《台語荒漠甘泉（全羅版）》

 | | | 轉寄

"Sìn tsiū tit-tio̍h"

作者 陳清俊 翻譯 2007.02.18

listen







Jī ge̍h tsa̍p-pueh ji̍t

"Kìⁿ-nā lín só͘ kî-tó lâi kiû ê, tio̍h sìn sī í-king tit-tio̍h, tsiū beh kā lín tsiâⁿ." (Má-khó 11:24)

Tng guá ê suè-hàn kiáⁿ beh tsa̍p-hè ê sî, i ê a-má tap-ìng i tī Sìng-tàn-tsiat ê sî, beh sàng i tsi̍t pún tsi̍p-iû-phō͘ tsuè lé-mi̍h. Tsóng-sī sìng-tàn-tsiat kè-liáu, tsi̍p-iû-phō͘ iáu buē kàu, iā bô tuì a-má hia lâi ê siau-sit. Liáu-āu iā bô lâng thê-khí tsit ê sū. Ū tsi̍t ji̍t, i ê sió-pîng-iú lâi tshù-lāi beh khuàⁿ i tī SSing3-tàn-tsiat ū tit-tio̍h sím-mi̍h lé-mi̍h ê sî, i tsi̍t-kiāⁿ tsi̍t-kiāⁿ lia̍t tshut-lâi, siōng-bé koh ka tsi̍t kù uē, "iáu ū a-má sàng guá ê tsi̍p-iû-phō͘". Guá thiaⁿ-liáu tio̍h tsi̍t kiaⁿ.

Í-āu, tsit ê gín-ná iā án-ni kóng kuí-nā pái. Guá jím-buē-tiâu tsiū kiò i lâi mn̄g, "Jio-jí (George), lí bô siu-tio̍h a-má ê tsi̍p-iû-phō͘, uī-hô lí kóng ū tsi̍p-iû-phō͘ ah?"

I khuàⁿ guá ê bīn tsi̍t-ē, kám-kak guá só͘ mn̄g ê sī ke-ê, tsiū huê-tap kóng, "Lí ài-tsai uī-sím-mih? A-má só͘ kóng ê uē lóng sī sǹg-siàu." I ê sìn-sim bô in-uī guá mn̄g lâi iô-tōng.

Koh kè tsi̍t kò gue̍h, bô koh thê-khí tsi̍p-iû-phō͘ ê sū. Ū tsi̍t-kang, tsi̍t-bīn sī beh tsai i ê sìn-sim juā-tuā, tsi̍t-bīn sī beh tsai tsi̍p-iû-phō͘ sī-m̄-sī í-king siu-tio̍h, guá kóng, "Jio-jí, a-má bô-tiāⁿ-tio̍h buē-kì-tit i tap-ìng lí ê sū."

I tsin kian-tīng huê-tap kóng, "Oh, buē lah, ma-ma, a-má it-tīng bô buē-kì-tit."

Guá khuàⁿ i khó-ài ê bīn, tsi̍t-tiám-á to bô giâu-gî, tsin jīn-tsin ê piáu-tsîng. I iā siūⁿ guá só͘ kóng ê uē iā sī ū tsi̍t-tiám-á tō-lí. Bô-kú, i tsin huaⁿ-hí lâi tuì guá kóng, "Lí khuàⁿ, guá siá phue hō͘ a-má, hó-m̄-hó, to-siā i ê tsi̍p-iû-phō͘?"

Guá kóng, "Lí thang tshì khuàⁿ-māi." Tsit-sî, guá khai-sí o̍h tio̍h ki̍k hong-hù lîng-sìng ê kong-khò.

Bô kuí hun-tsing, phue siá hó, Jio-jí tsi̍t-bīn kho͘ su̍h-á, tuì a-má tsiok ū sìn-sim ê khuán, tsi̍t-bīn kiâⁿ khì iû-kio̍k kià phue. Bô-kú, a-má ê huê-phue lâi lah. Lāi-bīn kóng:

Tshin-ài ê sun-á:
Guá bô buē-kì-tit tap-ìng lí ê tsi̍p-iû-phō͘. Tī guán tsit só͘-tsāi, guá tshē bô lí só͘ ài ê hit-khuán, só͘-í khì Niú-iok (New York) tīng. Bô phah-sǹg Sìng-tàn-tsiat kè-liáu tsiah kià kàu. Phah-khui tsi̍t ē khuàⁿ, pīng bô lí-sióng. Guá tsiū koh khì tīng līng-guā tsi̍t pún. Kàu taⁿ iáu buē siu tio̍h. Guá kuat-tīng kià saⁿ-tsa̍p kho͘ hō͘ lí, lí thang tī lín hia bué só͘ kah-ì ê tsi̍t-pún.
Thiàⁿ lí ê a-má.

Jio-jí tha̍k tio̍h tsit tiuⁿ phue, hit-ê huaⁿ-hí, ná tshin-tshiūⁿ sio-tsiàn phah-iâⁿ ê khuán-sit. Tuì bô tsi̍t-tiám-á giâu-gî ê sim-lîng só͘ kóng-tshut ê uē, "Ma-ma, Guá m̄-sī kā lí kóng, a-má kóng ê uē lóng sǹg-siàu." Jio-jí "tī bô thang ǹg-bāng ê tiong-kan, tuì ǹg-bāng lâi sìn," (Lô-má 4:18). I tshim-sìn tsi̍p-iû-phō͘ it-tīng uē lâi, tsāi i put-tuān siong-sìn ê sî, a-má iā teh tsuè, sî tsi̍t ē kàu, sìn-sim tsiū piàn tsiâⁿ sī ba̍k-tsiu tsîng só͘ khuàⁿ tio̍h ê sū-si̍t, tsin-si̍t.

Lâng ê jio̍k-tiám sī m̄-káⁿ koh m̄ sìn-khò Siōng-tè ê ìng-ún lâi ta̍h tshut thâu tsi̍t pō͘. Tsú Iâ-so͘ tuì To-má kap i í-āu tsuē-tsuē ê huâi-gî-tsiá kóng, "hiah ê bô khuàⁿ-kìⁿ lâi sìn ê lâng, ū hok-khì." (Iok-hān hok-im 20:29) --- Lông-tsū (Roonds) hu-jîn

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw