《台語荒漠甘泉（全羅版）》

 | | | 轉寄

"Uân-tsuân sìn-khò"

作者 陳清俊 翻譯 2011.02.20

listen


Jī ge̍h jī-tsa̍p (Jī ge̍h jī-tsa̍p ji̍t)

“Guá si̍t-tsāi kā lín kóng, Lín nā ū sìn tshin-tshiūⁿ tsi̍t lia̍p kuà-tshài tsí, lín tsiū beh kā tsit ê suaⁿ kóng, ‘Tuì tsia suá khì hia’, ia̍h beh suá khì; koh lín teh-beh bô tsi̍t hāng buē.” (Má-thài 17:20)

Guān-ì tsiong ka-kī sìⁿ-miā ê an-tsuân kap sing-ua̍h ê ti̍k-sìng, uân-tsuân kau tī Tsú tuā kuân-lîng ê tshiú tiong ê ki-tok-tô͘, tsiū-sī tī sing-ua̍h tiong, i uē tsuè-kàu bô tsi̍t-tiám-á ê pó-liû, siong-sìn Tsú ê ìng-ún, siong-sìn Tsú muí-kù ê ìng-ún lóng beh si̍t-hiān.

Tsit tsióng ê ki-tok-tô͘ it-tīng uē ta̍k ji̍t “tsiong lín ê iu-lū sià hō͘ Siōng-tè”, ( I Pí-tik 5:7) ū tsit tsióng ê kau-thok, uē tit-tio̍h tshim-tshim ê pîng-an.

Tsit tsióng ê ki-tok-tô͘ uē tī ta̍k-tsióng ê khuân-kíng nih, khuàⁿ Siōng-tè ê tsí-ì, sim huaⁿ-hí, tshuì tshiùⁿ-kua lâi tsiap-siū, lóng buē ai-uàn.

Tsit tsióng ê ki-tok-tô͘ tiāⁿ-tio̍h uē tsiong ka-kī khǹg tī, ún-tsông tī Siōng-tè ê tuā kuân-lîng lāi, uē bîng-pi̍k ka-kī siōng-tuā ê nńg-tsiáⁿ kap hiah ê íng-hióng ka-kī, kuat-sim khì tsuè tsiâⁿ jím-nāi, sìng-kiat kap khiam-pi ê kok-tsióng sū-bu̍t. Kî-si̍t tse sī tsi̍t tsióng ki-huē tshau-liān, hō͘ tsuē buē-uē tī lán pún-sin ê sin-tsiūⁿ tsok-iōng ê tshau-liān. Án-ni lán ná lâi ná kian-kiông. Tsit tsióng ki-huē tshau-liān sī, thiàⁿ lán ê Thiⁿ-pē só͘ siúⁿ-sù, hō͘ lán bîng-pi̍k pīng tsun-hîng I ê tsí-ì, hō͘ lán ū hok-khì thé-giām tio̍h I ê tông-tsāi kap I ê tuā-lîng.

Tse it-tshè khó-lîng lóng sī tuì thiⁿ lâi ê, in-uī tse lóng sī Siōng-tè ê tsok-uî. Lán nā uē tsin-tsiàⁿ tit-tio̍h, tsiū uē put-tuān khiam-pi ka-kī, kiong-kìng tī Tsú ê kha-tsîng, ha̍k-si̍p tui-kiû tit-tio̍h koh khah tsuē.

Lán uē koh-khah ǹg-bāng kap Siōng-tè tâng-kiâⁿ, in-uī bô pa̍t-hāng uē khah buán-tsiok lán ê sim. Khò-tio̍h Sìng-lîng ê lîng-li̍k, lán uē muí-ji̍t sî-sî khik-khik ua̍h tī Ki-tok nih. ---H.C.G. Moole

Uân-tsuân ê sìn-khò, lán uē tuì Siōng-tè ài tit-tio̍h juā-tsuē, tsiū thang tit-tio̍h juā-tsuē, Tsú Ki-tok tsiong I ê pó-khò͘ ê só-sî kau tī lán ê tshiú tiong, kiò lán khì the̍h. Nā-sī ū lâng uē thang siū ín-tsún ji̍p gûn-hâng ê pó-hiám-khò͘, kiò i thang the̍h lāi-bīn ê tsîⁿ, i nā khang-tshiú tǹg-lâi, bô tsîⁿ thang sing-ua̍h, án-ni, ài kuài sím-mi̍h lâng ah? Siōng-tè ê hù-tsiok hō͘ ki-tok-tô͘ thang pe̍h-pe̍h lâi the̍h, i só͘ tit-tio̍h ê nā sī tsin tsió, iū thang kuài sáⁿ-lâng ê m̄-tio̍h ah?


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org