《台語荒漠甘泉（全羅版）》

 | | | 轉寄

"Hûn"

作者 陳清俊 翻譯 2010.03.14

listen

Saⁿ ge̍h tsa̍p-sì (Saⁿ ge̍h tsa̍p-sì ji̍t)


"Mô͘-se tsiū kiâⁿ-kūn ba̍t-hûn, kàu Siōng-tè ê só͘-tsāi." (Tshut-ai-ki̍p-kì 20:21)

Thiⁿ-pē ū I ê pì-bi̍t, tsiū-sī tuì tshong-bîng ū tì-huī ê lâng tsiū bih khí-lâi, ún-ba̍t khí-lâi. (Lō͘-ka 10:21) M̄-bián kiaⁿ hiah ê ún-ba̍t khí-lâi ê mi̍h-kiāⁿ, an-sim tsiap-siū lí só͘ buē liáu-kái ê, nāi-sim thìng-hāu. Sî-kan nā kàu, I uē tsiong tsiah ê lí só͘ m̄-tsai ê pó-tsōng, hiah ê îng-iāu ê ò-biāu, kā lí hián-bîng. Hiah ê ò-biāu tsí-sī jia tī Siōng-tè ê bīn ê bīn-phè.

Bô-tit kiaⁿ tsìn-ji̍p tī hiòng lí lâi ê ba̍t-hûn, in-uī Siōng-tè tī hûn-lāi. Hûn ê līng-guā tsi̍t pîng ū Siōng-tè ê kong-hui tsiò-tshut. "Só͘ thiàⁿ ê hiaⁿ-tī ah, tī lín tiong-kan só͘ ū tshin-tshiūⁿ hé ê tshì-liān, m̄ thang kî-kuài i, ná tshin-tshiūⁿ tú-tio̍h hui-siông ê sū; to̍k-to̍k tio̍h in-uī ū hūn tī Ki-tok ê kan-khó͘, lâi huaⁿ-hí;" (I Pí-tik 4:12,13) Lí kám-kak siū khì-sak, hām-lo̍h tī ko͘-to̍k ê sî, Thiⁿ-pē tsiū tī lí sin piⁿ. I tī siōng o͘-àm ê ba̍t-hûn lāi. Ióng-kám hiòng hiah ê o͘-àm kiâⁿ ji̍p-khì, in-uī Pē Siōng-tè tī hûn ê ìm-ńg ē teh thìng-hāu lí.

Lí ū o͘-hûn bô?
Hûn, am-am ba̍t-ba̍t tsin khióng-pò͘,
Ná lâi, ná tuā koh ná o͘,
Tsuè-āu jia-khàm thiⁿ ê tsuân-pō͘.
Tē-tsiūⁿ piàn kàu o͘-o͘-o͘.
Siōng-tè tuì hûn lāi tshut-lâi.

Lí ū o͘-hûn bô?
Hûn, Iâ-hô-hua tsiàn-tshia hiah tuā,
Tshim-ian tsuè saⁿ lâi mua,
Sih-ná, po̍k-hong tsuè tuà,
Tsuè bīn-phè khàm Iâ-hô-hua ê bīn, bô hông khuàⁿ,
Siōng-tè tuì hûn lāi tshut-lâi.

Lí ū o͘-hûn bô?
Hûn, m̄ káⁿ bīn-tuì ê khó-giām,
Luān siūⁿ thang kiaⁿ ê tsa̍p-liām,
Sit-khì tsì-tshin ê su-liām,
Hu-ké bông-bū ê ò-tiám,
Bông-bông biáu-biáu ê tô-siám,
Sī lí kap ji̍t-kng kan ê kheh-khiàm,
Siōng-tè tuì hûn lāi tshut-lâi.

Lí ū o͘-hûn bô?
Hûn, sī pīⁿ, ló, sí ê huân-ló,
Tng lí tn̄g-khuì, tsiū siau-bô,
Bô-tit kiaⁿ tíng-bīn hiah-nih lô,
Tshut-ji̍p káng-kháu hiah-nih oh,
Sī tshiⁿ-tshìn, hân-líng, sí-bô,
I ê kim-kîⁿ, huat-siā tshut kng-tō.
Siōng-tè tuì hûn lāi tshut-lâi.

Bat ū tsi̍t lâng khiā tī Bí-kok Lo̍k-ki suaⁿ (Rocky moontains) tíng teh khuàⁿ suaⁿ-kha ê tuā po̍k-hong hō͘. Hut-jiân khuàⁿ tio̍h tsi̍t tsiah ing tuì hûn tiong tshìng khí-lâi, ǹg thài-iông ê hong-hiòng pe khì, si̍t-tíng ū tsi̍t-lia̍p tsi̍t-lia̍p ê tsuí-tsu, hō͘ ji̍t-kng tsiò, ná tshin-tshiūⁿ suān-tsio̍h huán-siā kng ê suí. Nā m̄-sī ū po̍k-hong-ú, ing-tsiáu khó-lîng iáu lâu tī suaⁿ-kha. Siāng-khuán, jîn-sing ê khó͘-lān hō͘ lâng tsiūⁿ khí-lâi hiòng Thiⁿ-pē.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com