《台語荒漠甘泉（全羅版）》

 | | | 轉寄

"Àm-mî kìng-pài"

作者 陳清俊 翻譯 2011.12.11

listen

Tsa̍p-jī ge̍h tsa̍p-it (Tsa̍p-jī ge̍h tsa̍p-it ji̍t)

"Khuàⁿ ah, Iâ-hô-hua tsiah ê lô͘-po̍k, mî-kan tiàm Iâ-hô-hua tshù-lāi ê, lín lóng tio̍h o-ló Iâ-hô-hua. Guān tshòng-tsō thiⁿ tuē ê Iâ-hô-hua, tuì Sik-an sù hok-khì hō͘ lí." (Si-phian 134:1,3)

Lí uē tsù-ì tio̍h tī tsin kî-kuài ê sî-kan kìng-pài Siōng-tè, tī àm-sî. "tī mî-kan tī Iâ-hô-hua ê tshù". Tī àm-mî, tī lán siōng iu-siong ê sî lâi kìng-pài, khak-si̍t sī tsi̍t tsân tsin khùn-lân ê sū. Put-kò tī tsit lāi-bīn ū hok-khì teh tán lí, in-uī he sī sìn-sim uân-bí ê khó-giām. Tī hân-líng ê tang-thiⁿ uē khuàⁿ tshut pîng-iú thiàⁿ-sim ê thîng-tō͘. Siāng-khuán, lán tuì Siōng-tè ê thiàⁿ iā sī án-ni.

Tī jua̍h-thiⁿ ū thài-iông, ū tsiáu-á tshiùⁿ-kua, ū tsuí-kó tī tshiū-tíng, lâi kìng-pài Siōng-tè sī iông-ī ê. Nā-sī tng tsiáu-á bô khì, bô kua-siaⁿ, tshiū-tíng ê ké-tsí iā lóng la̍k khì, guá ê sim sī-m̄-sī iáu uē tshiùⁿ-kua o-ló Siōng-tè neh? Guá kiám iáu beh guān-ì tī mî-sî tī sìng-tiān nih? Guá kiám iáu thiàⁿ I? Guá kiám beh guān-ì kap I tī Khik-se-má-nî hn̂g "kíng-síng tsi̍t tiám-tsing kú"? (Má-khó 14:37) Guá kiám guān-ì pang-tsān I, pē I ê si̍p-jī-kè kiâⁿ kàu Kok-kok-thaⁿ? Tī I siū tìng-sí ê sî, guá kiám kap I ê lāu-bú, Má-lī-a, I só͘ thiàⁿ ê ha̍k-sing, Iok-hān khiā tsuè-hé tī sin piⁿ mah? Guá kiám uē tshin-tshiūⁿ A-lī-má-thài ê Iok-sik, á-sī Nî-ko-tí-bó͘ uē tsiong I ê sin-si tuì si̍p-jī-kè tíng the̍h lo̍h lâi neh?

Guá nā uē thang tshin-tshiūⁿ án-ni tsuè, guá ê kìng-pài sī uân-tsuân, ia̍h guá ê hok-khì sī îng-kng ê. Tī I siōng pi-bî ê sî, guá thiàⁿ I; tī I siōng kē ê sî, guá piáu-sī sìn-sim, tī I siōng bô lâng iân, siū khuàⁿ-khin ê sî, guá ê sim iáu sîng-jīm I ê ko-kuì. Guá tsai, guá sī ài I pún-sin, m̄-sī ài I ê un-sù, lé-mi̍h. Si̍t-tsāi, guá beh tī àm-mî, khiā tī I ê sìng-tiān kìng-pài I, bô uī-sím-mi̍h, tsí-ū uī tio̍h I pún-sin nā-tiāⁿ. --- George Matheson

Siōng-tè pún-sin sī guá ê bo̍k-piau,
M̄-sī hí-lo̍k, pîng-an, hok-khì kap tsâi-tiāu.
Sī tsiàu I ê tsí-ì, guá siū-tiàu,
"Tshin-ài Tsú, bô sioh tāi-kè, lō͘ bô kuán kiâⁿ tó tsi̍t tiâu!"

Sìn-sim tshuā guá ǹg Siōng-tè lâi mài-tsìn,
Tshuā ji̍p thiàⁿ, khò Tsú lâi siong-sìn,
Guá ê lîng tè Tsú tè-kín-kín,
Ti̍t kàu I tap-ìng guá ê kî-tó kap tshim-sìn.

Put kuán lō͘-tiong o͘-àm ko͘-tuaⁿ,
Put-kuán tāi-kè juā tuā,
I tsai guá beh khì ê ta̍k lō͘-tuāⁿ,
Kàu I hia ê lō͘ sī khak-sìn, koh ti̍t-suàⁿ,

Tsi̍t tsân sū sī khíng-tīng, guá buē tuì I huán-tuì,
Tsi̍t tsân sū guá teh tsuè, Tsú, guá só͘ uá-khò kap kun-suî,
Guá ná kiâⁿ, ná o-ló Guá ê Siōng-tè, sim ná khui,
Kàu tī thiⁿ tit ki̍k-tuā ê pò-siúⁿ, siōng pó-kuì.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org