《台語荒漠甘泉（全羅版）》

 | | | 轉寄

"Sìn-khò uī guá sí ê Ki-tok"

作者 陳清俊 翻譯 2010.08.01

listen
Pueh ge̍h tshue-it (Pueh ge̍h it ji̍t)

"Sī tio̍h tsiong pún-sin hiàn hō͘ Siōng-tè, tshin-tshiūⁿ tuì sí-lâng tiong lâi ua̍h ê, iā hiàn lín ê pah-thé hō͘ Siōng-tè." (Lô-má 6:13)

Ū tsi̍t àm, guá khì thiaⁿ iú-kuan hiàn-sin ê káng-tō. Káng-tō pīng bô hō͘ guá sím-mi̍h ti̍k-pia̍t ê khé-sī. Put-kò tī bo̍k-su kuī-lo̍h kî-tó ê sî kóng, "Tsú ah, Lí tsai guán uē sìn-khò uī guán lâi sí ê hit ê lâng (Ki-tok)." He tsiū-sī guá ê sìn-sit. Guá khí-sin tńg-khì, tī kue-lō͘ khì tah hé-tshia, tshim-tshim teh siūⁿ hiàn-sin tuì guá sìⁿ-miā ê ì-gī. Guá siūⁿ tio̍h kò-jîn ài hù-tshut tāi-kè sim tsiū kiaⁿ. Tī kue-thâu kau-thong huân-tsa̍p tsháu-nāu siaⁿ tiong, hit ê sìn-sit koh tshut hiān tī guá sim lāi, "Lí uē sìn-khò uī lí lâi sí ê hit ê lâng (Ki-tok)." Guá tsiūⁿ hé-tshia, tī tńg-khì ê tô͘-tiong, siūⁿ kàu hiàn-sin tsit ê sū, hō͘ guá sìⁿ-miā khó-lîng uē tuà lâi ê kái-piàn, hi-sing, kap sit-bāng, guá ê sim iáu-sī tsin kiaⁿ-hiâⁿ.

Kàu tshù, guá ti̍t-tsiap ji̍p guá ê pâng-king, kuī-lo̍h, khuàⁿ guá ê it-sing tī ba̍k-tsîng sàu-kè. Guá sī ki-tok-tô͘, sī tī kàu-huē tam-jīm tsit-bū, sī tsú-ji̍t-o̍h ê hāu-tiúⁿ, tān-sī guá m̄-bat kuat-sim tsiong guá ê sìⁿ-miā hiàn hō͘ Siōng-tè. Guá tsi̍t ē siūⁿ tio̍h guá ka-kī "pó-kuì" kè-uē khó-lîng beh tú-tio̍h khui-sún, guá tshim-tshim thiàⁿ-sioh ê hi-bāng ài kau-tshut, guá ê tsit-gia̍p sū-gia̍p ài hòng-khì, tsiū tsin kiaⁿ.

Guá uân-tsuân bô khuàⁿ tio̍h Siōng-tè uī guá tsuè koh-khah hó ê tsún-pī. Guá ê sim tô-siám I. Jiân-āu tuì sim-lāi huat-tshut tsi̍t ê sìn-sit, "Guá ê kiáⁿ-jî, lí uē sìn-khò uī lí sí ê hit ê lâng mah? Nā-sī lí buē sìn-khò I, á-bô, lí beh sìn-khò sím-mi̍h lâng?" Tsit ê uē tshin-tshiūⁿ sih-nà siā ji̍p tī guá sim, hō͘ guá tshíⁿ-gō͘. Hit ê lâng thiàⁿ guá kàu uī guá lâi sí tsua̍t-tuì thang sìn-khò. I tsuân-jiân kuan-sim I só͘ kiù-sio̍k ê lâng.

Tshin-ài ê pîng-iú, lí thang sìn-khò uī lí lâi sí ê hit ê lâng. Lí sìn-khò I, hō͘ I tsó͘-tsí muí tsi̍t ê ing-kai tsó͘-tsí ê kè-uē, khì uân-sîng I uē tit-tio̍h siōng îng-iāu, tsì-siān ê muí tsi̍t ê kè-uē. Lí thang sìn-jīm I, iû I tshuā lí kiâⁿ tī siōng sik-ha̍p lí ê jîn-sing tō-lō͘. --- J.H.M.

Guá tsuē ki̍k tāng, buē-tit the-sî,
Tsiàu thiⁿ lu̍t-huat, íng-uán tio̍h sí,
Tsai bô huat-tō͘, thang kiù ka-kī,
Iâ-so͘, guá lâi tsiū Lí, tsiū Lí. --- tuì Tâi-gú sìng-si

Guá tsiū-sī guá, Tsú thiàⁿ bû-hān,
Puâⁿ kè it-tshè hi-sing kài-hān,
Taⁿ guá sio̍k Lí, tan-tan sio̍k Lí,
Siōng-tè Iûⁿ-ko, guá lâi tsiū Lí.

Jîn-sing m̄-sī tuì sè-kài só͘ kiù tshut-lâi tshun ê kè-ta̍t, sī beh tsuè tuì sè-kài ê tâu-tsu.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org