《台語荒漠甘泉（全羅版）》

 | | | 轉寄

"khuài-lo̍k"

作者 陳清俊 翻譯 2011.03.20

listen

Saⁿ ge̍h jī-tsa̍p (Saⁿ ge̍h jī-tsa̍p ji̍t)

“Tshin-tshiūⁿ huân-ló, kî-si̍t siông-siông khuài-lo̍k; tshin-tshiūⁿ sòng-hiong, kî-si̍t hō͘ tsuē-tsuē lâng pù; tshin-tshiūⁿ bô ū, kî-si̍t sī bô m̄ ū.” (Ṳ Ko-lîm-to 6:10)

Tsi̍t-ê kian-kiông ê lâng sī bô suî-piān lâu ba̍k-sái. Tān-sī ki-tok-tô͘ pīng bô kìm-tsí buē-sái khàu, lâu ba̍k-sái. Sim-lîng ki̍k-tō͘ ê iu-siong uē piàn-sîng tsīng-tsīng buē tshut-siaⁿ. Ná tshin-tshiūⁿ tsi̍t tsiah iûⁿ tī siū tsián mn̂g ê sî, phi̍h-phi̍h-tshuah buē tshut-siaⁿ tsi̍t-iūⁿ. Tn̄g-tio̍h tsing-sîn siū khó-giām, siū ki̍k-tuā ê khó͘-lān ê sî, lán thang tuā-siaⁿ kiû-kiò, thî-khàu lâi tit-tio̍h tháu-pàng. Tsóng-sī iáu-ū pí tsit ê khah hó ê pān-huat.

Bat thiaⁿ kóng, tiⁿ-bi̍t ê tshing-tsuâⁿ sī tuì kiâm-kiâm ê hái-tsuí lâi ê. Kuân-suaⁿ nih siōng-suí ê hue, sī siⁿ tī siōng hong-huì, siōng bô lâng kàu, guî-hiám ê suaⁿ-kan tiong. Siōng-suí ê si-kua, sī tuì siū ki̍k thòng-khó͘ ê lîng-hûn só͘ sán-sing ê.

Guān tse tsîng-hîng iáu teh kè-sio̍k. Tī tsuē-tsuē tshì-liān tiong, thiàⁿ Tsú ê lîng-hûn, uē huat-hiān, tshē-tshut bû-sò͘ “tio̍h tiô-thiàu, huaⁿ-hí kap khuài-lo̍k” ê lí-iû. “Tsuí-tshiâng huat siaⁿ, tshim-ian hiáng-ìng” (Si-phian 42:7) Tuì Tsú lâi o-ló ê kua, tshing-liāng ê siaⁿ beh siông-siông thiaⁿ-tio̍h. Tng lán tī siōng khùn-lân thòng-khó͘ ê sî, lán iáu uē huat-tshut kám-siā o-ló Thiⁿ-pē Siōng-tè, lán ê Tsú ê kua-siaⁿ.

Lí ū tit-tio̍h tsit-hō ê kà-sī bô? Lán m̄-nā ài jím-nāi, thiaⁿ-thàn Tsú ê tsí-ì, koh-khah tio̍h tsìn-tsi̍t-pō͘ “Muá-muá ū îng-kng ê hí-lo̍k”, (I Pí-tik 1:8) Uī-tio̍h tse lâi huaⁿ-hí khuài-lo̍k.

Huân-ló iu-siong ê tāng-tàⁿ, siū-siong ê sim-kíng,
Tshuì ha̍p tiâu-tiâu, ba̍k-sái kâm tī ba̍k-tsiu lāi ê tsîng-hîng,
Bô giân bô gú, bô khàu bô kiû-tsîng,
Guá beh tsīng-tsīng.

Khuàⁿ buē tio̍h, siūⁿ buē khui,
Bû-tsîng ê hé, jiá-khí lāi-bīn siū-siong ê huih,
Sit-khì só͘ tshun tsi̍t-tián-tián-á ê an-uì,
Guá iû-guân tsīng-tsīng bô khui tshuì.

Siōng-tè sī thiàⁿ, guá ài jím-nāi,
Guá ê lîng bô giâu-gî, bô pi-ai,
Guá beh tán-thāi,
I ê tshiú tshun tshut-lâi.

Guá tsing-tsat, guá kiaⁿ-hiaⁿ,
Guá iáu thiaⁿ guá ê sim-siaⁿ;
Īng bô-koh-ū ba̍k-sái ê ba̍k-tsiu kiû-kiò I ê miâ,
Kóng, Tsú ah, guān Lí ê tsí-ì tit tsiâⁿ.

Bô-kú, guá siū ah-tiâu ê sim kóng uē,
Uī-hô tshuì tu-tu, bīn iu-iu, ba̍k khueh-khueh,
Guá ê lîng ah, lán khah hó, khí-lâi tsuè,
M̄-thang koh tsīng-tsīng, ài khuài-lo̍k tuì sim-tué!

Taⁿ guá sim khuài-lo̍k lâi tshiùⁿ-kua,
M̄-bián ga̍k-khì lâi tuâⁿ, lâi phuāⁿ,
Sua-bô͘ tiong ê kam-tsuâⁿ,
Sui siū-siong, iáu beh ná ing tián-si̍t pe ǹg kuân suaⁿ.
--- S.P.W.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org