《台語荒漠甘泉（全羅版）》

 | | | 轉寄

"Thian-kok ê kua"

作者 陳清俊 翻譯 2010.05.30

listen


Gō͘ ge̍h saⁿ-tsa̍p (Gō͘ ge̍h saⁿ-tsa̍p ji̍t)

"Hit ê si bô lâng uē ha̍k-si̍p, to̍k-to̍k tuì tuē-tsiūⁿ siū bué tshut ê tsa̍p-sì-bān sì-tshing lâng uē nā-tiāⁿ." (Khé-sī-lio̍k 14:3)

Ū tsi̍t kuá kua tsí-ū tī suaⁿ-kok (iu-kok) tsiah o̍h uē hiáu. Bô im-ga̍k ha̍k-hāu uē kà tsiah ê kua, iā bô sím-mi̍h ga̍k-lí uē hō͘ in tshiùⁿ kàu uân-bí. Tse im-ga̍k sī tī ha̍k-si̍p lâng ê sim tiong, iû kò-jîn king-giām lâi kì-tiâu-tiâu ê, sī piáu-hiān tshut in tsá-tsîng ê im-ńg iu-siong, iā sī tshiùⁿ-tshut in í-tsîng ê hiòng-siōng teh pe ê huaⁿ-hí.

Tī tsit ê king-bûn Iok-hān kā lán kóng, liân tī thiⁿ-tíng, iā tsí-ū iû tē-tsiūⁿ kiù-sio̍k lâi ê lâng tsiah uē hiáu tshiùⁿ tshut tsit tiâu kua, sī sìng-lī ê kua, Ki-tok tháu-pàng lán tsū-iû ê khái-suân kua. Tsit ê sìng-lī kap tsū-iû sī tuì kè-khì ê khún-pa̍k siū tháu-pàng ê kì-ik lâi sán-sing ê.

Thiⁿ-sài, liân thiⁿ-sài-tiúⁿ iā buē tshiùⁿ tshut tsit tiâu kua hiah-nih suí. In nā beh tshiùⁿ, in sī su-iàu king-li̍k tio̍h lán só͘ siū ê tshì-liān, tse sī bô khó-lîng. Tsí ū sī pē si̍p-jī-kè ê kiáⁿ-jî tsiah uē o̍h tshiùⁿ tsit siú kua.

Só͘-í, tsin-ài ê pîng-iú, lí tsit-sî tú-tú teh siōng Thiⁿ-pē ê im-ga̍k khò. Tī lí khuàⁿ buē-tio̍h ê si-pan tsiap-siū tshiùⁿ-kua ê hùn-liān. Ha̍p-tshiùⁿ ni̍h, ū ê pō͘-hūn tsí-ū lí uē-hiáu tshiùⁿ, ū ê im sī kē kàu thiⁿ-sài tshiùⁿ buē tshut, ū-ê im sī kuâiⁿ kàu tsí-ū thiⁿ-sài tsiah uē tshiùⁿ. Tān-sī, ài-kì-tit, siōng tshim-tîm ê im sī lí ê, tsí-ū lí uē tshiùⁿ.

Lí ê Thiⁿ-pē tú-teh hùn-liān lí tshiùⁿ thiⁿ-sài só͘ buē hiáu tshiùⁿ ê kua. I ê im-ga̍k ha̍k-īⁿ sī iu-siong ê ha̍k-hāu. Lâng bat kóng I īng pi-siong lâi khó͘-tshó͘ lí, si̍t-tsè tsîng-hîng pīng m̄-sī án-ni, I sī īng thàng-thiàⁿ lâi kàu-io̍k lí, hō͘ lí uē tit-tio̍h iu-siù ê hùn-liān, tsham-ka I thiⁿ-ni̍h ê si-pan.

I tī siōng o͘-àm ê mî-kan pian-siá lí ê kua, I tī iu-kok tiong tiâu-tsíng lí ê im. I tī po̍k-hong ba̍t-hûn tiong tsing-ka lí ê im-thîng, im ê kuâiⁿ-kē, tī tuā-hō͘ tiong hō͘ lí ê siaⁿ koh-khah iu-bí. I tī hân-líng tiong tsō tshut lí im-tiāu ê kám-tsîng. Tng lí tuì hi-bāng la̍k lo̍h kàu kiaⁿ-hiâⁿ tiong lâi hō͘ lí ê kua-sû uân-tsíng, uân-bí.

Ah, tsin-ài ê lîng-hûn ah, m̄-thang khuàⁿ-khin lí ê iu-siong ê ha̍k-hāu, tsit tsióng ê hùn-liān uē hō͘ lí tī thian-kok ê kua tiong tam-jīm lí ti̍k-sû to̍k-it ê pō͘-hūn. --- George Matheson

Sī-m̄-sī puàⁿ-mî uî-khùn lí?
O͘ koh tn̂g ê àm-mî?
Tshiáⁿ Tsú lâi lí sin-piⁿ,
I beh hō͘ lí sin koh suí ê kua-si.
I hō͘ lí, saⁿ-kap tauh jī,
Tng lí tshuán-khuì tshuán buē khí,
I beh suà-tsiap lo̍h-khì,
Kua-siaⁿ ha̍p tsuè tsi̍t-ê, lí kap I.

Tī kng-bîng ê kiáⁿ-jî,
Ū tsin-tsuē kua-tshiⁿ,
Huat-tshut siōng suí ê siaⁿ-im,
Lóng sī ha̍k-si̍p tī puàⁿ-mî,
Tī Thiⁿ-pē ê tshù
Ū tsin tsuē bí-biāu kua-sû,
Tī àm-àm ê pâng-king-tshù,
Tsi̍t-im tsi̍t-im teh liān-si̍p tàu-kù.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com