《台語荒漠甘泉（全羅版）》

 | | | 轉寄

"Tsá-khí-sî"

作者 陳清俊 翻譯 2010.11.28

listen


Tsa̍p-it ge̍h jī-pueh (Tsa̍p-it ge̍h jī-tsa̍p-pueh ji̍t)

"Ji̍t-tshut, ji̍t-lo̍h ê só͘-tsāi, Lí hō͘ in lóng huaⁿ-hí." (Si-phian 65:8)

Lí bat tsá-tsá khí-lâi, peh tsiūⁿ sió-suaⁿ-niá, khuàⁿ Siōng-tè só͘ tsō ê tsá-khí-sî mah? I tsiong ji̍t-thâu tuì tsuí-pîng-suàⁿ bān-bān sak khí-lâi, khong-tiong ê im-im àm-àm siau-sit, huat-tshut tshian-piàn bān-huà ê sik-tshái, kàu îⁿ-îⁿ ê thài-iông tshut-hiān, siā tshut uân-bí ê kng-suàⁿ. Ji̍t-thâu, á-sī thài-iông, sī ji̍t-sî ê ông, ui-gî se̍h kè thiⁿ, hō͘ tuā-tē kap tshim-kok lóng tshàn-lān kong-hui. Tsit sî lí thang thiaⁿ-tio̍h thiⁿ-tíng si-pan ê kua-siaⁿ, o-ló Siōng-tè ê uí-tāi kap tsá-khí-sî ê hui-hông.

Tī tshing-tsá an-tsīng tiong thiaⁿ kìⁿ tsi̍t ê siaⁿ,
Huaⁿ-hí! Huaⁿ-hí! Guá kui-ji̍t kap lí tâng kiâⁿ.

Khuàⁿ-tio̍h tshing-kiat sûn-tsin tsá-khí-sî ê hiok-kng, hō͘ guá sim khat-bō͘ tsin-lí, tsí ū tsin-lí uē hō͘ guá tshin-tshiūⁿ tsá-khí hiah tshing-thiat sûn-kiat, hō͘ guá ê sìⁿ-miā kap tsiu-uî ê tuā tsū-jiân hô-ha̍p hó-sè. Ji̍t-tshut liâng-hong tshe lâi guá ǹg-bāng Siōng-tè ê sim, I tsiong sìⁿ-miā ua̍h-khì tshe ji̍p guá ê phīⁿ-khang. I ê khì-sik, sim-ì kap lîng tshiong-muá guá, hō͘ guá siūⁿ I só͘ siūⁿ, tshin-tshiūⁿ I ê sing-ua̍h. Guá tī I sìⁿ-miā nih tshē tio̍h guá ê sìⁿ-miā, tsit ê sìⁿ-miā iā tit-tio̍h íng-uán ê îng-iāu.

Nā-sī bô Siōng-tè só͘ tsō ji̍t-sî mî-sî, lán jîn-luī sī juā-tsiâⁿ khó-lîn! --- George MacDonald

Tsá-khí-sî, kng àm ê kau-kài,
O͘-àm tuì tuā-tē tiām-tiām so͘-khai.

Hit-sî kap Iâ-so͘ kam-tiⁿ kau-tâm tī sik-lāi,
Tsi̍t ji̍t ê kang-tsok kiû Tsú tsí-sī kap an-pâi.

Kuâiⁿ-suaⁿ kē-kok I tshuā lō͘,
Hō͘ sua-bô͘ khui-hue, iu-siong ba̍k-sái piàn kam-lō͘.

Lí siūⁿ ài tshù-tshù tik-sìng ê jîn-sing?
Ta̍k-ji̍t thàu-tsá tsiong Siōng-tè pâi tāi-sing.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org