《台語荒漠甘泉（全羅版）》

 | | | 轉寄

"Hì-pîⁿ kha, khiā kú ê lâng ê"

作者 陳清俊 翻譯 2011.09.11

listen

Káu ge̍h tsa̍p-it (Káu ge̍h tsa̍p-it ji̍t)

“A-pik-la̍h-hán gâu thun-lún, tsiū tit-tio̍h só͘ ìng-ún ê.” (Hi-pik-lâi 6:15)

A-pik-la̍h-hán king-li̍k kè tsin tn̂g ê khó-giām, i tit-tio̍h hong-hù ê siúⁿ-sù. Tsú īng iân-tsiân I ê ìng-ún lâi khó-giām lâng. Mô͘-kuí Sat-tàn īng tshì-thàm ín-iú lâng, sī lī-iōng lâng ê uàn-tò͘, giâu-gî, tuì-khòng. Sat-la̍h (A-pik-la̍h-hán ê bó͘) ê pháiⁿ phî-khì, i jím-siū, bô huâi-gî Siōng-tè ê sîng-si̍t kap lîng-li̍k, iā bô tuì Siōng-tè ê sìn-si̍t kap thiàⁿ-thàng khí gî-būn. Pīng-tshiáⁿ sūn-ho̍k tī Siōng-tè ê kuân-pìng kap bû-hān ê tì-huī ni̍h. Sui-jiân Siōng-tè ìng-ún iân-tî, i tsīng-tsīng thìng-hāu, thìng-hāu Tsú ê sî-tsūn, nāi-sim tng-tán, ti̍t-kàu i tit-tio̍h ìng-ún si̍t-hiān.

Tshin-ài ê pîng-iú, Siōng-tè tap-ìng ê, it-tīng uē sîng-tsiū, Kìⁿ-nā nāi-sim thìng-hāu ê lâng íng-uán buē sit-bōng, in-uī sîng-tsiū ê tāi-sing, it-tīng ū siong-sìn ê sim. A-pik-la̍h-hán it-sing ê bô͘-iūⁿ hō͘ kip-sìng ê lâng siū tsik-pī, hō͘ bâi-uàn ê lâng tsīng-tsīng, hō͘ jím-nāi ê lâng tit lîng-li̍k, hō͘ tsīng-tsīng thìng-hāu Tsú tsí-ì ê, tit kó͘-lē.

Uē-kì-tit, A-pik-la̍h-hán siū khó-giām, I nāi-sim thìng-hāu, tsuè-āu tit só͘ ìng-ún ê, sim-muá ì-tsiok. Lí nā o̍h i ê khuán-sit, iā beh tit siāng-khuán ê hok-hūn.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org