《台語荒漠甘泉（全羅版）》

 | | | 轉寄

"Kian-tīng ǹg Siōng-tè"

作者 陳清俊 翻譯 2010.07.18

listen

Tshit ge̍h tsa̍p-pueh (Tshit ge̍h tsa̍p-pueh ji̍t)

"In-uī Iâ-hô-hua ê ba̍k-tsiu tī tsuân-tuē khuàⁿ-lâi khuàⁿ-khì; kìⁿ-nā tsuan-sim ǹg I ê, I beh hián-bîng I ê tuā khuì-la̍t pang-tsān i." (Ṳ Li̍k-tāi-tsì-lio̍k 16:9)

Siōng-tè tshē-kiû hiah ê sim kian-tīng ǹg I ê lâm-lú, in tsiong it-tshè sìn-jīm I, I iā jia̍t-tshiat ài in tsuè khah tuā ê tāi-tsì. Li̍k-sú ê sî-tsing í-king tī tsa̍p-it tiám-tsing, tsuè-āu ê sî-tsūn lah.

Tsuân sè-kài teh khuàⁿ Siōng-tè beh tsiong hiah ê kau-thok sìⁿ-miā hō͘ I ê lâng tsuè sím-mi̍h. M̄-nā tsuân sè-kài, liân Siōng-tè pún-sin iā teh tán sím-mi̍h lâng siōng uân-tsuân tsiong ka-kī hiàn hō͘ I, kam-sim pàng-sat it-tshè, hō͘ Ki-tok tsiâⁿ-tsuè it-tshè, uân-tsuân tsiàu Siōng-tè ê tsí-ì kiâⁿ sū, uē tsiap-siū Ki-tok ê khiam-pi, sìn-sim, thiàⁿ-sim kap li̍k-liōng, buē tsó͘-gāi tio̍h Siōng-tè ê kè-uē, íng-uán hō͘ I kè-sio̍k tsuè I kî-biāu ê kang-tsok. --- C.H.P.

Lí nā bô kiû ka-kī ê îng-kng, Siōng-tè thong-kè lí só͘ tsuè ê sū sī bû-hān-liōng ê.

Mí-lá Jio-jí (George Mueller) tī káu-tsa̍p guā hè ê sî, tuì tsi̍t-tīn bo̍k-su kap ki-tok-tô͘ kang-tsok-tsiá kóng, “Guá sī tī 1825 nî 11 ge̍h sìn Tsú, tān-sī kàu 1829 nî 7 ge̍h guá tsiah uân-tsuân tsiong guá ê sim kau-thok I. Kàu hit sî, guá tsiah tsai, guá ài bîng-lī, kuân-sè, kap sè-kan it-tshè hióng-lo̍k ê sim uân-tsuân bô khì, Siōng-tè tsiâⁿ-tsuè guá ê it-tshè. Tī I ê lāi-bīn guá ū it-tshè guá só͘ su-iàu ê, guá bô kî-thaⁿ ê guān-bōng. Khò tio̍h I ê un-tián, guá bîng-pi̍k koh tit-tio̍h I ê tshiong-tsiok, ti̍t kàu hiān-tsāi, hō͘ guá tsiâⁿ-tsuè tsin-tsiàⁿ hīng-hok ê lâng. Guá só͘ kuan-sim ê tsí-sī Siōng-tè ê sū. Tshin-ài ê sìn-tô͘ pîng-iú, guá mn̄g lín sī-m̄-sī tsiong pún-sin uân-tsuân kau-thok Siōng-tè, á-sī, lí ê sìⁿ-miā tiong, bô tshap Siōng-tè tuì lí ê ho͘-tiàu, sī-m̄-sī iáu ū sím-mi̍h mi̍h m̄-khíng pàng, á-sī kau tshut-lâi ê mah?

Tī guá iáu-buē kau-tshut sìⁿ-miā ê í-tsîng, guá khuàⁿ tsin-tsuē kî-thaⁿ ê tsheh, huán-tńg sìng-king khuàⁿ khah tsió. Tān-sī tuì hit tiap khí, I tsià tio̍h sìng-king hō͘ guá bîng-pi̍k I ê tsin-lí, hō͘ guá ū kóng-buē-tshut ê hok-hūn. Guá hiān-tsāi sîng-si̍t tuì lāi-sim kóng tshut lâi, Siōng-tè sī bû-hān kî-biāu ê sîn!”

“Tshiáⁿ lí tiāⁿ-tio̍h kuat-sim, nā bô tuì sim-lîng siōng tshim ê só͘-tsāi kóng tshut, ‘Siōng-tè sī bû-hān kî-biāu ê sîn”, tsiū m̄ pàng suah.”

Guá kin-á-ji̍t ê kî-tó sī kiû Siōng-tè hō͘ guá tsiâⁿ-tsuè tsi̍t-ê ti̍k-pia̍t ê ki-tok-tô͘. --- George Whitefield


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org