《台語荒漠甘泉（全羅版）》

 | | | 轉寄

"Iâ-so͘ saⁿ tâng kiâⁿ"

作者 陳清俊 翻譯 2011.01.23

listen

Tsiaⁿ ge̍h jī-saⁿ. (It ge̍h jī-tsa̍p-saⁿ ji̍t)

“Iâ-hô-hua ah, Lí siáⁿ-sū hn̄g-hn̄g teh khiā?.” (Si-phian 10:1)

Siōng-tè khak-si̍t sī lán ê “huān-lān-tiong ki̍p-sî ê pang-tsān.” (Si-phian 46:1) Tān-sī I siông-siông tsi̍t-bīn hí-khó huān-lān tui-pik lán, koh tsi̍t-bīn khiā tī hn̄g-hn̄g khuàⁿ-buē-tio̍h ê só͘-tsāi, bô teh kuan-sim lán ê khuán. Tsóng-sī tng lán siū tshì-liān, khó͘-lān liáu, lán tsiah huat-hiān o͘-àm tiong ê pó-puè, khó͘-lān nih ê tsâi-hù.

Kî-si̍t lán tī huān-lān-tiong, I iā kap lán tī-teh, sī lán ê ba̍k-tsiū bô khuàⁿ-kìⁿ nā-tiāⁿ. I bô lī-khui lán, sī o͘-am hō͘ lán ê ba̍k-tsiū khuàⁿ buē tio̍h Tuā Tsè-si, Tsú Iâ-so͘ ê hîng-thé. Siōng-tè sī sìn-si̍t ê, I sī sî-sî kap lán tông-tsāi; tng lán nā kap I kóng-uē, kî-kiû, tshim-sìn I tī-teh ê sî, lán uē tit-tio̍h I huê-tap ê siaⁿ, tsìng-bîng I bô lī-khui lán. Bô-lūn tī o͘-o͘ àm-àm kiaⁿ-hiâⁿ ê pōng-khang lāi, á-sī kiâⁿ tī kng-bîng ê tuā-lō͘ tiong, lán ê Pē lóng sī uá tī lán sin-piⁿ.

Tsiân-tô͘ bâng-bâng sim kiaⁿ-kiaⁿ?
Lō͘ nih im-hiám buē tshòng siáⁿ?
Tsai guá m̄-sī tan-to̍k kiâⁿ,
Piⁿ-á ū Lí kha-pō͘ siaⁿ.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org