《台語荒漠甘泉（全羅版）》

 | | | 轉寄

Tsuí-tsuâⁿ

作者 陳清俊 翻譯 2006.11.26

listen


Tsa̍p-it ge̍h jī-tsa̍p-la̍k ji̍t

"Ka-li̍k mn̄g kóng, Lí beh sím-mi̍h ah? I kóng, Kiû lí sù-hok guá; lí í-king an-tì guá tī lâm-hng ê tuē, kiû lí hō͘ guá tsuí-tsuâⁿ. I tsiū īng tíng ê tsuí-tsuâⁿ, ē ê tsuí-tsuâⁿ hō͘ i." (Iok-su-a 15:18-19)

Jîn-sing tiong ū "tíng ê tsuí-tsuâⁿ kap ē ê tsuí-tsuâⁿ." In lóng-sī tsuí-tsuâⁿ, m̄-sī tiāⁿ-tiāⁿ ê tsuí-khut. In sī tuì thiⁿ-tíng lâu lo̍h-lâi ê hí-lo̍k kap tsiok-hok, thong-kè iām-jia̍t ê jua̍h-thiⁿ, king-li̍k huân-ló kap khó-giām siōng hong-huè ê sua-bô͘. Sio̍k-tī Ap-sat ê thó͘-tē sī tī Iû-tāi ê lâm-pîng, iām-jia̍t ê ji̍t-thâu kā thó͘-tē pha̍k kàu ta-sò-sò. Tsóng-sī tuì suaⁿ-nih lâu-lo̍h-lâi bô-tn̄g ê tsuí-tsuâⁿ hō͘ kui tè thó͘-tē lóng piàn tshing-liâng, king-sin koh tsin puî.

Tsiah ê tsuí-tsuâⁿ lâu kè jîn-sing kē ê só͘-tsāi, khùn-lân ê só͘-tsāi, hong-bô͘ ê só͘-tsāi, ko͘-to̍k ê só͘-tsāi, iā phó͘-thong ê só͘-tsāi. Bô-lūn lán ê tshú-kíng jû-hô, lóng uē thang tshē tio̍h tsiah ê tsuí-tsuâⁿ. A-pik-la̍h-hán tī Ka-lâm ê tsìng suaⁿ piⁿ tshē tio̍h tsuí-tsuâⁿ. Mô͘-se tī Bí-tiân ê tsio̍h-puâⁿ tiong tshē-tio̍h tsuí-tsuâⁿ. Tāi-pi̍t tī Sé-kik-la̍h ê hé-hu tiong tshē-tio̍h tsuí-tsuâⁿ, hit-sî i ê tsâi-sán lóng bô-khì, i ê ka-tîng siū lia̍h. Sui-jiân tsìng-lâng kóng "tio̍h īng tsio̍h-thâu tìm i, ... tsóng-sī Tāi-pi̍t uá-khò Iâ-hô-hua i ê Siōng-tè, ka-kī kian-kò͘." (I Sat-bó͘-jíⁿ 30:6)

Í-sài-a tī A-sut ông Se-ná-ki-li̍p tsìn-ji̍p Iû-tāi kok kiaⁿ-hiâⁿ ê ji̍t-tsí huat-kiàn liáu tse tsuí-tsuâⁿ, hit-sî liân kuâiⁿ-suaⁿ to tshin-tshiūⁿ beh hiat lo̍h hái. (Ṳ Lia̍t-ông-kì 19 tsiuⁿ) Tsóng-sī i ê sìn-sim iáu uē hō͘ i tshiùⁿ-kua, "Ū tsi̍t tiâu hô, i ê khui-tshe hō͘ Siōng-tè ê siâⁿ huaⁿ-hí, Tsiū-sī Tsì-kuâiⁿ-ê só͘ khiā-khí sìng ê só͘-tsāi. Siōng-tè tī hit tiong-kan, siâⁿ tik-khak buē iô-tāng." (Si-phian 46:4-5)

Ki-tok-tô͘ sûn-tō tī lia̍t-hé tiong huat-kiàn tsuí-tsuâⁿ, kàu-huē kái-kik-tsiá tī kap in ê tuì-ti̍k hùn-tàu tiong, iā lán tī muí tsi̍t ji̍t ê sing-ua̍h tiong, lóng uē tshē tio̍h tsuí-tsuâⁿ, tsí-iàu lán sim-tiong ū Pó-huī-su, iā o̍h Tāi-pi̍t án-ni kóng, "Guá ê tsuí-guân lóng tsāi-tī Lí." (Si-phian 87:7)

Tsiah-nih tsuē, hong-hù, tsiah-nih pó-kuì ê tsuí-tsuâⁿ lán thang ū, Siōng-tè iáu ū koh-khah tsuē, hong-hong hù-hù ê mi̍h ài lán khì tit tio̍h! --- A.B. Simpson

Guá kóng, Sua-bô͘ tsin khuah-khui.
Guá kóng, Sua-bô͘ tsin hong-huì,
Guá tshuì-ta, tī tó-uī ū tsuí?
Tī po̍k-hong-sua beh bih tī tó-uī.

Guá kóng, Sua-bô͘ tsiah-nih ko͘-tuaⁿ.
Bô un-jiû siaⁿ, bô khó-ài bīn thang khuàⁿ,
Liân tsi̍t-tiám-á ê khong-kan iā bô thang huāⁿ,
Guá iáu-buē tuā-siaⁿ huah tsiū siau-suàⁿ.

Guá thiaⁿ-tio̍h ún-tsông ê tsuí-tsuâⁿ,
Tī guá bīn-tsîng ū tsó-tshiū tshiⁿ koh tuā,
Tsiáu-á teh tshiùⁿ-kua,
Khong-tiong ū thiⁿ-sài ê si̍t koh iô koh tuâⁿ.

Tsi̍t ê Thiⁿ-sài khin-khin mn̄g tsi̍t kù,
"Tuì bîng-á-tsài ê sū,
Uī-sím-mi̍h ài kè-thâu iu-lū?
Kiám-m̄-tsai Thiⁿ-pē tsai lí só͘ su?"

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw