《台語荒漠甘泉（全羅版）》

 | | | 轉寄

"Ûn-ûn-á tsáu"

作者 陳清俊 翻譯 2011.10.30

listen


Tsa̍p ge̍h saⁿ-tsa̍p (Tsa̍p ge̍h saⁿ-tsa̍p ji̍t)

“Thun-lún lâi tsáu”, á-sī kóng, “Nāi-sim pun-pháu”, tsuè khí-lâi sī ū khùn-lân. Tsáu á-sī pun-pháu pún-lâi tsiū-sī buē thang nāi-sim , buē thang thun-lún, sī ài kín-kip kàu bo̍k-tik-tē. Siông-siông lán gō͘-huē jím-nāi sī kap tò-teh, á-sī khiā-teh bô tín-tāng liâm tsuè-hé. Lán iā jīm-uî jím-nāi sī siú-hō͘ phuà-pīⁿ lâng ê thiⁿ-sái, kî-si̍t, pīⁿ-lâng sī siōng bô nāi-sim ê.

Līng-guā tsi̍t tsióng ê jím-nāi, sī pháu-tsáu sî ê jím-nāi. Tī pi-siong ê sî tó-lo̍h-khì, tī king-tsè siū tuā khùn-lân tiām-tsīng lo̍h-khì, sī su-iàu jím-nāi, tsóng-sī ū-sî su-iàu koh-khah tuā ê nāi-sim, tsiū-sī tng tsi̍t ê lâng siū tsin-tuā ê tshò-tsiat liáu-āu iáu uē kè-sio̍k kang-tsok, sim-lāi tîm-tāng, kè-sio̍k pun-pháu, tsing-sîn siū tuā pi-siong, iáu uē tsuè ji̍t-siông kang-tsok, tse sī tshin-tshiūⁿ Ki-tok ê jím-nāi lah!

Lán tsin tsuē lâng, ba̍k-sái kâm teh, lâi tshú-lí lán ê pi-siong thòng-khó͘, nā uē-tit, lóng sī tī su-jîn ê khuân-kíng. Khùn-lân ê, sī lán ê nāi-sim piáu-ta̍t tshut-lâi tī tsìng-lâng ê bīn-tsîng, tī tuā kue-lō͘ tíng, m̄-sī tī bîn-tshn̂g tíng. Lán tsiong thàng-thia3nn jím-khí-lâi, m̄-sī tsē teh, thîng-tsí ua̍h-tāng, huán-tńg sī tsik-ki̍k lâi ho̍k-bū, kang-tsok. Tī kang-tsok tiong, tī sing-lí bué-buē tiong, tī kap lâng tsiap-tshiok tiong, iáu khó-lîng tuà hō͘ lâng hí-lo̍k. Jím-nāi pi-siong bô pí tse khah khùn-lân lah. Tse tsiah sī “tsûn-sim jím-nāi teh pháu” ê tsin-tsia3nn ì-gī.

Tshin-ài ê Jîn-tsí Iâ-so͘, tse sī Lí ê jím-nāi ê khuán-sit. Siāng tsi̍t ê sî-kan, ài jím-nāi, koh ài pun-pháu, thìng-hāu hit siōng-bé, tsuè-tuā ê kiù-sio̍k bo̍k-piau, iā tio̍h kò͘ tio̍h ji̍t-siông ê sū-bū. Guá khua3nn Lí tī Ka-lī-lī ê Ka-ná uī-tio̍h hun-iàn tiong bô sit-khì hí-lo̍k, lâi tsiong tsuí piàn tsuè tsiú. Guá iā khua3nn-ki3nn Lí tī khòng-iá peh pia2nn pun-hō͘ tsìng-lâng tsia̍h pá, uī-tio̍h kái-kuat tsiām-sî ê su-iàu. Tsóng-sī Lí it-ti̍t tam-tng ki̍k-tuā ê pi-thia3nn, bô lâng thang hun-thuaⁿ, bô lâng thang thiaⁿ Lí ê thòng-khó͘. Lâng thang kî-kiû “tsiong khīng khǹg tī hûn-tshái tiong” (Tshòng-sè-kì 9:13), Guá tuì Lí kiû-thó koh-khah tsuē, tsiong guá tī hûn-tiong piàn-tsuè tsi̍t ê tshái-khīng, tsiong hí-lo̍k tuà hō͘ lâng. Guá ê jím-nāi tsí-ū tī Lí ê phû-tô-hn̂g tiong siu-tsíng tsiah piàn-tsuè uân-tsuân. --- George Matheson

Sit khì it-tshè ê hi-bāng,
Siōng-hó tsīn-tsik uī pa̍t-lâng tsuè kang;
Hō͘ lâng hí-lo̍k lâi i ka-kī ê khó͘-thàng,
Sī siōng ū tì-huī ê lâng.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org