《台語荒漠甘泉（全羅版）》

 | | | 轉寄

"Hiàn o-ló ê kua-siaⁿ "

作者 陳清俊 翻譯 2010.02.28

listen


Jī ge̍h jī-pueh (Jī ge̍h jī-tsa̍p-pueh ji̍t)

"Só͘-í tio̍h tuì Iâ-so͘ siông-siông īng o-ló tsuè tsè, hiàn hō͘ Siōng-tè;" (Hi-pik-lâi 13:15)

Tī pîn-bîn khut kang-tsok ê thuân-tō-su, kiâⁿ ji̍p khì tsi̍t tòng kong-gū o͘-o͘ àm-àm ê hāng-lō͘, thiaⁿ-tio̍h ū siaⁿ mn̄g kóng, "Sī sím-mi̍h lâng ah?" I īng huan-á-hé tiám-to̍h, ba̍k-tsiu tsîng, khuàⁿ sī sio̍k-sè ê khuat-hua̍t kap khó͘-lān, ū tuà-tio̍h sìng-jîn-tik ê sìn-khò kap an-lîng ê khì-tsit, khuàⁿ-kìⁿ tsi̍t ê muá-bīn jiâu-phè-phè ê bīn-iông, ū tsi̍t tuì kian-tīng, khip-ín lâng ê ba̍k-tsiu, tshin-tshiūⁿ o͘ ê bo̍k-liāu só͘ khik ê hiah ni̍h kim ku̍t koh huat kong-tshái. Tse sī tī jī ge̍h hân-líng ê àm-sî, i tó tī tsi̍t tíng phuà-phuà ê bîn-tshn̂g, bô hé-lô͘, bô sio-khì, iā bô tiān-hé. I bô tsia̍h tsá-tshan, tiong-tàu, kap àm-tǹg. Ná tshin-tshiūⁿ sáⁿ-mi̍h mā bô, tsí-ū hong-sip-pīⁿ kap i tuì Siōng-tè ê sìn-sim. Su-sik ê khuân-kíng lī i tsin hn̄g. Tsóng-sī ē-bīn sī i só͘ tshiùⁿ-tshut ê kua-siaⁿ:

Bô lâng tsai guá ê thòng-khó͘,
Bô lâng tsai, tû-liáu Tsú Iâ-so͘;
Bô lâng tsai guá ê khó͘-tshó͘,
Gîm îng-iāu Ha-lé-lú!

Ū-sî khí, ū-sî lo̍h,
Ū-sî tī thô͘-kha tó,
Ū-sî tshut-siaⁿ o-ló,
Gîm îng-iāu Ha-lé-lú!

Kè-siok 8tshiùⁿ lo̍h-khì, "Bô lâng tsai guá só͘ tsuè ê kang, Bô lâng tsai guá só͘ tú-tio̍h ê kan-lân," lóng suah siōng-bé kù, "Gîm îng-iāu Ha-lé-lú!" ti̍t kàu tsuè-āu tsi̍t tsat sī án-ni:

Bô lâng tsai guá tsin hí-lo̍k,
Bô lâng tsai, tû-liáu Tsú Iâ-so͘!

"Guán huân sū siū huān-lān, nā-sī bô khùn-pik; uî-lân, iā bô sit-bāng; tú-tio̍h khún-tio̍k, iā bô siū pàng-sak; siū phah tó, iā bô sí-bô;" (Ṳ Ko-lîm-to 4:8,9) Tsit ê king-bûn tsiah uē thang suat-bîng tsit uī lāu o͘ hū-jîn ê hí-lo̍k.

Lí kiám tsai Lō͘-tik Má-ting (Martin Luther) beh sí ê sî só͘ thuân ê sìn-sit. "Kim sing ê thòng-khó͘ kap lân-tshù ná tshin-tshiūⁿ ua̍h-jī-pán, lâng khuàⁿ sī tó-páiⁿ pâi ê, khuàⁿ buē tshut i ê ì-sù, lóng bô ì-gī. Tsóng-sī Siōng-tè tsiong lán ê lâi-sè tuì ua̍h-jī-pán ìn tshut-lâi ê sî, khiok piàn tsuè tsin suí ê bûn-tsiuⁿ. Lán iā m̄-bián tán kàu hit sî tsiah uē tsai, tshin-tshiūⁿ sù-tô͘

Pó-lô tī hái-siōng tú-tio̍h guî-hiám, i kiâⁿ kàu kah-pán tíng tuì tsuí-siú kóng, "guá khǹg lín an-sim;" (Sù-tô͘ hīng-tuān 27:22) Pó-lô, Lō͘-tik Má-ting, iā ū tsit ê lāu hū-jîn, lóng tshin-tshiūⁿ jîn-kan ê thài-iông hue, tī tshiong-muá o͘-àm ê sè-kài tiong, uē tshē-kiû pīng khuàⁿ-kìⁿ hit ê tuā-kng, tsiū-sī Ki-tok. --- William C. Garnett

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com