《台語荒漠甘泉（全羅版）》

 | | | 轉寄

"Uân-tsuân ê sūn-ho̍k"

作者 陳清俊 翻譯 2011.08.14

listen


Pueh ge̍h tsa̍p-sì (Pueh ge̍h tsa̍p-sì ji̍t)

"Nā m̄-sī tuì tíng-bīn hō͘ lí, tsiū lí bô kuân thang pān guá;" (Iok-hān hok-im 19:11)

Tsi̍t ê siong-sìn koh tsun-siú Siōng-tè tsí-ì ê lâng, i só͘ tú-tio̍h ê muí tsi̍t hāng sū, bô m̄-sī Siōng-tè ê ín-tsún. Tsit ê tsin-lí tsiū kàu-gia̍h hō͘ lán bô thîng ê kám-siā kap hí-lo̍k, in-uī Siōng-tè ê tsí-ì sī siōng ū ǹg-bāng, siōng huaⁿ-hí, siōng îng-kng ê. Nā-sī lán tsuân-jiân ê sūn-ho̍k, tsuân-jiân ê siong-sìn, Siōng-tè tsiū uē tsuân-lîng uī lán tsuè sū, sī bô tsi̍t tsióng ê la̍t tsó͘-tsí uē tiâu.

Tsi̍t ê king-li̍k kè tshim-tshim thòng-khó͘ ê lâng siá phue hō͘ pîng-iú án-ni kóng:

Tsi̍t hāng sū bô lūn sī juā bô kong-tō, sīm-tsì sī Sat-tàn pún-sin lâi pìⁿ-báng, tsi̍t ē lîm-kàu tī lán ê sin-tsiūⁿ, tsiū tsiâⁿ-tsuè sī Siōng-tè ê tsí-ì, kàu-bé lóng sī lán ê lī-ik. Tse kiám m̄-sī lán ki̍k tuā ê îng-kng mah?

“Bān-hāng sū ta̍uh-ta̍uh lâi, lóng sī beh hō͘ thiàⁿ Siōng-tè ê lâng tit lī-ik.” (Lô-má 8:28) Siūⁿ-khuàⁿ-māi, Iâ-so͘ tī siū-buē hit sî só͘ kóng ê “Guá ê pē só͘ hō͘ guá ê pue, guá kiám thang bô lim mah?” (Iok-hān hok-im 18:11)

Lán nā tsuân-jiân sing-ua̍h tī Siōng-tè ê tsí-ì nih, sī tsiok suí ê, Sat-tàn tsioh pa̍t-lâng ê tsuē lâi kong-kik lán, iā sī bô kàu la̍t thang hām-hāi tio̍h lán, tsit ê khiok beh tsiâⁿ-tsuè Siōng-tè ê tsiok-hok. --- Hannah Whitall Smith

Guá khiā tiàm,
Siōng-tè tsí-ì ê tiong-sim-tiám,
Bô sím-mi̍h tsa̍p-liām,
Lóng sī kap I lâi saⁿ-liâm.
It-tshè tsin suí, bô thang hiâm,
In-uī Siōng-tè tsuè guá it-sing ê kè-uē kap hong-tsiam.

Guá kiám uē thong-kè it-liân-tshuàn ê thòng-khó͘?
Kàu sî guá uē tsai, tse lóng sī tuì guá ū pang-tsō͘,
Sui-jiân guá m̄-tsai guân-in jû-hô,
Guá siong-sìn, sī Siōng-tè teh kuàn-kò͘.
Siōng-tè sī sìn-si̍t, sī thiàⁿ-sioh,
Hō͘ guá uân-tsuân pîng-an ê an-hioh.

Ū tshut-ji̍t, iā ū im-iáⁿ,
Ū hí-lo̍k, iā ū thàng-thiàⁿ,
Tsú, guá sìn-jīm Lí! Nn̄g hāng lóng sī thiàⁿ.
Lí teh hùn-liān Lí ê kiáⁿ.
Guán beh tsai-iáⁿ,
Tē-tsiūⁿ ê sún-sit beh tsiâⁿ thiⁿ-nih ê khah-iâⁿ. --- I.G.W.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org