hāu I,
I ū só-sî.

Khiân-sîng kî-tó bô kah-ì,
Á-sī bô huê teh iân-tî,
Siōng-tè tsiām-tsiām hián-bîng I tsí-ì,
I ū só-sî.

Nāi-sim ê Siōng-tè sī tsuân-lîng, tsuân-tì,
Nāi-sim thìng-hāu, I buē iân-tî,
Lí beh kiâⁿ-ji̍p ê mn̂g-sìⁿ,
I ū só-sî.

Thò-tòng an-uì, kam-tiⁿ iū hok-khì,
I ū muí ê mn̂g ê só-sî,
Tī siōng sik-tòng ê sî,
Beh kau hō͘ lí.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com