《台語荒漠甘泉（全羅版）》

 | | | 轉寄

"Tan-to̍k"

作者 陳清俊 翻譯 2011.12.04

listen


Tsa̍p-jī ge̍h tshue-sì (Tsa̍p-jī ge̍h sì ji̍t)

"tsiū ka-kī tsiūⁿ suaⁿ kî-tó." (Má-thài hok-im 14:23)

An-hioh-ji̍t ê hó-tshù tsiū-sī pàng-hē sè-kan ê sū, hióng-siū an-lîng, ping-tsīng, sìng-kiat ê pîng-an. Siok-tsīng tiong sán-sing tsi̍t tsióng ti̍k-pia̍t ê lîng-li̍k. O͘-a sī kui kûn teh pe, tshâi-lông sī kiat tīn teh kiâⁿ, tān-sī, Sai kap ing-tsiáu sī tan-to̍k tshut-hiān.

Tī bô-îng, tsháu-nāu ê tiong-kan buē sán-sing li̍k-liōng, tī an-tsīng ê sî tsiah uē. Ô͘ bīn beh huán-iáⁿ tshut thiⁿ-sik ê suí sī tī pîng-tsīng ê sî-tsūn. Lán ê Tsú huaⁿ-hí tsi̍t tuā tīn ê lâng lâi tshē I, tsóng-sī I iā siông-siông tan-to̍k tsi̍t lâng an-tsīng tī suaⁿ ni̍h. Sui-jiân I ê suan-tō sī tī to͘-tshī, hiong-tìn ê ô͘-pīⁿ tsìn-hîng, I koh-khah ài ka-kī tsi̍t-lâng hông-hun ê sî thè kàu suaⁿ ni̍h tī pîng-tsīng kuân ê só͘-tsāi.

Hiān-kim lán só͘ su-iàu ê sī tan-to̍k kap Tsú tī-teh ê sî-tsūn. Tsē tī I ê kha tsîng, tit I ê tsiok-hok, tan-to̍k kap I tshin-kūn. Oh, lán su-iàu hit tsióng "bi̍k-sióng" ê kang-hu. Lán ê sing-ua̍h su-iàu hit ê "ún-ba̍t ê só͘-tsāi". (Si-phian 91:1) Oh, Lán su-iàu thìng-hāu tuì Siōng-tè lâi ê lîng-li̍k!

Kok tiong kam-tiⁿ hó sing-ua̍h,
Sè-tsiūⁿ tāi-tsì lóng tsuè suah,
Tsò-sit-lâng tī be̍h-hn̂g tshiùⁿ kua,
Kang-tsok kàu ji̍t-thâu lo̍h suaⁿ.
Pîⁿ-iûⁿ í-guā, Guá giâ-ba̍k khuàⁿ suaⁿ,
Bô ū lâng, tshia, tsìng suan-huâ,
Tuì hô-pîng ê suaⁿ,
Ū siaⁿ teh kiò guá.

Sī, kok tiong sing-ua̍h sī kam-tiⁿ,
Kang-tsok kàu ji̍t-thâu lo̍h khì,
Tsi̍t ji̍t kang-tsok tsuè tshing-khì,
Guá sim-lîng su-iàu suaⁿ ni̍h khong-khì.
Tsì-kuân tiām-tsīng ê khì-bī,
Tshiong-muá tī an-tsīng suaⁿ ni̍h,
Tshim-tshim an-lîng ê suaⁿ piⁿ,
Iáu teh kám tio̍h tse lîng khì.

Sìⁿ-miā beh tit-tio̍h kian-kiông, pit-su ài ū Tsí-ū Siōng-tè uē thang ji̍p khì ê "Tsì-sìng-só͘" (Tshut-ai-ki̍p-kì 26:33)


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org