《台語荒漠甘泉（全羅版）》

 | | | 轉寄

"tsīng-tsīng"

作者 陳清俊 翻譯 2012.02.05

listen


Jī ge̍h tshue-gō͘ (Jī ge̍h gō͘ ji̍t)

"Lín tshut-lâi m̄-bián tio̍h-kip, iā m̄-bián tô-tsáu." (Í-sài-a 52:12)

Guá buē thang liáu-kái, "tsīng-tsīng" á-sī "an-tsīng" uē sán-sing kî-biāu ê li̍k-liōng. Siông-siông lán tshong-tshong kông-kông tsuè sū, suah sit-khì hō͘ Siōng-tè lâi tsuè ê ki-huē. Lí tsai Siōng-tè buē tuì lí kóng, "an-tsīng lo̍h-lâi", "tsīng-tsīng", á-sī "khiā tiàm hia mái tín-tāng", tû-hui I sī beh tsuè lah. Ki-tok-tô͘ só͘ huān ê tshò-gō͘, tsiū-sī lán lia̍h-tsuè put-kuán-sî it-tīng ài tsuè sím-mi̍h, suah bô hō͘ I lâi tàu saⁿ-kâng.

Lí tī hip-siōng ê sî, uē khiā-teh lóng bô tín-tāng, hō͘ lí ê bô͘-iūⁿ hip ji̍p-khì siòng-phìⁿ. Thiⁿ-pē hō͘ lán tsi̍t ê íng-uán ê tsí-ì, tsiū-sī hāu-huat I ê kiáⁿ ê khuán-sit. (Lô-má 8:29) Beh ài tsuè kàu tsit tiám, lán su-iàu khiā-teh bô tín-tāng. Siông-siông thiaⁿ lâng kóng ài ua̍h-tāng, kî-si̍t lán só͘ ài o̍h ê, sī "an-tsīng".

Kiáⁿ ah! Tsīng-tsīng tsē, tsē tsīng-tsīng!
Tng-tán ê sî m̄-sī bô lō͘-īng!
Siōng thiàⁿ lí ê Pē, uī lí kè-uē tsiân-thîng,
Bô buē-kì-tit lí ê kiû-tsîng.
Nā ài tán, sî-kan beh tsìng-bîng,
Nńg-tsiáⁿ ê kiáⁿ ah! thé-giām siōng thiàⁿ lí ê, ê sim-tsîng.

Kiáⁿ ah! Tsīng-tsīng tsē, tsīng-tsīng tshāi!
Tsú ê tsí-ì, khat-bō͘ khì liáu-kái,
Tshiau-huân àm-àm tsìn-ji̍p lâi,
In-uī Lí ê iân-tî, nāi-sim siau-sit, sit-pāi,
Tan-sûn ê sìn ài lí tsīng-tsīng tsū-tsāi,
Bat lí thiàⁿ lí ê Tsú uē tsuè siōng-hó an-pâi.

Kiáⁿ ah! Tsīng-tsīng tsē, bô iô-tāng!
M̄-thang tāng, tsi̍t-pō͘ mā mài tāng,
I khui lō͘, suí koh bí-bāng!
Lí sim huaⁿ-hí, kha khin-khuài, khin-sang,
Lāi-sim kiông-tuā hó-khang!
Thìng-hāu ê sî bô sǹg khang-khang.

Kiáⁿ ah! Tsīng-tsīng tsē, tsīng-tsīng tó!
Bô ū sū-hōng pí tse khah hó,
Sī tsin oh! Pó-kuì mi̍h lóng ài tāi-kè ko.
Kiaⁿ sún-sit ê tsiū beh sún-sit, siau-bô,
Sī lân, sī tsin-si̍t, tsóng-sī I ê un-huī, pîng-hô
Hō͘ siōng khùn-lân piàn tsuè siōng tiⁿ siōng pó.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org