《台語荒漠甘泉（全羅版）》

 | | | 轉寄

"Kî-tó siū tsó͘-tòng"

作者 陳清俊 翻譯 2010.05.16

listen


Gō͘ ge̍h tsa̍p-la̍k (Gō͘ ge̍h tsa̍p-la̍k ji̍t)


"Tān-í-lí ah, m̄-bián kiaⁿ; in-uī tuì lí thâu-tsi̍t-ji̍t tsuan-sim ài bîng-pi̍k, koh ka-kī khiam-pi tī lí Siōng-tè ê bīn-tsîng ê sî, lí ê uē í-king tit-tio̍h thiaⁿ-kìⁿ; koh guá in-uī lí ê uē tsiah lâi. Nā-sī Pho-su kok ê jîn-kun tsó͘-tòng guá jī-tsa̍p-it ji̍t." (Tān-í-lí 10:12-13)

Tsit tuāⁿ ê king-bûn sī tsin kî-biāu ê kî-tó kà-sī. Kóng tshut Sat-tàn uē ti̍t-tsiap tsó͘-tòng lán ê sing-ua̍h. Tān-í-lí kìm-tsia̍h kî-tó jī-tsa̍p-it ji̍t. Tsiàu sìng-king ê kì-tsài, huat-sing khùn-lân ê guân-in m̄-sī in-uī Tān-í-lí ê bô hó, iā m̄-sī i ê kî-tó bô sik-tòng, sī tshut-tī Sat-tàn ti̍k-pia̍t ê kong-kik.

Tsú í-king phài thiⁿ-sài kā Tān-í-lí kóng, lí tsi̍t khai-sí kî-tó, Siōng-tè tsiū tap-ìng lí ê kî-tó, tsóng-sī tī lō͘-tiong, hó-ê thiⁿ-sài siū pháiⁿ-ê thiⁿ-sài tsó͘-tòng, saⁿ-ián iân-tshiân sî-kan. Tse sī thiⁿ-tíng ê tshiong-thu̍t. Tān-í-lí thòng-khó͘ kî-tó ê sî, i tī tē-tsiūⁿ iā king-giām tio̍h siâng-khuán sìng-tsit ê tsó͘-tòng kap tshiong-thu̍t.

"In-uī lán ê kau-tsiàn m̄ sī tí-ti̍k hiat-khì ê, tsiū-sī tí-ti̍k tsiah ê pān tsìng-sū ê, tsiah ê tsiáng-kuân ê, kap tsit ê àm sè tsiah ê kun-ông, í-ki̍p thiⁿ-tiong pháiⁿ- ê sîn-luī." (Í-hut-só͘ 6:12) Sat-tàn ê kong-kik kap tsing-tsiàn, hō͘ kî-tó iân-tiông saⁿ lé-pài ê sî-kan tsiah tit-tio̍h huê-tap. Tān-í-lí tsha-put-to beh sit-pāi lah, Sat-tàn ài beh kā i thâi sí, tong-jiân, Siōng-tè bô iông-ún sū ê huat-sing sī Tān-í-lí só͘ buē thang jím-siū ê. (tsham-khó I Ko-lîm-to 10:13)

Sìn-tô͘ tsin-tsuē kî-tó siū Sat-tàn ê tsó͘-tòng. Tān-sī lí bián kiaⁿ bô huê-tap ê kî-tó tún kàu tsi̍t tuā tui, bô-kú, tap-hok beh tshin-tshiūⁿ tuā-tsuí kín-kín kàu. Tsit sî, Siōng-tè ê huê-tap m̄-nā kín-kín kàu, I sin ê tsiok-hok iā tàu-tīn kàu. --- tuì tsi̍t phiⁿ káng-tō tsi̍p

Tē-gi̍k tuì Siōng-tè ê sìng-tô͘ siōng ló͘-li̍k teh tsuè kang, ài khiú in ji̍p-khì. Lú ū kè-ta̍t ê lîng-hûn, lú siū khah tuā ê ap-li̍k, khah tuā ê jia̍t, tsóng-sī thiⁿ-tíng ê Tsú buē pàng-sat in. --- William L. Watkinson


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com