《台語荒漠甘泉（全羅版）》

 | | | 轉寄

"Tsuí-tiong king-kè"

作者 陳清俊 翻譯 2011.02.06

listen



Jī ge̍h tshue-la̍k. (Jī ge̍h la̍k ji̍t)

“I tsiong hái piàn-tsuè ta-tuē; in pō͘-kiâⁿ kè-hô; tī-hia guán in-uī I lâi huaⁿ-hí.” (Si-phian 66:6)

“Pō͘-kiâⁿ kè-hô” á-sī “king-kè tsuí tiong” tsit kù uē tsin ū ì-sù. Lâng tī tsuí tiong tû-liáu kiaⁿ-hiâⁿ, tshiong-kông, sit-bāng, kiaⁿ sit-lo̍h sìⁿ-miā; kiám iáu ū sím-mi̍h kî-thāi mah? Tsóng-sī tī-tsia, Í-sik-lia̍t bîn-tsiòng khiok “lâi huaⁿ-hí”.

Juā-tsuē lâng tī tsit tsióng tsîng-hîng uē siūⁿ-tio̍h pún-sin ê tsîng-kíng. Tng lán tī thòng-khó͘, iu-siong ê sî, lán kiám uē tshin-tshiūⁿ Í-sik-lia̍t lâng lâi huaⁿ-hí, lâi tshiùⁿ-kua, thiàu-bú neh?

Khò-tio̍h Thiⁿ-pē ê ìng-ún, I kap lán hô-tíng ê tsiap-kūn. Tsiah ê ìng-ún hō͘ lán thâu-tsîng ê lō͘ tit-tio̍h kng tsiò. Tsóng-sī it-tàn khuân-kíng piàn hó, sing-ua̍h hù-jū āu, lán tsiū bô khuàⁿ-kìⁿ Thiⁿ-pē ê ìng-ún. Tshin-tshiūⁿ tī ji̍t-sî khuàⁿ-buē-tio̍h tshiⁿ-sîn tsi̍t-iūⁿ. Kàu thiⁿ àm, tsiū-sī iu-siong lâi-lîm ê sî, tsìng tshiⁿ-sîn koh tī thiⁿ-nih kng-nà-nà, iā tuà Thiⁿ-pē pó-kuì ê ìng-ún, lâi an-uì lán.

Ngá-kok tī Ngá-phok ê tō͘-thâu só͘ king-li̍k ê: tī àm-sî, ji̍t-thâu lo̍h-suaⁿ, Tsú ê sù-tsiá tshut-hiān, kap i tàu-la̍t, sio-ián. Ngá-kok lâi khah iâⁿ. Tuā tsè-si A-lûn iā sī tī mî-sî, hông-hun ê sî (Tshut-ai-ki̍p-kì 30:8) tsiong huē-bō͘ sìng-só͘ ê ting tiám-to̍h. Ki-tok-tô͘ ê ting iā-sī tī khó͘-lān ê mî-sî tiám khí-lâi, tsit ê sî tsiò tio̍h siōng kng-liāng.

Sù-tô͘ Iok-hān sī tī pī hòng-tio̍k ko͘-tuaⁿ ê sî, kìⁿ-tio̍h Kiù-sio̍k-tsú tī îng-kng tiong hián-hiān. Kin-á-ji̍t, lán tiong-kan ū lâng iā sing-ua̍h tī “Pua̍t-mô͘” ê hái-tó (Iok-hān siū hòng-tio̍k ê só͘-tsāi) nih, iā-ū Thiⁿ-pē kap lán tông-tsāi ê bû-hān kong-hui huê-i̍k nih. Sui sī ko͘-to̍k, iu-siong tiong, iā tit-tio̍h I un-tián, tsû-ài ê tsín-kiù, hō͘ lán thuat-lī jio̍k-thé ê ko͘-tuaⁿ kap khó͘-lān.

Kim-ji̍t iáu kiâⁿ tī sè-kan thòng-khó͘ ê Âng-hái á-sī Iok-tàn hô ê thian-lō͘-kheh. Ū juā-tsuē lâng uē íng-uán kì-tit Thiⁿ-pē uí-tāi jîn-tsû bí-hó ê huê-i̍k, thang kiàn-tsìng kóng, Guán beh “kiâⁿ tī tsuí-nih” ê kiàn-tsìng. Sīm-tsì hiān-kim iáu tī im-im àm-àm ê king-li̍k tiong, hái-íng tī sì-uî hua-hua-háu, ū juā-tsuē lâng uē thîng lo̍h-lâi kóng, guán beh in-uī Lí lâi huaⁿ-hí. (J.R. Macduff)

“Guá iā beh tuì-hia siúⁿ-sù i phû-tô-hn̂g, koh siúⁿ-sù i A-kat ê suaⁿ-kok, tsuè ǹg-bāng ê mn̂g, i beh tī-hia ìn-siaⁿ, kap siàu-liân ê ji̍t bô koh-iūⁿ;” (Hô-se-a 2:15) Piáu-sī Í-sik-lia̍t lâng tong-nî siū-khó͘ ê kok uē huà-tsuè thang tsiok-hok ǹg-bāng ê mn̂g.

Tī tsuí-tiong, o͘-àm iu-siong tiong, khò Tsú lâi huaⁿ-hí.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org