《台語荒漠甘泉（全羅版）》

 | | | 轉寄

"Khai-khún suaⁿ-tē"

作者 陳清俊 翻譯 2011.02.13

listen

Jī ge̍h tsa̍p-saⁿ (Jī ge̍h tsa̍p-saⁿ ji̍t)

“Suaⁿ-tuē iā beh kui lí; sui-jiân sī tshiū-nâ, lí iā thang tshò i; i ê ki̍k-thâu iā beh sio̍k lí.” (Iok-su-a 17:18)

Pîⁿ-iûⁿ, suaⁿ-kok tuà muá Ka-lâm lâng, in ū thih-tshia, kiông-tuā ū-la̍t, tsó͘-tòng lín tsiân-tsìn. Suaⁿ-tē khui-khuah, muá sī tshiū, sī lí ló͘-li̍k huat-tián ê só͘-tsāi.

Kim-ji̍t tng lí huat-kiàn buē-tàng uī Siōng-tè tsuè-kang, lí thang uī-tio̍h hiah-ê uē-tàng ê lâng lâi kî-tó. Lí buē-tàng īng lí ê li̍k-liōng, lí ê uē-gú lâi thui-tián tē-tsiūⁿ ê kang-tsok, lí thang īng kî-tó lâi kám-tōng thiⁿ nih ê tuā li̍k-liōng lâi tsuè-kang. Lí kám-kak tī suaⁿ-kha buē-tàng tsìn-tián lí ê sū-kang, ū sing-ua̍h ap-li̍k, siū tsó͘-tsí, sū-sū bô sūn-lī, lí thang tsiong gán-kong ǹg khah kuân ê suaⁿ-tē, thiⁿ-nih, khuàⁿ-buē-tio̍h, íng-kiú-sìng ê kíng-kài khì tsuè.

Lâng īng sìn-sim lâi khai-khún suaⁿ-tē. Í-sik-lia̍t lâng tsai suaⁿ-nih ū tsuē-tsuē tsu-guân, tsâi-pó, ū hong-hù ê tuā tshiū-nâ khì khai-khún. Siōng-tè ài in khì suaⁿ-nih khai-khún ê tuā kang-tsok, khuàⁿ khí-lâi sī bô khó-lîng ê tuā kang-tiâⁿ. M̄-sī beh hō͘ in kiaⁿ kah hue-sim, huán-tńg sī beh ài in ū sìn-sim, ū lîng-li̍k uē tsuè in só͘ siūⁿ kóng bô-khó-lîng ê sū. Tsit ê li̍k-liōng sī khò-tio̍h Siōng-tè só͘ sù sìng-lîng ê tāi-lîng, tsiah huat uē tshut-lâi.

Lâng uē ū khùn-lân sī uī sím-mi̍h? Ài lán īng sìn-sim khò kî-tó kap ló͘-li̍k kang-tsok, Siōng-tè ê lîng-li̍k tsiū uē hián-hiān tshut-lâi. Tī suaⁿ-kok tiong tú-tio̍h sì-bīn siū uî-khùn mah? “Tsiū hō͘ i khiâ tī tuē-tsiūⁿ kuân ê só͘-tsāi, tit-tio̍h tsia̍h tshân--nih ê thó͘-sán; koh hō͘ i tuì tsio̍h-puâⁿ suh-bi̍t, tuì hé-tsio̍h suh-iû.” (Sin-bīng-kì 32:13) Ài ǹg kuân ê tē, tuì tsio̍h-puâⁿ ni bi̍t tshut-lâi. Lâng khuàⁿ-tsuè bô-khó-lîng,lóng beh piàn-tsuè khó-lîng. Tuì suaⁿ-tē tshú tin-pó.

Sím-mi̍h huîⁿ(huâiⁿ) buē kè ê tuā-tsuí,
Sím-mi̍h tsǹg buē thàu ê suaⁿ-tui,
Guán sī ti̍k-sû kang-tîng tuī,
Tsuan-bûn tsuè “bô khó-lîng” ê luī.
--- Panama ūn-hô kiàn-tio̍k kang-lâng ê kua


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org