《台語荒漠甘泉（全羅版）》

 | | | 轉寄

"Khó͘-lān kap tsín-kiù"

作者 陳清俊 翻譯 2010.08.22

listen
Pueh ge̍h jī-jī (Pueh ge̍h jī-tsa̍p-jī ji̍t)

"Kî-û ê lâng ū-ê īng pang, ū-ê īng tsûn-lāi ê mi̍h. Tuì án-ni tsìng-lâng lóng tit kiù tsiūⁿ suaⁿ (huāⁿ)." (Sù-tô͘ Hîng-tuān 27:44)

Pó-lô khì Lô-má tsē tsûn ê kî-biāu kò͘-sū, tshiong-muá liáu huān-lān kap sìng-lī, tsiàⁿ sī jîn-sing sìn-sim ê lú-hîng, ū kng-bîng, ū o͘-àm ki̍k hó ê lē. Lú-tô͘ tiong siōng uí-tāi, liáu-put-khí ê, sī tī khùn-kíng, guî-hiám ê só͘-tsāi, ū Siōng-tè ti̍k-pia̍t ê kiòng-ìng kap kan-sia̍p tsok-uî.

It-puaⁿ lâng gō͘-huē, lia̍h tsuè tsò tsi̍t ê ki-tok-tô͘, i ê sìn-sim ê lō͘-thîng phiàn-tē tshiong-muá hue ê suí. Si̍t-tsè ê king-giām tú-tú siong-huán. Sìng-king ê sìn-sit sī “Í-king ū tsuè kan-tsìng ê kàu hiah tsuē, tshin-tshiūⁿ hûn uî lán,” (Hi-pik-lâi 12:1) tsiah ê lâng ê it-sing bô m̄-sī tī khó͘-lān kap tik-sìng saⁿ kau-thè, tuì A-pik kàu tsuè-āu tsi̍t-uī sûn-tō-tsiá lóng sī án-ni.

Pó-lô sī tsi̍t ê ki̍k ti̍k-sû ê lē, suat-bîng Siōng-tè ê kiáⁿ-jî siū-khó͘, tsing-sîn khiok buē siū kik-tó, iā buē kái-thé phuà-tshuì lik-lo̍h-khì. I tī Tāi-má-sik siū-tiàu liáu-āu, tsuè kiàn-tsìng, siū pik-hāi tui-kuáⁿ, lâng beh hāi i, uī-tio̍h sìⁿ-miā tsiū ài tô-siám. Tsóng-sī pīng bô thian-kun, thian-tshia, thian-bé tuì thiⁿ kàng lo̍h-lâi tsín-kiù tsit ê sìng-tô͘ thuat-lī ti̍k-jîn ê tshiú. Siōng-tè īng tsin kán-tan koh pîng-siông ê hong-huat hō͘ i thuat-tshut. “nā-sī i ê ha̍k-sing thàu-mî tsiong i īng nâ tuì siâⁿ-tshiûⁿ kā i luī-lo̍h-khì.” (Sù-tô͘ Hîng-tuān 9:25) I sī tshàng tī kū ê saⁿ nâ lāi, tshin-tshiūⁿ tsi̍t-khún saⁿ á-sī hè-mi̍h. Tsú Iâ-so͘ Ki-tok ê po̍k-jîn sī tuì thang-á kháu liu lo̍h-khì kàu siâⁿ-tshiûⁿ guā-kháu, īng kē-kē ê tsu-sè tô-phiah ti̍k-jîn ê uàn-hūn.

Āu-lâi lán iā tsai, Pó-lô ko͘-tuaⁿ siū kuaiⁿ-kaⁿ siū-khó͘ tsuē-tsuē ge̍h-ji̍t, siá kóng,”bô khùn, bô tsia̍h” (Ṳ Ko-lîm-to 6:5), koh jû-hô hō͘ pîng-iú khì-sak, siū piⁿ-phah, sīm-tsì Siōng-tè ìng-ún kái-kiù i í-āu, iáu tú-tio̍h hái-tiong tuā hong-íng ê kan-khó͘, kàu hiám-hiám sí khì, iā put-tik-put pó-hō͘ siūⁿ beh tô-tsáu ê tsuí-siú. Tsuè-āu in tit-tio̍h kái-kiù, mā m̄-sī tuì thiⁿ kàng thian-tsûn lâi kiù, iā m̄-sī thiⁿ-sài kiâⁿ tsuí-bīn lâi kái-kiù, á-sī bīng-līng po̍k-hō͘ kiông-hong tuā-íng tsīng-tsīng ê ti̍k-sû kuân-lîng. Tsí ū īng pîng-huân siōng tsū-jiân ê hong-huat, īng tshâ, īng tsûn ê pang, á-sī tshâ-kho͘, uē phû tī tsuí-bīn, koh iā ū lâng īng siû-tsuí tsiūⁿ huāⁿ.

Tsit ê kò͘-sū, lán thang tsai Siōng-tè uī lán sìⁿ-miā tīng tsi̍t ê bô͘-sik. Tsit ê hó ê sìn-sit sī “tuì sing-ua̍h tī huân-kan phó͘-thong khuân-kíng ē, īng uân-tsuân phó͘-thong ê hong-sik, lâi ìng-hù kok-tsióng phó͘-thong tsîng-hóng ê lâng.”

Siōng-tè ê ìng-ún kap I ê kiòng-ìng bô hō͘ lán tshiau-ua̍t tse si̍t-si̍t tsāi-tsāi ê sè-kài, kap ji̍t-siông ê khó͘-lān. In-uī lán ê sìn-sim beh tuì tsiah ê pîng-siông ê sū lâi tit uân-bí. Siōng-tè iā ài tsit ê sè-kài, tsiong I ê thiàⁿ-thàng ê kim-suàⁿ kap lán ji̍t-siông sing-ua̍h hí-lo̍k kap khó͘-lān tsit tsuè-hé. --- tuì “Sìn-sim oh-kiâⁿ ê tō-lō͘”

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org