《台語荒漠甘泉（全羅版）》

 | | | 轉寄

"Thian iú put-tshik hong-hûn"

作者 陳清俊 翻譯 2011.01.16

listen
Tsiaⁿ ge̍h tsa̍p-la̍k. (It ge̍h tsa̍p-la̍k ji̍t)

“Pò-thâu hong tuā khí.” (Má-khó 4:37)

Jîn-sing ê hong-thai hut-jiân lîm-kàu lán, tshin-tshiūⁿ tshin-lâng sí-sit ê tá-kik, thòng-khó͘ ê sit-bāng, siōng-sim ê sit-pāi. Ū-sî tsāi-lān sī bān-bān lâi, ná-lâi ná-kiông, kiông kah teh tī sim-thâu, khuì lóng tshuán buē tshut-lâi.

Tsiah-ê hong-thai tsāi-lān sī Siōng-tè īng lâi puê-iúⁿ lán lâi ho̍k-sāi I ê hong-huat. Siōng-tè nā su-iàu tsi̍t-tsâng kiông koh ióng ê tshiūⁿ-tshiū, tsiū uē tsìng tī kông-hong po̍k-ú ê só͘-tsāi, tshiū tī hong-ú tiong ê hùn-tàu, tshiū-sin tsiah uē ióng-tsòng, tsiâⁿ-tsuè siōng-tíng ê bo̍k-tsâi.

Siōng-tè hùn-liān tsi̍t ê lâng tshut-lâi sū-hōng I, iā sī king-kè muá-muá ê hùn-tàu kap kan-khó͘ ê tshau-liān. Tī kông-hong po̍k-ú tá-kik tiong, uē-hiáu kî-tó kóng, “Tsú ah, guá tsuân-sin kui Lí, phah guá, tuî guá, nuá guá, tsài-tsō guá, tsiâⁿ-tsuè Lí uân-tsuân thang īng ê tsâi-liāu.”

Ū tsi̍t-pak tô͘ biô-siá sè-kài kok-tsióng ê thian-tsâi, tuā jîn-but ū gâu-kóng-uē ê ián-suat-ka, ū tiat-ha̍k-ka, ū sûn-tō-tsiá, muí tsi̍t ê lóng sī tī bó͘ tsi̍t hong-bīn hui-siông ê sîng-tsiū, tsit pak tô͘ ê liáu-put-khí ê só͘-tsāi, tsiū-sī muí tsi̍t lâng lóng sī king-kè ki̍k-tuā khó͘-lān ê lâng. Ū buē thang ji̍p-khì só͘ ìng-ún-tē ê Mô͘-se (Moses); ū tshiⁿ-mî ê si-jîn Hô-má (Homer) bong-teh kiâⁿ. Ū tsi̍t-ê sin-tsâi kuân-tuā ê Tsú Iâ-so͘, I ti̍k-pia̍t ê só͘-tsāi, tsiū-sī I ê bīn siū sún-siong pí pa̍t ê lâng lóng khah lī-hāi. Tsit-ê uī-tô͘-ka khó-lîng kā tô͘ hō tsuè “Po̍k-hong-ú”.

Tuā tsū-jiân king-kè hong-tshe hō͘-lâm āu, koh-khah bí-lē, tua suaⁿ ê suí iā sī siū hong-hō͘ ê tì-ìm. Jîn-sing ta̍k-lō͘ ing-hiông jîn-but kiám lóng m̄-sī ū muá-muá hong-lōng, hùn-tàu ê hûn-jiah mah?

Lí it-tīng king-li̍k kè hong-hó͘ ê tá-kik, lí sī-m̄-sī siū-siong, khùn-khó͘ tó lo̍h-khì; á-sī hong-hō͘ tsiong lí thê- sing kàu muá-ū thài-iông ê suaⁿ-tíng, tsiâⁿ-tsuè sìⁿ-miā khah hong-sīng, khah kian-kò͘, sìn-sim khah kian-tīng ê lâng mah? King-kè hong-hō͘ í-āu, sī-m̄-sī koh-khah uē tông-tsîng siū hong-hō͘ tá-kik, siong-jiah muá-sin ê lâng?

Tshiū-thâu khiā ū tsāi, m̄-kiaⁿ tshiū-bé tsuè hong-thai

Siōng-tè só͘ tsai ê tshiū,
M̄-kiaⁿ kông-hong tshē koh giú,
Ǹg tang phuà, ǹg sai khiú,
Tshiū-hio̍h iô-lâi iô-khì hàiⁿ tshian-tshiu.
Siōng-tè só͘ tsai ê tshiū,
Kun ná tshim, ki-hio̍h ná tsiūⁿ,
ki-e ná khuah tshut tī Siōng-tè ê tshiú,
Lóng sī tshiū-á só͘ su-kiû.

Siōng-tè só͘ thiàⁿ ê tshiū-tsai,
Bô sím-mi̍h la̍t uē kā siong-hāi,
Luî kòng, sih-ná tiān, hō͘ tshiâng, hong-thai,
Kè-liáu, iû-guân tsū-tsāi.
Siōng-tè só͘ thiàⁿ ê tshiū-tsai,
Muí pái hong-hō͘ āu, iáu khiā tsāi-tsāi,
Tuì thâu-ji̍t kàu bua̍t sè-kài,
Sî-sî teh tióng-tāi.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org