《台語荒漠甘泉（全羅版）》

 | | | 轉寄

"Tit si̍t-kó͘ pe kuâiⁿ"

作者 陳清俊 翻譯 2008.03.09

listen

Saⁿ ge̍h tshue-káu (Saⁿ ge̍h káu ji̍t)

"Tuì....tíng-bīn khuàⁿ-lo̍h-lâi." (Ngá-ko 4:8)

Ki-tok-tô͘ pē tuā ê tāng-tàⁿ, khiok hō͘ in ū nn̄g-ki si̍t. Thiaⁿ tio̍h, ná tsin mâu-tún, tse khiok sī siū tsiok-hok ê tsin-lí. Tāi-pi̍t siū tio̍h tuā khó-giām ê sî, án-ni âu-kiò kóng, "Guān guá tit-tio̍h si̍t, tshin-tshiūⁿ kap, guá tsiū pe khì, tit-tio̍h an-jiân khiā-khí." (Si-phian 55:6) Jiân-āu, tī i bi̍k-sióng uân ê tsìn-tsîng, i ná tit-tio̍h khak-sìn i beh ū si̍t-kó͘ ê guān-bōng í-king ta̍t-tio̍h, só͘-í suà tsiap lo̍h-khì kóng, "Tio̍h tsiong lí ê tàⁿ sià hō͘ Iâ-hô-hua; I beh hû-tshî lí, I íng-íng bô hō͘ gī-lâng iô-tsuah." (Si-phian 55:22)
"Tāng-tàⁿ" tī guá ê sìng-king tsù-kái ni̍h kái-sueh tsuè "Iâ-hô-hua só͘ hō͘ lí ê". Sìng-jîn ê tàⁿ sī Siōng-tè só͘ hō͘ i ê, só͘-í khò sìn-sim tsiū uē kî-tsik-sìng piàn-tsuè tsi̍t tuì si̍t. Sim siū tāng-tāng ap-li̍k ê lâng "beh tshin-tshiūⁿ ing-tsiáu thí-si̍t pe-kuâiⁿ." (Í-sài-a 40:31) -- tuì "Tsú-ji̍t-o̍h sî-pò"

Tsi̍t ji̍t kiâⁿ tī kue-ni̍h,
Kip teh pān-sū, thâu-nó͘ siūⁿ pah-hāng tāi-tsì,
Ná ba̍t-hûn, tuā-hō͘ beh piàⁿ lo̍h-khì,
Ka-kī khó-lîn ka-kī.
Khó-lîn ê,
Tāi-tsì hiah tsuē,
Sing-ua̍h hiah pháiⁿ kè,
Tāng-tàⁿ teh tī sim-té.
Thài-iông ná lia̍t-hé,
Khì-tshia phùn o͘-ian sái kè,
La-pah, siaⁿ-im tsi̍t sì-kuè,
Thô͘-hún tò-tshù pe.
Tsing-sîn siū gi̍k-thāi buē liáu,
Sim ià-siān, tshau-huân, khùn-jiáu,
Si̍t-tsāi tòng buē tiâu.

Ah! Kan-khó͘ buē-uân buē-suah,
Ap-li̍k si̍t-tsāi siuⁿ tuā,
An-uì ka-kī mā bô khah tsua̍h,
Bû-nāi lâi tsiap-siū tse sing-ua̍h.
Tsit-sî, ū suè-suè siaⁿ thiaⁿ-kìⁿ:
"He sī beh thê-sing lí, m̄-sī ap-tsè lí,"
Guá tsiah tsai, siūⁿ-huat ū siang-bīn,
Guá bô teh tī tāng-tàⁿ ê ē-bīn,
Sī tī i tíng-bīn,
Tāng-tàⁿ m̄-sī kiò guá pē,
Sī hō͘ guá tsē.
I ê kè-uē,
Tsai guá lîng-li̍k buē-uē,
Su-iàu un-tián kap li̍k-liōng,
Ná tshiū su-iàu ji̍t-kng, kam-lō͘ lâi sîng-tióng,
Iā ná buē tsiâⁿ-hîng ê ióng,
Tuì Tsin-sîn bô kàu-gia̍h ê sìn-gióng,
I ê tsû-ài tsān guá lîng tsiām-tsiām ióng.

Nā-sī tó-tī tāng-tàⁿ ē, tsiū sí-bông,
Nā-sī ló͘-li̍k khiā khí-lâi ê, uē sìⁿ-miā hing-ōng,
Tāng-tàⁿ piàn-tsuè lán ê siang si̍t,
Thê-sing lán tiàm tī I ê un-tián tsin-si̍t.
Nā bô i, lán íng-uán tī tshián-sìn ê sî-ji̍t.

Oh! Thiⁿ ê ò-biāu thong-ta̍t,
Beh teh lán ê tāng-tàⁿ sī tsuè thê-sing lán ê khuì-la̍t,
Guá ê lîng ah! sing-kuâiⁿ, sing-kuâiⁿ ū kè-ta̍t,
M̄-thang tī tāng-tàⁿ ē, teh siong-pi,
Siōng-tè ê uē-gú sī ji̍p thian-thui ê só-sî,
Kap Ki-tok tan-to̍k tsuè-hé khiā-khí,
Tsē tī tāng-tàⁿ tíng-bīn, hioh tī I sin-piⁿ. -- Mary Butterfield

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw