《台語荒漠甘泉（全羅版）》

 | | | 轉寄

"Siōng-tè sī guá Thiⁿ-pē"

作者 陳清俊 翻譯 2012.02.12

listen
Jī ge̍h tsa̍p-jī (Jī ge̍h tsa̍p-jī ji̍t)

"lín ê Thiⁿ-pē iā tsai" (Má-thài 6:32)

Ū tsi̍t lâng khì tsham-kuan lông-a ha̍k-hāu. (kà thiaⁿ bô, buē kòng ê lâng), tī o͘-pang siá tsit ê būn-tê mn̄g tsiah ê gín-ná, "Siōng-tè uī-sím-mih tsō guá uē kóng uē thiaⁿ, á lín lóng buē ah?"

Gín-ná khuàⁿ liáu tuā tio̍h-kiaⁿ, tshin-tshiūⁿ hō͘ lâng tāng-tāng siàn tshuì-phé. In tsē teh, ná hō͘ tiān tiān-tio̍h, "uī-sím-mih" tī in ê náu-ni̍h huan-lâi huan-khì teh tńg, m̄-tsai beh án-tsuáⁿ. Tsit sî, tsi̍t-ê tsa-bó͘ gín-ná khí-lâi

I ê tshuì-tûn teh tín-tāng, ba̍k-sái lìn lo̍h-lâi, kàu o͘-pang, the̍h hún-pit siá, "Pē ah, sī lah; in-uī lí khuàⁿ án-ni tsuè huaⁿ-hí." (Má-thài 11:26). Tsin hó ê huê-tap! Siōng ū sîng-si̍k ê sìn-tô͘ só͘ huat-tshut ê íng-uán ê tsin-lí. Liân siōng iù-tī ê gín-ná iā uē khiā tiâu-tiâu tī tse tsin-lí, "Siōng-tè sī guá Thiⁿ-pē".

Lí kiám uē tsū-sìn kóng tsit kù uē mah? Nā uē, lí ê sìn-sim, tsiū m̄-bián tshin-tshiūⁿ hún-tsiáu tī khong-tiong pe-lâi pe-khì bô hioh kha ê só͘-tsāi. Lán íng-uán ū hioh ê só͘-tsāi, pîng-an ê uī, tsiū-sī lán ê Thiⁿ-pē!

Guá siong-sìn ū tsi̍t kang, guá beh bîng-pi̍k, put-kuán sī juā-kú ê sî-kan. Hiān-tsāi lán só͘ tú-tio̍h ê pi-kio̍k, khùn-lân, lán uē liáu-kái, lóng sī tī I ê tuā kè-i̍k tiong, tshiau-ua̍t lán só͘ siūⁿ uē tio̍h ê, koh îng-huâ, koh hí-lo̍k ê kè-uē, hō͘ lán thang tshiò, thang kiaⁿ koh thang huaⁿ-hí.

Phuà-pīⁿ bô uàn-thàn,
Tsāi tī Siōng-tè tshiú tiong-kan.
I khuàⁿ lí só͘ bô khuàⁿ,
Thòng-khó͘ lóng ū in-tuaⁿ.
Āu-ji̍t lí beh bîng-pi̍k,
“Tē tsi sit” sī “thiⁿ só͘ tik.”
Tshin-tshiūⁿ tsi̍t hù tshiah-siù,
Āu-pia̍h-bīn bô tsiâⁿ iūⁿ,
Suàⁿ-thâu, suàⁿ-si kiat kui khiû,
Tsiàⁿ-bīn bí-tô͘ tsi̍t tiuⁿ,
Kang-tshiūⁿ thang tit pò-siúⁿ,
Ki-su̍t, nāi-sim tē it liû.
Lí sī Kang-tshiūⁿ, guá sī khing,
Tsú, uī Lí miâ ê kong-îng,
Bāng tse tô͘ sī Lí uân-bí ê hîng.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org