《台語荒漠甘泉（全羅版）》

 | | | 轉寄

"Tsi̍t ki tsháu, Tsi̍t tiám lō͘"

作者 陳清俊 翻譯 2011.01.30

listen


Tsiaⁿ ge̍h saⁿ-tsa̍p. (It ge̍h saⁿ-tsa̍p ji̍t)

“Guá beh tī Í-sik-lia̍t tshin-tshiūⁿ lō͘-tsuí;” (Hô-se-a 14:5)

Lō͘-tsuí sī tiau-khì, sin-sian, hua̍t-phuat. Siōng-tè kàng lō͘-tsuí sī hō͘ tuā tē king-sin, lūn-ti̍k hue-tsháu, ū sìⁿ-miā. Sìng-king tiong iā īng lō͘-tsuí piáu-ta̍t sio̍k-lîng ê uāⁿ-sin. (Thê-to 3:5) kóng, “Sìng-lîng ê uāⁿ-sin” tsiū-sī Sìng-lîng ná lō͘-tsuí kuàn-ak tī lâng ê lîng-sìng ê sing-ua̍h, sim-lîng hok-tò tit khuì-la̍t.

Tsin-tsuē Ki-tok-tô͘ kang-tsok-tsiá bô jīm-sik, koh hut-lio̍k tuì thiⁿ lâi ê kam-lō͘ sī tuì in ê sìⁿ-miā ū siong-tong ê tiōng-iàu-sìng. Suah sit-khì lîng-miā ê king-sin kap li̍k-liōng, tsuè-kang bô la̍t, beh sí beh sí.

Tshin-ài ê hiaⁿ-tī ah, lí kiám bat khuàⁿ-tio̍h tsi̍t-ê lô-tōng-tsiá kui-ji̍t tsoh-sit bô-thîng, lóng bô tsia̍h pn̄g. Lí kiám buē kám-kak tsit-tsióng lâng tsin-gōng mah? Án-ni, Siōng-tè ê kang-lâng bo̍k-iúⁿ iûⁿ-kûn, khiok bô tsia̍h tuì thiⁿ lâi ê má-ná, bí-niû. Lí siūⁿ in kiám ū khuì-la̍t lâi tsuè tsin-hó ê kang mah? Lîng-sìng ê bí-niû m̄-sī kú-kú tsia̍h tsi̍t piàn tsiū ū kàu, sī ài ji̍t-ji̍t tit “kam-lō͘” lîng-sìng ê king-sin.

Sìⁿ-miā tshiong-muá sio̍k-thiⁿ ê lîng-li̍k, ji̍t-ji̍t king-sin, ua̍t-phua̍t ū la̍t; pí-khí ji̍t-ji̍t lîng-miā ko͘-ta, bô la̍t ê sing-ua̍h; sī thiⁿ tsham tē ê tsing-tsha. Ài-tit kam-lō͘, tī mî-sî it-tshè lóng an-tsīng ê sî, tsiah ū kam-lō͘ ê tshut-hiān. Tsháu, tshiū-hio̍h tī mî-sî, i ê mn̂g-kńg khui, tsiap-siū king-sin ê lō͘-tsuí ê kuàn-ak, tiông-sin tit li̍k-liōng. Siâng-khuán, an-tsīng thìng-hāu Tsú, lîng-sìng ê kam-lō͘ tsiah uē lâi-lîm. Ing-kai an-hioh tī I bīn-tsîng. Nā-sī sing-ua̍h lô-lo̍k bô îng, kam-lō͘ sī tit buē tio̍h. Thìng-hāu Siōng-tè, hō͘ I ê tông-tsāi lâi lūn-ti̍k lí, án-ni lí uē tuà Ki-tok king-sin kap khuì-la̍t, kè-sio̍k tsīn lí ê pún-hūn kap tsit-tsik.

Tī ū jia̍t-khì, hong thàu ê sî, kam-lō͘ buē tshut-hiān. Khì-un ài tāi-sing kàng, khong-khì ài líng koh tsīng-tsīng ê sî, hit-ê khuàⁿ-buē-tio̍h ê tsuí-khì tsiah uē kiat-tsuè lō͘-tsuí, lâi lūn-tik tshiū-bo̍k. Lán ê lîng iā tio̍h tī I ê bīn-tsîng uân-tsuân an-tsīng lo̍h-lâi, tsiah uē tit Siōng-tè ê un-tián só͘ tuà-lâi ê an-hioh kap king-sin.

Sù Lí tshing-tsīng ê lō͘-tsuí
Ti̍t-kàu sing-ua̍h tsing-tsat suah-khuì,
Sim-lîng ê tāng-tàⁿ ap-li̍k lóng lī-khui,
Ua̍h teh sūn-sū bô lōng-huì,
Kiàn-tsìng Lí bí-hó, pîng-an kap tsun-kuì.

Tī guá ê tshuán-khuì,
Phīⁿ-tio̍h Lí ê tshing-liâng kap an-uì,
Hō͘ kám-siū bâ-pì, sim-tiāⁿ thîng-khuì,
King-kè tuā-hong, iām-hé, tē li̍h--khui,
Thiaⁿ tio̍h suè-suè ê siaⁿ tuì Lí ê tshuì.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org