《台語荒漠甘泉（全羅版）》

 | | | 轉寄

"Khó-khò ê tsō͘-tshiú"

作者 陳清俊 翻譯 2011.11.13

listen

Tsa̍p-it ge̍h tsa̍p-saⁿ (Tsa̍p-it ge̍h tsa̍p-saⁿ ji̍t)

"Guá bat i, sī beh hō͘ i bīng-līng i ê kiáⁿ kap i ê ke-kuàn; hō͘ in tn̂g-tn̂g siú Iâ-hô-hua ê tō-lí, píng-kong kiâⁿ-gī; tì-kàu Iâ-hô-hua tsí A-pik-la̍h-hán só͘ kóng ê uē, lóng kui hō͘ i." (Tshòng-sè-kì 18:19)

Siōng-tè kíng-suán I só͘ uē sìn-jīm ê lâng. I tsai I thang kî-thāi A-pik-la̍h-hán tsuè sū, tuì i kóng, "Guá kíng-suán i, i thang huan-hù, kàu-tok, bīng-līng i ê kiáⁿ-jî, iā Guá só͘ ìng-ún hō͘ A-pik-la̍h-hán ê tāi-tsì, lóng beh sîng-tsiū. Siōng-tè sī thang sìn-lāi ê, I iā kî-thāi lán sī siāng-khuán ê khó-khò, kian-tīng, ún-tīng. Tse tsiū-sī sìn-sim ê kán-iàu ê ì-gī.

Siōng-tè teh tshē I só͘ uē-thang kau-thok ê lâng, thang tsiong thiàⁿ-sim, lîng-li̍k, sìn-si̍t tsuân-jiân thok-tiōng i. I sī hé-tshia-bú, I ê li̍k-liōng tsin tuā, thua uē kiâⁿ jīm-hô tāng, koh tsuē ê tshia-siuⁿ. Khó-sioh, kau tī hé-tshia-bú ê soh-liān bô kàu kiông, bô kàu ióng, thang thua lán kî-tó ê.tāng-liōng. Só͘-í, Siōng-tè put-tuān teh hùn-liān lán, tī sìn-sim-siōng, uē ún-tīng koh kian-kò͘. Ǹg-bāng lán uē ha̍k-si̍p hó-sè, uē kian-kò͘ khiā tiâu-tiâu. --- A.B. Simpson

Siōng-tè tsai lí uē tòng-tit khó-giām, nā-bô, I buē hō͘ lí tú-tio̍h tshì-giām. In-uī I sìn-iōng lí, lí tsiah ū tsiah ê tshì-giām; bô-lūn sī juā tuā ê tshì, lí lóng tòng uē kè. I tsai lí ê li̍k-liōng, kè-sǹg kàu lí ê tsīn-pōng. Ài kì-tit, tsi̍t ê lâng uá-khò Siōng-tè só͘ sù ê lîng-li̍k, I buē hō͘ i siū tio̍h só͘ buē tàng jím-siū ê tshì-giām.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org