《台語荒漠甘泉（全羅版）》

 | | | 轉寄

"Bān-sū kau-thok Tsú"

作者 陳清俊 翻譯 2010.11.21

listen


Tsa̍p-it ge̍h jī-it (Tsa̍p-it ge̍h jī-tsa̍p-it ji̍t)

"Tio̍h tsiong lí ê tāi-tsì kau-tài Iâ-hô-hua." (Si-phian 37:5)

Put-kuán lí ū sím-mi̍h sū, jīm-hô ê tāng-tàⁿ lóng kóng hō͘ Siōng-tè thiaⁿ, tsiong kui ê tāi-tsì kau-thok tī I ê tshiú tiong. Án-ni tsuè, lí tsiū buē siū-tio̍h sè-kan ê hun-luān, tshiong-tu̍t, kap khuà-lū. Sū-si̍t-siōng, put-kuán sím-mi̍h sî tsún-pī tsuè sím-mi̍h sū, siū sím-mi̍h khó-giām, á-sī tsuè ji̍t-siông sing-ua̍h khang-khè, lóng-tsóng kóng hō͘ Siōng-tè tsai. Sī, tsiong it-tshè hiòng I kóng-bîng, sīm-tsì tsiong tāng-tàⁿ sià hō͘ I, liáu-āu lí tsiū bô koh uī tsiah ê sū iu-lū kap huân-ló. Tuì taⁿ khí, tsīng-tsīng kang-tsok, jīn-tsin, kín-sīn, liáu-kái lí sī uân-tsuân khò I lâi tsìn-hîng kang-tsok. Tsiong lí ê iu-lū kap lí pún-sin tsuè tsi̍t-hé, ná tāng-tàⁿ kau-thok Siōng-tè. --- R. Leighton

Kim-ji̍t uî-tsō tsi̍t ê sìn-sim ê lî-pa-hn̂g,
Thiàⁿ ê kang-tsok tshiong-muá hit tiong-ng,
Bîng-ji̍t bo̍h-tit khuàⁿ lî-pa guā hn̄g-hn̄g,
Bô-lūn hí-lo̍k á iu-siong, I long uē tam-tng.

Lí beh huat-hiān bô khó-lîng "Tsiong lí ê tāi-tsì kau-tài Iâ-hô-hua", tû-hui lí ê sū ū hû-ha̍p tio̍h I ê tông-ì. Tsí-ū thong-kè sìn-sim lâi tsuè, ká-sú lí ê sim-lāi sīm-tsì ū tsi̍t-tiám-tiám-á ê huâi-gî, sìn-sim tsiū buē huat-sing tsok-iōng. Tsiong tāi-tsì kau-thok Siōng-tè sī liân-suà ê tōng-tsok, m̄-sī ko͘-ko͘ tsi̍t pái tsiū kàu-gia̍h. Put-kuán I ê ín-tshuā sī tsin ì-guā, á-sī tsin ti̍k-pia̍t bô pîng-siông, iā put-kuán I tshuā kàu lī suaⁿ-gâi juā-kūn, íng-uán m̄-thang tsiong ín-tshuā ê soh tuì I ê tshiú tshiúⁿ kè-lâi.

Lí guān-ì tsiong lí it-tshè ê sū lóng kau-thok Siōng-tè, hō͘ I tsuè kuat-tīng mah? Tsi̍t ê ki-tok-tô͘ su-iàu siông-sè kiám-giām i pún-sin ê si̍p-kuàn kap kiàn-kái khuàⁿ-huat, in-uī lán siông-siông hām-lo̍h tī lia̍h-tsuè Siōng-tè it-tīng tông-ì. Án-ni tsiah uē ū tsi̍t-kuá ki-tok-tô͘ uē tio̍h-kip kap kiaⁿ-hiâⁿ. Hián-jiân in bô kau-tài in ê só͘ tsuè hō͘ Tsú, uân-tsuân kau-thok I. In the̍h tāi-tsì kàu I ê bīn-tsîng, tsóng-sī lī-khui ê sî, iā koh tsiong tāi-tsì tuà tò-tńg.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org