《台語荒漠甘泉（全羅版）》

 | | | 轉寄

"Thàu-tsá thâu tsi̍t hāng sū"

作者 陳清俊 翻譯 2008.03.02

listen

Saⁿ ge̍h tshue-jī (Saⁿ ge̍h jī ji̍t)

"Bîn-á-tsá-khí lí tio̍h pī-pān piān; thàu-tsá lí tio̍h tsiūⁿ Se-nái suaⁿ; tī-hia, tī suaⁿ-bé-liu, khiā tī Guá bīn-tsîng, m̄-thang ū lâng kap lí tsiūⁿ-lâi;" (Tshut-ai-ki̍p-kì 34:2,3)

Thàu-tsá, tsá-khí-sî, sī hui-siông tiōng-iàu ê sî-khik. Tsi̍t-ji̍t ê khai-sí, sing bīn-tuì Siōng-tè tsiah lâi bīn-tuì tsi̍t ji̍t ê sing-ua̍h; sing kìⁿ Siōng-tè ê bīn, tsiah khì kìⁿ kî-thaⁿ lâng ê bīn. Nā-sī tan-tan khò pún-sin ê li̍k-liōng lâi khai-sí tsi̍t ji̍t ê sing-ua̍h, lí m̄-thang siūⁿ kóng beh tit-tio̍h sìng-lī.
Lí ê sim su-iàu tī Siōng-tè bīn-tsîng īng tsi̍t kuá sî-kan an-tsīng huán-síng, tuì I hia tit li̍k-liōng, tsiah khai-sí tsi̍t-ji̍t ê kang-tsok. Lí kap lí sìⁿ-miā tiong tsit ê uí-tāi ê lâng-kheh, tsun-kìng ê tâng-phuāⁿ, Iâ-so͘ Ki-tok kìⁿ-bīn í-tsîng, m̄-thang kìⁿ kî-thaⁿ ê lâng, pau-kuat ke-lāi lâng ê bīn.
Ài siông-siông tan-to̍k kap I kìⁿ-bīn, tsiong I só͘ kà-sī ê uē, sìng-king phah-khui lâi tha̍k, hō͘ lí ê sing-ua̍h siū Ki-tok ê sìng-tsîng lâi kám-jiám tio̍h, khì bīn-tuì, tshù-lí muí ji̍t it-puaⁿ, á-sī ti̍k-pia̍t ê tsik-jīm.

Thàu-tsá kap Siōng-tè khai-sí,
Sù ji̍t-kng, khuì-la̍t hō͘ lí,
I sī tsá-khí-sî kong-hui,
Tuā-sió sū lóng kau-tài I.

Tshing-tsá tshiùⁿ tsi̍t tiâu sin kua,
Tàu huaⁿ-hí ū tshiū-nâ, sió-suaⁿ,
Hong, hái, pîⁿ-iûⁿ koh tsuí-tsuâⁿ,
Hue tsháu khue hô kap tshân-huāⁿ.

Tāi-sing tshiùⁿ-kua ǹg Thiⁿ-pē!
M̄-sī tâng-phuāⁿ á sio̍k-sè,
M̄-sī siū-tsō-mi̍h, lâng kheh,
Sī ū îng-iāu Hit Tsi̍t ê.

Tsá-sî kap Thiⁿ-pē tâng kiâⁿ!
Tshiáⁿ I tī thâu-tsîng tuà-niá,
Hái-piⁿ, khue huāⁿ kap suaⁿ-niá,
Lóng beh tshē-kiû tè I iáⁿ.

Thâu tsi̍t pit sing-lí,
Kiû Tsú lâi tsí-sī,
Hô-hâi koh sūn-lī,
Kui ji̍t tshiò bî-bî. -- Horatius Bonar

Uī Thiⁿ-pē tsuè siōng tsuē kang ê lâng, tsiū-sī muí tsá-khí, kuī-lo̍h ǹg I kî-tó ê lâng. Tshin-tshiūⁿ, tsa̍p-tshit sè-kí Ing-kok bo̍k-su, Hng-lí Má-thài (Matthew Henry) muí tsá-khí sì-tiám kàu pueh tiám tī i tsu-pâng lîng-siu, jiân-āu kap ke-lāi ê lâng kî-tó, tsia̍h tsá-tǹg. Liáu-āu koh huê kàu tsu-pâng ti̍t-kàu tiong-tàu. Tsia̍h liáu kàu ē-po͘ sì-tiám sī siá-tsok ê sî-kan, kî-thaⁿ sî-kan khì thàm-hóng pîng-iú.
Ing-kok tsa̍p-pueh sè-kí sìng-si tsok-tsiá, Tō-tshui-jí Hui-li̍p-pí (Philip Doddridge) īng i só͘ tù ê "Ka-iōng kái king" ê tsu tsuè lē. Tshing-tsá gō͘-tiám khí-tshn̂g kap tshit-tiám khí-tshn̂g ê hun-pia̍t, tsá-khí ê lâng i ê kang-tsok tsing-ka pah-hun-tsi jī-gō͘. Uāⁿ-uē kóng, it-sing sì-tsa̍p-nî kang-tsok ê sî-kan, tsiū tsing-ka tsa̍p ê kang-tsok-nî.
Khu-lah-kú A-tong (Adam Clarke) ê "Sìng-king tsù-kái" tsú-iàu sī tī tshing-tsá siá ê. Ba-ní-su (Barnes) ê tsù-kái tsu, sī tsi̍t pún siōng siū huan-gîng ê sìng-king tsù-kái, iā sī lī-iōng tī thàu-tsá ê sî só͘ siá-tshut. Tsa̍p-pueh sè-kí Ing-kok kàu-huē uí-jîn, Se-biān Tsa-lí (Tsarles Simeon) ê "Biô-uē" tuā pō͘-hūn iā sī tī tsá-sî sì-tiám kàu pueh-tiám ê sî uân-sîng.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw