《台語荒漠甘泉（全羅版）》

 | | | 轉寄

"Siú só͘ sìn ê tō"

作者 陳清俊 翻譯 2010.12.12

listen

Tsa̍p-jī ge̍h tsa̍p-jī (Tsa̍p-jī ge̍h tsa̍p-jī ji̍t)


"taⁿ guá ê huih teh tsuè kuàn-tiān, guá kè-sì ê kî kàu lah. Guá í-king tsing-tsiàn hó ê tsing-tsiàn, í-king tsīn pháu-tsáu ê lō͘-tsām, í-king siú só͘ sìn ê tō-lí." (Ṳ Thê-mô͘-thài 4:6-7)

Tshin-tshiūⁿ lāu-ping ài kóng-khí kè-khì tsham-ka ê tsiàn-tsing, kap tio̍h siong ê kò͘-sū, Lán kàu tī thian-tông iā uē tâm-lūn Siōng-tè ê bí-hó kap sìn-si̍t, I tsi̍t lō͘ án-tsuáⁿ tshuā lán king-kè muí tsi̍t ê tshì-liān. Guá bô ài lâng tshīng iûⁿ-ko ê huih sué kàu pe̍h-pe̍h ê saⁿ (Tsham-khó Khé-sī-lio̍k 7:14) án-ni tuì guá kóng "tsiah ê lâng lóng sī king-kè tuā tsai-lān tshut lâi ê, tsí-ū lí m̄-sī."

Lí ài khiā tī hia hō͘ lâng kóng lí sī î-it bô king-li̍k kè iu-huān ê sìng-tô͘ mah? Tong-jiân bô ài! Nā-sī án-ni, lí beh kám-kak ka-kī tshin-tshiūⁿ tī sîn-sìng thuân-khè tiong ê siⁿ-hūn-lâng. Só͘-í guān lán huaⁿ-hí tsham-ú tsing-tsiàn, bô-kú lán beh thâu tì îng-kuan, tshiú giâ tsang-tshiū ki lâi o-ló. --- Tsarles H. Spurgeon

Tng Bí-kok lāi-tsiàn (lâm-pak tsiàn-tsing), tī Siú-bāng-suaⁿ (Lookoot Moontain, in Tennessee) tsiàn-iá tiong, kun-i mn̄g tsi̍t ê sū-ping siong tī tó-uī? Siong-ping huê-tap kóng tī kūn suaⁿ-thâu ê só͘-tsāi. I só͘ siūⁿ ê m̄-sī i sin-thé tio̍h-siong ê só͘-tsāi, kán-ta kì-tit i í-king tsiap-kūn suaⁿ-tíng lah.

Guān lán iā uī Ki-tok tsuè khah tuā ê sū, bô hioh-khùn ti̍t kàu suaⁿ-tíng, tī hia tuā siaⁿ huah kóng, "Guá í-king tsing-tsiàn hó ê tsing-tsiàn, í-king tsīn pháu-tsáu ê lō͘-tsām, í-king siú só͘ sìn ê tō-lí."

Tsuè uân kang, hioh-khùn, lóng bô thîng, kàu hit ji̍t,
In-uī Siōng-tè ê an-hioh hō͘ lí, tsiah sī íng-uán-tit.

Siōng-tè kiám-giām lí ê it-sing, m̄-sī khuàⁿ lí ū juā-tsuē tsióng-tsiong, ha̍k-uī, kap bûn-pîng, tsí-sī khuàⁿ lí sin-tsiūⁿ ū juā-tsuē tsing-tsiàn só͘ lâu ê siong-hûn.
Ū tsi̍t ê tiong-kó͘ sî-tāi ê kua-siú án-ni o-ló i ê ing-hiông:

Tshiú giâ i ê pó-kiàm,
Kiàm-tíng bô tsng-thah, bô ui-giâm,
Tsí-ū kiàm ê khih-kak koh bô tsiam.

Khiân-sîng ê lâng só͘ tui-kiû siōng kuâiⁿ ê îng-iāu sī sū-hōng ê siong-hûn, uī-tio̍h só͘ beh tit pò-siúⁿ ê kuan-bián lâi hi-sing, uī-tio̍h Ki-tok siū lîng-jio̍k, uī-tio̍h Tsú ê sū-kang hi-sing sìⁿ-miā.




附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org