《台語荒漠甘泉（全羅版）》

 | | | 轉寄

“Tsì bî-suè”

作者 陳清俊 翻譯 2008.02.24

listen
Jī ge̍h jī-sì (Jī ge̍h jī-tsa̍p-sì ji̍t)

“Iok-hān lóng bô kiâⁿ sîn-jiah, to̍k-to̍k Iok-hān só͘ kóng tsí tsit lâng ê, lóng sī tsin.” (Iok-hān hok-im 10:41)

Lí khó-lîng bô muá-ì lí pún-sin, lí m̄-sī thian-tsâi, bô ti̍k-sû ê tsâi-lîng, it-sing pîng-pîng tām-tām kè-ji̍t. Sing-ua̍h tan-tiāu, bô sím-mi̍h tshù-bī, ta̍t-tit thang lâi thê-khí ê sū. Sui-jiân sī án-ni, lí iáu sī ua̍h kah tsin ū kè-ta̍t.
Kiâⁿ sué-lé Iok-hān it-sing bô kiâⁿ tsi̍t-kiāⁿ ê sîn-jiah, Iâ-so͘ khiok kóng,"Hū-jîn-lâng só͘ siⁿ bē ū khah tuā Iok-hān ê;" (Lō͘-ka 7:28) I ê sù-bīng sī "uī-tio̍h kng tsuè kan-tsìng nā-tiāⁿ." (Iok-hān hok-im 1:8) Tse iā sī lí guá ê sù-bīng. Kiâⁿ sué-lé Iok-hān buán-tsiok tsuè tsit ê siaⁿ-im, tsí-iàu ū lâng thiaⁿ-tio̍h, uē siūⁿ tio̍h Ki-tok tsiū kàu-gia̍h.
Lâng ing-kai kam-sim tsuè hit ê hō͘ lâng uē thiaⁿ-kìⁿ, khiok buē thang khuàⁿ-tio̍h ê siaⁿ-im, á-sī tsi̍t-ê kiàⁿ ê po-lê, lâng bīn-tuì kiàⁿ, khuàⁿ tio̍h ê sī Jîn-tsú Iâ-so͘ ê tshàn-lān îng-kng, m̄-sī po-lê. Lâng ing-kai kam-sim lo̍k-ì tsuè thiⁿ kng sî ê liâng-hong, suan-kò "lê-bîng kàu lah," "lê-bîng lâi lah," iā koh khuàⁿ buē tio̍h, tsīng-tsīng siau-sit khì.
Lán muí tsi̍t ji̍t ê kang-tsok sui-jiân bô sím-mi̍h tuā liáu-put-khí ê sū, tān-sī Siōng-tè lóng tsai, lóng khuàⁿ tio̍h lah. Siat-sú sing-ua̍h tī kap tsin oh tîⁿ ê lâng ê tiong-kan, siat-huat īng thiàⁿ lâi iâⁿ i. Nā-sī bat tsuè-kè tuā sit-tshò, m̄-thang hō͘ sit-tshò ê ìm-iáⁿ íng-hióng lí í-āu ê jîn-sing, tsiong tse só tī sim-té, huán-tńg tuì tse lâi tit li̍k-liōng, thuàn-liān ka-kī ê phín-keh.
Lán kî-si̍t tsuè liáu tsin tsuē hó sū, tshiau-kè lán só͘ tsai. Kim-ji̍t lán iā-tsíng, kap lâng hun-hióng Ki-tok ê tsin-tō. Ū tsi̍t kang, ū lâng kóng, i siōng tāi-sing tsai Ki-tok sī tuì lí hia. Tng guá lī-pia̍t ê sî, guá bô khuà-sim bōng-pâi ê suí-bái, tuā-suè, guá só͘ ài tsai ê sī phó͘-phó͘ thong-thong ê lâng tī guá ê bōng tsîng kóng, “i sī tsi̍t ê hó-lâng, i bô kiâⁿ kè sím-mi̍h sîn-jiah, tsóng-sī i tsiong Ki-tok kài-siāu hō͘ guá, hō͘ guá thang jīn-bat Tsú Iâ-so͘” tsiū kàu-gia̍h lah. --- George Matheson


Lí só͘ khǹg-ba̍t ê lâng (Si-phian 83:3)

Tshiū-hio̍h ē,
Thô͘-ni̍h huat-tshut tshiⁿ-tshiⁿ ê hio̍h,
Huaⁿ-hí tshun-thiⁿ ê ho͘-kiò,
Tsháu pàng tshut hun-hong phang-bī teh tshiò,
Tap-ìng jua̍h-thiⁿ hue khui, ji̍t tsiò.

Tshiū-hio̍h ē,
Puah-khui tshiū-hio̍h, hián-tshut bí-lē,
Lán só͘ bô siūⁿ-tio̍h ê tē,
Ū âng, ū pe̍h ê gō͘-ge̍h hue,
Thu̍t-jiân ê kng lâi tián tshut in ê hue.

Tshiū-hio̍h ē,
Sè-kan kiám ū tshin-tshiūⁿ tsit khuán hue ê jîn-tsâi?
Sìng koh siān ê kiâⁿ-tsuè, tsí hō͘ Thiⁿ-pē tsai.
Siuⁿ hó, kiâⁿ siān, tiām-tiām lâi,
Hue m̂, hue luí khui, hán tit khuàⁿ tio̍h ê hong-tshái.

Tshiū-hio̍h ē,
Sìn-sim sìn-khò sûn-kiat ê hue suī,
Tsiap-tshiok tio̍h thiⁿ ni̍h ê îng-kng kap kong-hui,
Siū ap, siū teh ê sim-lîng tián khui,
Hián-tshut bí-lē, thiàⁿ ê hue luí.

Tshiū-hio̍h ē,
Tī im-iáⁿ, tióng-sîng tsi̍t tuā tui
Suí-suí tióng-sîng ê hue-luí,
Ún-tsông tī hue-ni̍h, uî-luî
Kam-tiⁿ, ti̍k-iú ê phang-bī tsin ko-kuì.

Lán ba̍k-tsiu só͘ khuàⁿ buē tio̍h,
Tsú khiok tsai muí tsi̍t luí, muí tsi̍t hio̍h,
Kam-sim thìng-hāu I ê kng tsiò,
Ti̍t kàu I koh-lâi ê sî, ê thiàⁿ-sioh.
Tshin-tsū hian-khui tsiah ê tshiū-hio̍h.

Siōng-tè tuì phó͘-thong ê jîn-kûn tiong, kíng-suán I siōng pó-kuì ê kang-lâng. (tsham-khó Lō͘-ka 14:23)

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw