《台語荒漠甘泉（全羅版）》

 | | | 轉寄

"Ngī-sim"

作者 陳清俊 翻譯 2011.03.13

listen


Saⁿ ge̍h tsa̍p-saⁿ (Saⁿ ge̍h tsa̍p-saⁿ ji̍t)

"Tsú Siōng-tè, tsuân-lîng ê ah, lí ê só͘-tsuè tuā koh kî-kuài; li̍k sè-tāi ê Ông ah, lí ê tō-lō͘ gī koh tsin-si̍t." (Khé-sī-lio̍k 15:3)

Ē-bīn sī tshut-miâ ê thuân-tō-tsiá Tsarles H. Spurgeon ê hu-jîn (i ê sin-thé bô hó-sè ū jī-tsa̍p-gō͘ nî kú) só͘ tsuè ê kiàn-tsìng:

Kè liáu lóng bô tsuè sím-mi̍h ê tsi̍t kang liáu-āu, guá tó tī tsi̍t tè phòng-í hioh-khùn. Sui-jiân pâng-king ê tiān-hé tsin kng, tsóng-sī guā-kháu ê o͘-àm tsìn-ji̍p guá ê sin-thé, suah jia-khàm guá ê sim-lîng ê ba̍k-tsiu. Guá ki̍k-li̍k beh khì khiú hit-siang "ū-la̍t ê tshiú", tsiū-sī siông-siông ín-tshuā guá kiâⁿ- lō͘ ê tsuân-lîng ê tshiú, tsóng-sī guá lóng khuàⁿ-buē-tio̍h.

Guá tsin pi-siong lâi mn̄g kóng, Tsú uī-sím-mi̍h án-ni tuì-thāi I ê tsi̍t-ê gín-ná! I uī-sím-mi̍h hō͘ guá tú-tio̍h tsit khuán ê kan-lân, thòng-khó͘? I uī-sím-mi̍h tsiong tsit-ê khó͘-tshó kú-tn̂g tîⁿ tī guá sin-tsiūⁿ, suah it-ti̍t bô huat-tō͘ lâi sū-hāu I ê "su-iàu lâng liāu-lí ê lô͘-po̍k"?

Tsiah ê būn-tê tsin kín tsiū tit-tio̍h huê-tap. Sī īng tsin kî-biāu ê giân-gú lâi huê-ìng, bô su-iàu lâng ê huan-i̍k, tsí-iàu īng guá liû-sim tsù-ì ê sim-lîng ê giân-gú tsiū kàu-gia̍h. Tī tsit tuāⁿ sio̍k-tsīng ê sî-kan, tsí-ū hiâⁿ-hé tshâ teh to̍h só͘ huat-tshut phit-phit pha̍k-pha̍k ê siaⁿ. Thut-jiân guá thiaⁿ-tio̍h tsi̍t ê un-jiû ê siaⁿ-im, tshing-tshing tshó-tshó ê im-ga̍k, tshin-tshiūⁿ tī thang-á kha ū tsiáu-á teh tshiùⁿ tshut bí-hó ê kua-tiāu.

Guá tuā-siaⁿ mn̄g kóng, "Tse sī sím-mi̍h siaⁿ?” Tī tsit ê hân-líng ê àm-sî, tsua̍t-tuì bô khó-lîng ū tsiáu tī guā-bīn tshiùⁿ-kua. Hit ê un-jiû ê tsiáu-á kua-siaⁿ iū koh thiaⁿ kah tshing-tshing tshó-tshó, un-jiû koh sîn-pì hō͘ guá tsin hi-kî. Jiân-āu guá ê tsì-hó pîng-iú huah kóng, Tse sī piah-lô͘ lāi ê hit ki tshâ só͘ huat tshut-lâi ê! Lô͘ hé tsiong lâu tī tshâ lāi, í-king khǹg-tī tshâ lāi kú-kú ê im-ga̍k pàng tshut-lâi.

Khó-lîng tsit ki tshâ, tī i bí-hó ê sî ū thiaⁿ tio̍h tsiáu-á khiā-tī i ê tíng-bīn tshiùⁿ tsit tiâu kua, i kì khí-lâi, siu khí-lâi, ún-tsông khí-lâi. Tsóng-sī í-āu i lāu lah, tīng lah, tsi̍t nî koh tsi̍t nî ê siⁿ liû, suah tsiong tsit tiâu kua hong khí-lâi, hong kah ba̍t tsiuh-tsiuh. Ti̍t-kàu hé-tsi̍h lâi sio tsit ki tshâ, sio hō͘ i huat-tshut kua-siaⁿ, tsiâⁿ-tsuè hiàn-tsiūⁿ ê sing-lé. Tsit sî, guá tsiah bîng-pi̍k, pīⁿ-thiàⁿ ê hé hō͘ lán ê lāi-bīn pàng-tshut o-ló ê kua-siaⁿ, hō͘ lán ê sim-sîn tsin-tsiàⁿ tit-tio̍h kiat-tsīng. Hō͘ lán ê Pē Siōng-tè tit-tio̍h îng-iāu.

Ū lâng ná tshin-tshiūⁿ tsit ki tshâ, líng-líng tīng-tīng, bô kám-tsîng, lóng m̄-bat tshiùⁿ-tshut bí-hó ê kua. Sī lán tsiu-uî ê iām-iām ê hé hō͘ lán pàng-tshut Tsin-sîn ê siaⁿ-tiāu, hō͘ lán khuài-khuài lo̍k-lo̍k lâi tsun-hîng I ê tsí-ì. Siūⁿ kàu tsia, piah-lô͘ ê hé kè-sio̍k teh sio, tsit tsióng ê phí-jū, tsin kî-biāu, hō͘ guá ê lîng tiⁿ-bi̍t, sù-sī hó-sè.

“Tio̍h! tī hé-tiong tshiùⁿ kua!” Thiⁿ-pē ū-sî īng tse î-it ê hong-huat, kà lán sí-sí, líng-líng, ngī-ngī ê sim, tshut hô-hâi ê kua-siaⁿ. Só͘-í, hō͘ hé-lô͘ “pí pîng-siông ke-thiⁿ tshit pē ê jia̍t”. (Tān-í-lí 3:19)


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org