《台語荒漠甘泉（全羅版）》

 | | | 轉寄

"Tshì-giām-so͘"

作者 陳清俊 翻譯 2011.08.28

listen


Pueh ge̍h jī-pueh (Pueh ge̍h jī-tsa̍p-pueh ji̍t)

“I tī-hia, uī in tīng lu̍t-lē huat-tō͘, tī-hia tshì-giām in." (Tshut-Ai-ki̍p-kì 15:25)

Guá bat tsham-kuan tsi̍t king kǹg-thih kang-tiûⁿ. In ū tsin-tsuē tshik-giām kǹg-pán ê kok tsióng gî-khì kap siat-pī. Ū kǹg-phìⁿ í-king siū teh uan khì, tíng-bīn piau-tshut i uē sîng-siū ê ap-li̍k; ū-ê siū khiú tn̄g, tíng-bīn piau-tshut i ê hān-tō͘; iā ū-ê siū ko-ap gíng-kè, iā niû tshut i siū-ap ê li̍k-tō͘. In-uī ū tsiah ê tshì-giām, só͘-í muí tsi̍t tè kǹg-thih īng lâi tsō tsûn, khí tshù, pho͘ kiô ê sî, in lóng tsai tsiah ê kǹg-thih uē thang sîng-siū juā-tuā ê ap-li̍k hān-tō͘.

Siōng-tè ê kiáⁿ-jî iā sī án-ni. I bô ài lán tshin-tshiūⁿ po-lê á-sī huî-á tsin tshè, tshuì-jio̍k, iông-ì phuà, I thuàn-liān lán tsuè hó-kǹg, uē sîng-siū tsin-tuā ê ap-li̍k kap khiú-tō͘, teh lóng buē tshuì khì.

Siōng-tè bô ài lán tshin-tshiūⁿ un-sik lāi ê hue-tsháu, tòng buē tiâu hong-tshe hō͘-ak. I ài lán tshin-tshiūⁿ sik-guā ê tshiūⁿ-tshiū, tòng-uē-tiâu tuā-hong po̍k-ú. I iā bô ài lán tshin-tshiūⁿ sua-tui, hō͘ hong tshe-lâi tshe-khì, bô tiāⁿ-tio̍h ê só͘-tsāi, I ài lán tshin-tshiūⁿ tuā giâm-tsio̍h, tòng-uē-kè po̍k-hong-hō͘ ê tá-kik. Uī-tio̍h beh hō͘ lán tsiâⁿ mi̍h, I uē tuà lán kàu I ê tshì-giām tiûⁿ. Siū-khó͘ khak-si̍t sī I tuì lán sìn-sim ê tshì-giām, lán tiong-kan ū tsin-tsuē lâng lóng ū tshin-sin ê thé-giām. --- J.H.M.

Lí-lūn sìn-sim, “kóng khah khuài, tsuè tsiah tsai.” Siōng-tè khǹg lán tī I ê khó͘-lān, ko-un ê e-á lāi, sī beh tsiong tsa̍p-tsit tuì n̂g-kim thiu-tshut-lâi, tshì-giām lâi thê-kuân kim ê sûn-tō͘. Tng lán king-kè po̍k-hong tuā-hō͘, kuâiⁿ-lōng tuā-hái āu, koh-khah uē thé-giām Iâ-so͘ pó-kuì ê tông-tsāi lâi huaⁿ-hí. Lîng-khó ū Iâ-so͘ ê tī-teh tú-tio̍h po̍k-hong-hō͘, khah-iâⁿ tī pîng-sūn kiâⁿ-tsûn bô Iâ-so͘ tông-tsāi ê ji̍t-tsí. --- J.R. Macduff

Nā m̄-sī ū Siōng-tè īng khó͘-lān hō͘ lán ê sìⁿ-miā sîng-tióng, lán m̄-tsai uē piàn-tsuè sím-mi̍h khuán?


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org