《台語荒漠甘泉（全羅版）》

 | | | 轉寄

"Thè-khì piⁿ-a"

作者 陳清俊 翻譯 2012.01.22

listen


Tsiaⁿ ge̍h jī-jī (It ge̍h jī-tsa̍p-jī ji̍t)

"Iâ-so͘....thè-khì khòng-iá, ka-kī tuà;" (Má-thài 14:13)

Ga̍k-phó͘ lāi ū hiu-sik hû-hō. Tsi̍t tiâu kua ê ga̍k-tsiong siông-siông lí uē khuàⁿ tio̍h tī-tsia, tī-hia lóng uē tshut-hiān hiu-sik hû-hō. Jîn-sing ê ga̍k-tsiong, iā sī án-ni, tī tsia, tī hia siông-siông ū hiu-sik hû-hō ê tshut-hiān, tsóng-sī tng lâng tú-tio̍h hiu-sik hû-hō ê sî, lia̍h tsuè sī jîn-sing ê tsiong-tiám lah. Siōng-tè īng phuà-pīⁿ, īng sit-bōng ê kè-uē, bô kiat-kó ê ló͘-li̍k, tsuè hiu-sik-hō, kiò lâng ài hioh-khùn. Jîn-sing ê ha̍p-tshiùⁿ tiong, tú-tio̍h hiu-sik-hō, lán ê siaⁿ bô khì-ah, lán beh àu-náu mah? Tsí-hui, im-ga̍k-ka khuàⁿ hiu-sik-hō sī ga̍k-tsiong ê tsi̍t pō͘-hūn, i pīng bô thîng-tsí, iáu teh kè-sio̍k phah-phik, sî-kan tsi̍t-ē kàu, bô khah tn̂g, iā bô khah té, tsiū koh kè-sio̍k ē-bīn ê im-hû, hiu-sik-hō ná tshin-tshiūⁿ bô tòng-tiām tsi̍t-iūⁿ. Lán jîn-sing ê ga̍k-tsiong, Siōng-tè siá ê sî, lóng ū tsi̍t-ê kè-uē, lán só͘ tsuè ê, sī ha̍k-si̍p hit ê kua-tiāu, hiu-sik-hō ê sî, tsiū tio̍h nāi-sim thìng-hāu, tsit-sî iā buē sái tāi-ì, á-sī hut-lio̍k, suah phuà-huāi tio̍h tsíng-kô ê ga̍k-tsiong, á-sī piàn-tiāu. Lán ài gióng-bōng Siōng-tè, I teh sǹg sî-kan, tsí-iàu jīn-tsin khuàⁿ Siōng-tè, ē tsi̍t ê ga̍k-tsiong I beh tshing-tshing tshó-tshó tsí-sī lán. Lán bô su-iàu iu-iu tshiû-tshiû tuì ka-kī kóng, hiu-sik-hō, thiaⁿ buē tio̍h lán ê siaⁿ-im, beh án-tsuáⁿ neh? Ài tsai hiu-sik-hō sī ga̍k-tsiong ê tsi̍t pō͘-hūn. Sing-ua̍h kè-thîng siông-siông sī bān-bān koh khó͘-thàng, Siōng-tè khiok ū nāi-sim lâi kà-sī lán, m̄-nā kà, koh nāi-sim thìng-hāu lán o̍h tio̍h tse kong-khò. --- John Ruskin

Thè-khì piⁿ-a,
Tuì bô-îng khuài-lo̍k ê kang-tsok,
Tuì sè-kan buē-thîng ê lô-lo̍k,
Tsìn kàu thiⁿ-tíng im-ńg an-lo̍k,
Lâi kàu tsiām-sî hiu-sik thian-kok.

Thè-khì piⁿ-a,
Hông-hun, ji̍p bô-lâng ê hue-hn̂g,
Tsú kap lí tī-teh, m̄ sī pàng lí hn̄g-hn̄g,
Thiaⁿ I iu-bí ê siaⁿ suè-suè teh khǹg,
"Kiáⁿ ah, lí beh kap guá hióng-siū tse an-tsīng ē-hng?"

Thè-khì piⁿ-a,
Kap Tsú Ki-tok sàn-pō͘,
Lim ua̍h-tsuâⁿ kam-lō͘,
Kap I tshin-bi̍t kau-puê,
Tsiap-kūn thiⁿ-tíng siong-huē.

Thè-khì piⁿ-a,
Kap I tan-to̍k, bat I ná tshim,
Tī ún-ba̍t tiong, kìng-ka thiàⁿ-sim,
Àm-mî iu-siong sî tit ha̍k-si̍p,
I un-jiû tshin-tshiat bô tio̍h-kip.

Thè-khì piⁿ-a,
Kám-siā Lí tì-ìm kap an-tsīng,
Kám-siā Lí thiàⁿ ê lō͘-kìng,
Kap Lí tī-teh, put-kuán guán khàu, guán kíng-síng,
Kám-siā Lí sù àm-mî Khik-se-má-nî ê an-lîng.

Thè-khì piⁿ-a,
Tiām-tsīng siūⁿ, I tsuè it-tshè uân-bí,
Bông hok kám-siū, kap Ki-tok tâng khiā-khí,
Hioh tī Lí si̍p-jī-kè im-iáⁿ ē-kha,
Kám-siā Lí, Tsú ah, kiò guán thè-khì piⁿ-a.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org