《台語荒漠甘泉（全羅版）》

 | | | 轉寄

"Íng-ua̍h ê Siōng-tè"

作者 陳清俊 翻譯 2010.01.17

listen



Tsiaⁿ ge̍h tsa̍p-tshit (It ge̍h tsa̍p-tshit ji̍t)

"Íng-ua̍h Siōng-tè ê lô͘-po̍k, Tān-í-lí ah, lí ê Siōng-tè, lí só͘ siông-siông ho̍k-sāi-ê, uē kiù lí thuat-lī hiah ê sai mah?" (Tān-í-lí 6:20)

Sìng-king tiong kóng “Íng-ua̍h ê Siōng-tè” tsin tsuē pái, tān-sī lán siông-siông suah hut-lio̍k khì tsit ê sū. Lán tsai-iáⁿ siá “Íng-ua̍h ê Siōng-tè”, tsóng-sī ji̍t-siông sing-ua̍h ê sî, suah bô siūⁿ Siōng-tè sī “íng-ua̍h”, sī “ua̍h-ua̍h”, buē-kì-tit saⁿ, sì tshing nî tsîng ê Siōng-tè, tī kin-á-ji̍t I iáu ū siāng-khuán ê kuân-pìng, siāng-khuán tuì thiàⁿ I, ho̍k-sāi I ê lâng si un-huī. Kuí tshing nî tsîng I só͘ tsuè ê sū, kim-ji̍t I iā uē tsuè tī lán ê sin-tsiūⁿ, in-uī I sī íng-ua̍h bô kái-piàn ê. Tī lán jîn-sing o͘-àm ê sî, lán tio̍h khak-sìn tsit ê sū-si̍t, I tī hiān-kim, tī tsiong-lâi, íng-uán sī “íng-ua̍h ê Siōng-tè.”

Lí kap I tâng kiâⁿ, gióng-bōng I, ǹg-bāng I ê pang-tsān, I lóng buē hō͘ lí sit-bāng. Ū tsi̍t ê sìn Tsú tshiau-kè sì-tsa̍p nî ê lāu sìn-tô͘, tuì guán án-ni kan-tsìng kóng, “Siōng-tè m̄-bat tsi̍t pái hō͘ guá sit-bōng. Tī guá ki̍k khùn-lân, tshì-liān siōng tshim, siōng khùn-khó͘, siōng su-iàu lâng pang-bâng ê sî, I m̄-bat bô tshap guá. In-uī guá khò I ê un-huī sìn-khò I, I íng-uán sī guá ê pang-tsān. Guá lia̍h tshing-siōng I ê miâ tsuè khuài-lo̍k.” --- George Mueller

Lō͘-tik Má-ting (Martin Luther) tī i sìⁿ-miā ki̍k guî-hiám ê sî, tshiat-tshiat ài lia̍h-tio̍h hit ê khuàⁿ-buē tio̍h ê tāi-lîng, ū lâng khuàⁿ i īng tsíng-thâu-á tī toh-tíng siá “I ua̍h-teh! I ua̍h-teh!” Tse sī lán ê ǹg-bāng, iā sī tuì Tsin-lí, tsuân jîn-luī ing-kai ū ê ǹg-bāng. Lâng siⁿ, lâng sí, ing-hiông jîn-bu̍t, kàu-su, tiat-ha̍k-ka, kóng tsi̍t tuā-tui, tsûn-tsāi tsi̍t-sî kú, liáu-āu tsiū bô-khì, tān-sī Siōng-tè sī íng-ua̍h ê, in sí-khì, Siōng-tè iáu tn̂g-tn̂g ua̍h teh. In ê kng tsiò tsi̍t-tsūn, uē siau-bia̍t. In pún sī tuì Siōng-tè ê tsin-kng tit-tio̍h kng, Siōng-tè ê kng íng-uán teh tsiò. --- Alenxander Maclaren

Bí-kok tsok-ka Tshuán-bū(Tsarles Galludet Trumbull) án-ni siá: “Guá tú-tio̍h A-tong phok-sū (Dr. John Dooglas Adam), tuì i o̍h tio̍h, i uí-tāi sio̍k-lîng ê li̍k-liōng, sī tuì i bîng-pi̍k, Iâ-so͘ pún-sin khak-khak si̍t-si̍t, si̍t-si̍t tsāi-tsāi kap i tông-tsāi. I kóng, tsai-iáⁿ Iâ-so͘ tsin-tsin si̍t-si̍t king-siông kap i tông-tsāi, sī i ê li̍k-liōng ê tsuè-tuā lâi-guân. Tsit tsióng ê thé-giām, m̄-sī īng kám-kak, i ê kè-ta̍t, tē-uī, kuan-liām, á-sī i ê thui-lí lâi tsai ‘Iâ-so͘ án-tsuáⁿ kap lâng tông-tsāi’ só͘ ē-thang bîng-pi̍k.”

Koh kóng, “Ki-tok sī i su-sióng ê tiong-sim, put-kuán-sî i tsiū-sī siūⁿ tio̍h Ki-tok pún-sin. Put-kuán-sî, i tan-to̍k ê sî, bô-lūn tī tó-uī, i tuā-siaⁿ ǹg Ki-tok kóng-uē, tshin-tshiūⁿ kap pîng-iú kóng-uē tsi̍t-iūⁿ, tsin khin-sang, tsū-jiân. Tse tsiū-sī i só͘ kóng Iâ-so͘ tsin-tsiàⁿ king-siông kap i tông-tsāi ê thé-giām.”


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com