《台語荒漠甘泉（全羅版）》

 | | | 轉寄

"Siōng-tè kiáⁿ-jî ê ti̍k-kuân"

作者 陳清俊 翻譯 2010.08.08

listen

Pueh ge̍h tshue-pueh (Pueh ge̍h pueh ji̍t)

"Siōng-tè ah, Lí sī guá ê Ông; kiû Lí tshut-līng, tsín-kiù Ngá-kok." (Si-phian 44:4)

Kiù-tsú í-king tik-sìng, kìⁿ-nā tsó͘-tsí lí un-tián ê sîng-tióng, á-sī hóng-gāi Ki-tok sū-kang ê ti̍k-jîn, I lóng khah iâⁿ lah. Kì-tit “Iâ-hô-hua kā Iok-su-a kóng, M̄-bián uī-tio̍h in lâi kiaⁿ, … Guá īng thâi-sí ê tsìng-lâng kau tī Í-sik-lia̍t ê bīn-tsîng;” (Iok-su-a 11:6) Tī lí tí-khòng ti̍k-jîn ê sî iā kì-tiâu, “tio̍h tí-ti̍k Mô͘-kuí, I tsiū tsáu-siám lín.” (Ngá-kok 4:7) Iā kì-tit Iok-su-a tuì i ê bîn-tsiòng kóng, “Lín bo̍h-tit kiaⁿ, iā bo̍h-tit lún, tio̍h ióng-kám tsòng-táⁿ.” (Iok-su-a 10:25) Tsú kap lín “tuā khuì-la̍t ê ióng-sū” tông-tsāi, lín kiông-tuā ū la̍t, in-uī lín kap siōng kiông-tuā ū-la̍t ê (Siōng-tè) tsuè-hé, só͘-í sìng-lī sio̍k-tī lín!

Tng ti̍k-jîn uá-kūn lí, lí thang khì tit sìng-lī! Tng lí sim-sîn, jio̍k-thé luán-jio̍k ê sî, giâ thâu khuàⁿ tíng-bīn khì the̍h sìng-lī! Pīng-tshiáⁿ Iâ-so͘ í-king tik-sìng, lí khì tit, khì the̍h lí ê pō͘-hūn. I m̄-sī uī tio̍h ka-kī lâi tsiàn, sī uī-tio̍h tsìng-lâng tsiàn. Ài-tsai, lí tī I ê lāi-bīn, tng I tik-sìng, lí khì the̍h lí sìng-lī tiong lí ê pō͘-hūn!

Tsiong Ki-tok ê sìng-lī tòng tsuè lí ê, koh tsiap-siū tsiàn-lī-phín. Bô-lūn uí-tuā ê A-ná lâng (Bîn-sò͘-kì 13:33) á-sī kian-kò͘ ê siâⁿ-tshiûⁿ lóng buē thang phah-tó lí. Lí sī sìng-lī kun-tuī ê tsi̍t uân, ióng-kám tsing-tshú Kiù-tsú sìng-lī tiong lí ê pō͘-hūn. --- tuì F.B.Meyer só͘ tù “Iok-su-a kì”

Lán sī tuā kun-ông Iâ-so͘ ê kiáⁿ-jî, Sím-mi̍h sī hō͘ lán tsì-kuâiⁿ ê Siōng-tè thang tit-tio̍h îng-kng? Sī bô tsing-tshú lán ê kuân-lī, huâi-gî tsiah ê kuâiⁿ-lī sī-m̄-sī sio̍k tī lán ê; á-sī kian-kuat iau-kiû lán thiⁿ-tíng tuā-ka-tîng kiáⁿ-jî ê ti̍k-kuân, iau-kiû kè-sîng ê kuân-lī neh?


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org