《台語荒漠甘泉（全羅版）》

 | | | 轉寄

"Suán-ti̍k"

作者 陳清俊 翻譯 2010.10.17

listen



Tsa̍p ge̍h tsa̍p-tshit (Tsa̍p ge̍h tsa̍p-tshit ji̍t)


"Nā-sī guá tuàn-tuàn m̄ khua-kháu pa̍t hāng, tsí-ū khua-kháu lán ê Tsú Iâ-so͘ Ki-tok ê si̍p-jī-kè nā-tiāⁿ; tuì tsit-ê tsiū sè-kan ǹg guá tìng si̍p-jī-kè, guá ǹg sè-kan iā sī án-ni." (Ka-lia̍p-thài 6:14)

Ū lâng ài to̍k-li̍p sing-ua̍h, in ū lí-sióng, kî-thāi, bōng-sióng, Tsú iā tap-ìng in ê kî-kiû. In kiû hué-kái ê sim, bô sioh tāi-kè, I hō͘ in iu-siong. In kiû sûn-kiat, Tsú hō͘ in thòng-khó͘. In kiû un-jiû ê sim, Tsú hō͘ in ê sim phuà-tshuì, siong-sim. In kiû tuì sè-kan ná sí tsi̍t-pan, Tsú tû-khì in ê sing-ua̍h hi-bāng. In kiû tshin-tshiūⁿ Tsú, Tsú tsiū khǹg in tī hé tiong, "thuàn-liān in tshin-tshiūⁿ kim-gûn" (Má-la̍h-ki 3:3) ti̍t kàu uē huán-siā I ê hîng-siōng. In kiû pang-bâng pē I ê si̍p-jī-kè, tsóng-sī tng I the̍h hō͘ in ê sî, si̍p-jī-kè siong-tio̍h in ê tshiú.

In pīng bô tshiong-hun liáu-kái in ê só͘ kiû, I sī tsiàu in ê uē tap-ìng in tsuân-pō͘ ê tshíng-kiû. In buē khíng-tīng sī-m̄-sī uē hn̄g-hn̄g kun-tè I, á-sī kap I tsiap-kūn lâi tsuè-hé. In kiaⁿ-hiâⁿ, tshin-tshiūⁿ Ngá-kok tī Pik-ti̍k-lī bāng-kìⁿ "ū thui khiā tī tuē nih, thui-tíng tú-thiⁿ," (Tshòng-sè-kì 28:12) á-sī Í-lī-huat "tuì mî sî īⁿ-siōng ê su-siúⁿ" (Iok-pik-kì 4:13) á-sī tshin-tshiūⁿ Iâ-so͘ ê ha̍k-sing hiah-nih kiaⁿ "lia̍h-tsuè só͘ khuàⁿ-kìⁿ ê sī sîn." (Lō͘-ka 24:37) m̄-tsai sī Iâ-so͘. Ha̍k-sing kiaⁿ kah siūⁿ ài kiû I lī-khui in, á-sī tsiong I ê îng-kng tshàng khí-lâi.

In huat-kiàn sūn-ho̍k pí tsia̍h-khó͘ khah khuài, kang-tsok pí hòng-khì khah iông-ī, pē si̍p-jī-kè pí tìng si̍p-jī-kè khah khin-sang. Tsóng-sī in hiān-tsāi í-king buē thang huê-thâu, in-uī in í-king siūⁿ tsiap-kūn in lîng-sìng sing-ua̍h tiong só͘ khuàⁿ-buē tio̍h ê si̍p-jī-kè lah. Si̍p-jī-kè ê bí-tik kap li̍k-liōng í-king tshim-tshim tsìn-ji̍p tī in ê lāi-bīn. Tsú iā si̍t-hiān I tuì in ê ìng-ún "Guá nā siū kú-khí lī-khui tuē, tsiū beh ín-tshuā tsìng-lâng tsiū-kūn guá." (Iok-hān 12:32)

Hiān-tsāi in ê ki-huē lâi lah, í-tsîng sī kan-taⁿ thiaⁿ kóng, taⁿ in si̍t-tsè kám-kak tio̍h lah. I tsiong I thiàⁿ ê ba̍k-tsiu ǹg tī in ê sin-tsiūⁿ, tshin-tshiūⁿ tuì Má-lī-a kap Pí-tik khuàⁿ tsi̍t-iūⁿ, in tsí-ū suán-ti̍k kun-tè I. I si̍p-jī-kè ò-pì ê kng, tsi̍t-tiám-á tsi̍t-tiám-á, put-sî teh tsiò in, in khuàⁿ I tuì tē-tsiūⁿ hông kú-khí, khuàⁿ I sìng koh siān ê siū-khó͘ siū-siong ê khang-tshuì siā tshut îng-kng. In khuàⁿ I, in tsiām-tsiām tsiap-kūn I, piàn-tsuè ū I hîng-siōng ê lâng. Tsú Ki-tok ê miâ tuì in sin-tsiūⁿ tsiò tshut-lâi, in-uī I í-king tuà tī in lāi-bīn. In ê sìⁿ-miā kap thiⁿ-nih ê Tsú tsìn-ji̍p tsi̍t-tsióng bû-giân ê khè-ha̍p. In kam-guān sing-ua̍h tī bô pa̍t-lâng só͘ ū ê mi̍h, hòng-khì in pún-lâi só͘ ū ê mi̍h, in-uī in ài ná tshin-tshiūⁿ Tsú ê khuán.

Tse tsiū-sī tsuē-tsuē sè-tāi í-lâi só͘ ū "tsiah ê lâng sī tè Iûⁿ-ko, bô-lūn tá-lo̍h khì" (Khé-sī-lio̍k 14:4) ê bô͘-sik. Ká-sú in nā tsū-su suán-ti̍k ka-kī, á-sī iû pîng-iú uī in lâi suán-ti̍k, in khó-lîng suán-ti̍k pa̍t-ê. Án-ni in tī tē-tsiūⁿ khó-lîng beh khah hui-hông, tsóng-sī tī thiⁿ-nih tsiū kiám tsin-tsuē kong-hui. In só͘ lâu-lo̍h-lâi ê beh tshin-tshiūⁿ Lô-tik hiah khuat-hua̍t, bô tshin-tshiūⁿ A-pik-la̍h-hán hiah hong-hù. Ká-sú in tī lō͘-tiong thîng-lo̍h-lâi, á-sī Siōng-tè suá-khui I ê tshiú hō͘ in bê-lō͘, in ê sún-sit sī juā-tsiâⁿ tuā ah! In tī koh-ua̍h ê ji̍t iáu ū sím-mi̍h thang sit-khì ah?

Siōng-tè hō͘ in li̍k-liōng, pó-hō͘ in, bô siū siong-hāi. I siông-siông tī tsû-ài tiong hû-tshî in, hō͘ in bô pua̍h-tó. Tī kim-sè, in tsai I ê só͘-tsuè lóng sī uī in hó. In iā tsai tī tē-tsiūⁿ siū-khó͘, beh tī thiⁿ-tíng tsiáng-kuân, tī ē-bīn pē si̍p-jī-kè, beh tī tíng-bīn tì îng-kng ê bián-liû. Koh tsai só͘-tsuè ê, m̄-sī thàn in ê ì-sù, sī Siōng-tè ê tsí-ì tsiah-tio̍h in lâi si̍t-hiān tshut-lâi.



附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org