《台語荒漠甘泉（全羅版）》

 | | | 轉寄

"Sìn-sim ê thìng-hāu"

作者 陳清俊 翻譯 2011.11.20

listen


Tsa̍p-it ge̍h jī-tsa̍p (Tsa̍p-it ge̍h jī-tsa̍p ji̍t)

"Kìⁿ-nā thìng-hāu koh kàu tsi̍t-tshing saⁿ-pah saⁿ-tsa̍p-gō͘ ji̍t ê, hit ê lâng ū hok-khì." (Tān-í-lí 12:12)

Thìng-hāu kah-ná sī tsin khuài ê sū, tsuè tsi̍t ê Ki-tok ê ping-ting, khiok su-iàu tsin tsuē nî ê hùn-liān tsiah o̍h tio̍h tse kong-khò. Tuì Siōng-tè ê ping-ting lâi kóng, hîng-kun, tshau-liān, nā kap thìng-hāu, tsīng-tsīng, lâi pí-kàu, sī khah iông-ì.

Tng tú-tio̍h tāi-tsì, sim luān tshau-tshau, m̄-tsai thâu-tsîng ê hong-hiòng, iā m̄-tsai beh án-tsuáⁿ tsuè, liân siōng-ū sìn-sim ê lâng, ài uī Tsú lâi kiâⁿ it-sing ê lâng, iā uē tú-tio̍h tsit tsióng tsîng-hîng, beh án-tsuáⁿ? Sī sit-bāng hue-sim? Sī huê-thâu lún-neh? Sī bô hong-hiòng lām-sám hiòng tsîng tshiong mah?

Lóng m̄-sī, tse sī ài lí thìng-hāu ê sî, kî-tó teh thìng-hāu, kiû Siōng-tè, tsiong lí ê khùn-kíng pâi-lia̍t tī I ê bīn-tsîng, tsiong khùn-lân kóng hō͘ I thiaⁿ, koh thê-tshíⁿ I tap-ìng beh pang-tsān.

Tī sìn-sim ê thìng-hāu, kian-kuat put-gî siong-sìn I. Nā-sī I ài lí tán kàu puàⁿ-mî, lí iā sī siong-sìn. I beh tī ki̍k sik-tòng ê sî lâi si̍t-hiān I uī lí pī-pān ê tsiong-lâi.

Thìng-hāu, pîng-tsīng an-sim nāi-sim ê thìng-hāu, bo̍h-tit uī-tio̍h lí só͘ siūⁿ tshut ê guân-in lâi mâi-uàn, tse ná tshin-tshiūⁿ Í-sik-lia̍t lâng tuì Mô͘-se tshut uàn-giân tsi̍t iūⁿ. Tsiap-siū hiān-kim ê tsîng-hîng, tsuân-sim kau-tài tī Siōng-tè ê tshiú-tiong, tû-khì ka-kī ê siūⁿ-huat, tuì Tsú kóng, "Tsú ah, bô tsiàu guá ê ì-sù, sī tsiàu Lí ê tsí-ì." (Lō͘-ka 22:42) Guá m̄-tsai beh án-tsuáⁿ tsuè, guá sī tī ki̍k khùn-khó͘ tiong, su-iàu Lí, guá beh thìng-hāu, tán Lí tsiong ba̍k-tsîng ê tuā-hái pun-khui, tán Lí tsiong tsîng-bīn ê tuì-ti̍k kuáⁿ-tsáu. Ká-sú guá ài tán tsin kú, guá iā beh tán. Tshin-ài ê Tsú, guá tsuan-sim thìng-hāu Lí, tán Lí ê tsín-kiù nā-tiāⁿ. Guá ê lîng tsuân-sim tsū-sìn teh tán-thāi Lí, Lí sī guá ê tsín-kiù, guá ê hí-lo̍k, "in-uī Lí sī guá tô-siám ê só͘-tsāi, tsuè guá kian-kò͘ ê kuân-tâi, thang thuat-lī tuì-ti̍k." (Si-phian 61:3)Thìng-hāu, nāi-sim ê thìng-hāu,

Siōng-tè bô sit-hāu,
Lí ê kè-uē hē tī Siōng-tè ê tshiú-thâu,
Thìng-hāu I lâi tháu,
Thìng-hāu, koh thìng-hāu,
Nāi-sim ê thìng-hāu.

Sìn-khò, ǹg-bāng ê sìn-khò,
Siōng-tè teh tsò;
Tû-khì lí sim lāi ê tso-tso.
I ê tsí-ì tsiong lí sing-ua̍h kái-tsō,
Sìn-khò, koh sìn-khò,
Ǹg-bāng ê sìn-khò.

An-hioh, pîng-hô ê an-hioh,
Tī Kiù-tsú ê hing-tsîng sioh;
Pâi-lia̍t lí tuā kè-uē, sū-gia̍p ki-tsio̍h,
I beh sîng-tsiū hō͘ lí tiô koh tshiò,
An-hioh, koh an-hioh,
Pîng-hô ê an-hioh! --- Mercy A. Gladwin


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org