《台語荒漠甘泉（全羅版）》

 | | | 轉寄

"Tsú tuì lí ê kè-uē"

作者 陳清俊 翻譯 2010.07.25

listen

Tshit ge̍h jī-gō͘ (Tshit ge̍h jī-tsa̍p-gō͘ ji̍t)


"Guá só͘ tsuè ê, lí hiān-kim m̄ tsai, āu-lâi tsiū uē hiáu-tit." (Iok-hān 13:7)

Tī hiān-sè, lán khuàⁿ Siōng-tè ê tsok-uî, tsí-ū phiàn-bīn, bô uân-tsuân, só͘ kìⁿ tio̍h ê tsí sī tsi̍t pō͘-hūn, á-sī iáu bô tsuân-jiân tián-tshut ê hiān-siōng. Tsóng-sī tng lán khiā tī îng-huâ íng-uán ê sìng-tiān tsîng, lán tsiū uē khuàⁿ tio̍h tsuân-kíng, khuàⁿ tio̍h muí tsi̍t hāng sū án-tsuáⁿ kî-biāu kiat-ha̍p tsuè tsi̍t-thé.

Lán thang sióng-siōng tī Í-sik-lia̍t ông Só͘-lô-bûn ê sî, Lî-pa-lùn ê tsìng suaⁿ, lí thang khuàⁿ tio̍h tsi̍t-phìⁿ tuā-tsâng kuâiⁿ-kuâiⁿ ê hiong-pik-tshiū (pik-hiuⁿ-tshiū). In thang tsin kiau-ngō͘, in-uī bat king-li̍k kè tsin tsuē pái hân-líng pak-hong ê sàu, jua̍h-thiⁿ thài-iông ê pha̍k, àm-mî lō͘-tsuí ê sip. Ū tsiáu-á tsō siū tī in ê ki-ue, ū ià-siān ê lú-kheh kap tshian-suá ê kò͘-iûⁿ lâng hioh tī in ê ìm-iáⁿ ē, lâi siám-bih iām-jia̍t ê ji̍t-thâu, kiông-lia̍t ê po̍k-hong-ú. Siáng tsai, hut-jiân-kan tsiah ê tuā-tsâng ê pik-hiuⁿ-tshiū tī tshò-tshâ lâng ê pó͘-thâu ē, lóng tó lo̍h khì!

Lán khuàⁿ pó͘-thâu tuì pik-hiuⁿ-tshiū phut thâu ē só͘ sán-sing ê siong-hûn, koh tsiong só͘ ū ki-ue lóng-tsóng siah khì, kàu kui tsâng tshiū tuā siaⁿ ai tsi̍t ē tó lo̍h khì tī thô͘-kha. Lán beh khòng-gī tsiah ê tshiū siū tshò, siū tsâu-bia̍t, tuā tsū-jiân siū phuà-huāi piáu-sī hùn-khài. Lán beh tshin-tshiūⁿ sian-ti Sat-ka-lī-a án-ni kóng, "Siông-tshiū ah, lín tio̍h háu, in-uī pik-hiuⁿ-tshiū í-king tó...!" (Sat-ka-lī-a 11:2) Lán ná tshin-tshiūⁿ ài tshiáⁿ khah suè-tsâng ê tshiū piáu-sī tông-tsîng, tshiáⁿ bô ua̍h-miā ê mi̍h iā piáu-sī uàn-hūn tsit tsióng hîng-uî.

Lán bô ing-kai tsiah kín tsiū tshut uàn-giân, sī ing-kai tī "Tshui-lô óng Hō͘-lân" ê kang-lâng tsiong tshiū ūn lo̍h suaⁿ, kap tsiah ê tshiū khì khuàⁿ-māi. King-kè Tē-tiong-hái tsûn ê ūn-sàng, tsuè-āu tī Siōng-tè ê sìng-tiān tiong tsiâⁿ-tsuè kng-kng ku̍t-ku̍t kong-hui ê tuā-niû. Tng lí siūⁿ tio̍h tsit tsâng tshiū ê tsuè-āu ê khì-tshù, khuàⁿ tio̍h i tsiâⁿ-tsuè tsì-sìng-só͘ tsuân-lîng kun-ông ông-bō ê tsi̍t-lia̍p pó-tsio̍h, lí iáu uē tuì sim-tiong kóng tsit ê "Lî-pa-lùn ông-bō ê pó-tsio̍h" tshiū hông tshò lo̍h-lâi, ūn-puaⁿ, khǹg tī tsun-kuì ê só͘-tsāi lâi tshut uàn-giân mah? Tsit ê pik-hiuⁿ-tshiū bat tsong-giâm khiā tī tuā tsū-jiân ê tiān-tn̂g ni̍h, tsóng-sī "Tsit king tiān āu-lâi ê îng-kng, beh iâⁿ-kè tsîng ê îng-kng." (Hap-kai 2:9)

Ū tsin tsuē lâng tshin-tshiūⁿ lāu ê pik-hiuⁿ-tshiū, Siōng-tè tshì-liān ê pó͘-thâu kā in siah kàu kng-kng-kng, lán buē thang bîng-pi̍k uī-hô su-iàu siū tsiah tuā tsiah khùn-khó͘ ê tsîng-kíng, tān-sī Siōng-tè sim-tiong ū ko-siōng ê bo̍k-piau kap bo̍k-tik, tsiū-sī beh hō͘ in khiā tī thiⁿ-nih ê Sik-an suaⁿ tsuè íng-uán ê tuā thiāu kap tuā kông. I tuì in kóng, “Lí beh tī Iâ-hô-hua ê tshiú-tiong tsuè suí ê ông-bō, tī lí ê Siōng-tè ê tshiú-tsiúⁿ tsuè bián-liû.” (Í-sài-a 62:3) --- J.R. Macduff

Bô kiû khì liáu-kái, khì bîng-pi̍k guá ê si̍p-jī-kè,
Khah-hó, tī o͘-àm tiong ū Lí thang mo͘-tio̍h koh kun-tè.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org