《台語荒漠甘泉（全羅版）》

 | | | 轉寄

"Jîn-sing ê suaⁿ-kok"

作者 陳清俊 翻譯 2008.03.16

listen

Saⁿ ge̍h tsa̍p-la̍k (Saⁿ ge̍h tsa̍p-la̍k ji̍t)

"sī uī-tio̍h lán ê lī-ik." (Hi-pik-lâi 12:10)

Ka-ná-tāi (Canada) suan-kàu-su Ralph Conner só͘ siá ê tsu, ū biô-siá tsi̍t ê tsa-bó͘ gín-ná ê kò͘-sū. Ū tsi̍t ê tsá-bó͘ gín-ná miâ kiò tsuè Gún (Gwen), i bô ài siū kà-sī, koh ū tsin khut-kiông ê sìng-keh, i ài án-tsuáⁿ tsuè, tsiū beh án-ni tsuè, buē thiaⁿ lâng ê ì-kiàn. Ū tsi̍t ji̍t i tú-tio̍h giâm-tiōng ê ì-guā, tshut-sū, suah hō͘ i sin-thé tsân-huì, hîng-tōng put-piān; i ê huán-puān-sìng kìng-ka lī-hāi. Ū tsi̍t ji̍t, i tú-tú teh ai-uàn ê sî, ū suaⁿ-tē suan-kàu-su lâi kā i khuàⁿ, tsit ê suan-kàu-su ū tsi̍t ê guā-hō, kiò "thian-tông su-ki", i īng suaⁿ-kok tsuè phì-jū lâi kóng kò͘-sū:
Tī khí-thâu tē-tsiūⁿ bô suaⁿ-kok, tsí-ū tsi̍t-phìⁿ pîⁿ-iûⁿ, ū tsi̍t ji̍t, pîⁿ-iûⁿ ê tsú-lâng kiâⁿ tī tsit ê tuā pîⁿ-iûⁿ, tuì pîⁿ-iûⁿ mn̄g, "Lí ê hue tī tó-uī?" , i huê-tap: "Guá bô hue-tsíng."
Tsú-lâng kā tsiáu-á kóng tsit ê sū, tsiáu-á tsiū tuà lâi kok-tsióng ê hue-tsíng, iā tī pîⁿ-iûⁿ ta̍k só͘-tsāi. Tī jua̍h-thiⁿ, pîⁿ-iûⁿ huat-tshut ta̍k-tsióng ê hue, ū muî-kuì, n̂g-sik uáⁿ-hue, ji̍t-thâu hue (thài-iông hua, hue uē ǹg ji̍t-thâu tńg-se̍h), iā ū âng ê pik-ha̍p-hue. Kok-sik kok-hîng ê hue phiàn-tē, suí bô pí. Tsú lâng khuàⁿ liáu tsin huaⁿ-hí, tsóng-sī bô khuàⁿ tio̍h i só͘ sim-ài ê hue, koh mn̄g pîⁿ-iûⁿ, "Thài uē bô khuàⁿ tio̍h thih-suàⁿ-liân, gō͘-kap-hue, tsí-hue, kim-káu-á-mn̂g, kap khui-hue ê suè-tsâng tshiū ah?"
Tsiáu-á koh tuà lâi tsuē-tsuē ê hue-tsíng, Tsóng-sī tsú-lâng lâi ê sî, iû-guân khuàⁿ bô tio̍h i só͘ sim-ài ê hue. Mn̄g kóng, "Guá só͘ ài ê siōng phang, siōng suí ê hue tī tó-uī?" Pîⁿ-iûⁿ iu-siong huê-tap, "Tsú-lâng ah, guá lâu-buē-tiâu hiah ê hue. Hong tsi̍t-ē tshe, ji̍t-thâu pha̍k tī guá ê sim-kuaⁿ, hue ko͘-ta khì, tsiū hō͘ hong tshe khì lah."
Tsiū án-ni, tsú-lâng kā sih-nà kóng-uē, sih-nà sok-tō͘ tsin-kín thò͘-tshut kiàm-kong, tsiong pîⁿ-iûⁿ phuà-tsuè nn̄g-pîng, pîⁿ-iûⁿ thòng-khó͘ kàu ai-ai-tshan, ū tshim-tshim buē kìⁿ-tio̍h ji̍t ê tuā khang-tshuì. Kuí-ji̍t āu, hô-tshuan kuàn tsuí tī khang-tshuì, tsiū-sī suaⁿ-kok lāi, iā tuà puî-puî ê o͘-thô͘ ji̍p-lâi.
Tsiáu-á koh tsi̍t-pái iā-tsíng, lo̍h tī suaⁿ-kok lāi, bô kú suaⁿ-kok lāi ū kok tsióng ê thai, tîn, tī suaⁿ-piah ê giâm-tsio̍h phāng, ū thih-suàⁿ-liân, gō͘-kap-hue, tíng-tíng. Tuā tsâng tshiū tuì kok-té huat-tshut, tshun tshut i ê e ǹg ji̍t-thâu, tshiū kha ū hiong-pik tshiū tsai, kok tsióng ê hue-tsháu. Kui ê suaⁿ-kok piàn tsuè Tsú-lâng sim-ài ê hioh-khùn só͘-tsāi, hióng-siū an-lîng hí-lo̍k ê uī.
Jiân-āu tsit ê “Thian-tông su-ki” tuì I kóng, “Sìng Sîn ê ké-tsí tsiū-sī jîn-ài, huaⁿ-hí, hô-pîng, thun-lún, tsû-pi, siān-liông, tiong-sìn, un-jiû, tsún-tsat.” (Ka-lia̍p-thài 5:22-23) Ū-ê tsí ū tī suaⁿ-kok lāi tsiah ū. Gún mn̄g kóng, “Sím-mi̍h sī suaⁿ-kok lāi ê hue?” Bo̍k-su huê-tap kóng, “Jím-nāi, jîn-ài, kap un-jiû. Put-kò, pîⁿ-iûⁿ tiong iā ū jîn-ài, hí-lo̍k kap hô-pîng ê hue khui-teh, tān-sī bô suaⁿ-kok tiong ê hue hiah suí hiah phang.”
Gún tiām-tiām bô tín-tāng ū-hiah-kú, jiân-āu tshuì-tûn tín-tāng, tsin khat-bōng teh kóng, “Guá ê suaⁿ-kok ni̍h bô hue, tsí-ū tsho͘-tsho͘ lāi-lāi ê tsio̍h-thâu.” Bo̍k-su tsû-ài huê I kóng, “Ū tsi̍t kang, iā beh ū hue, tshin-ài ê Gún, Siōng-tè uē tshē-tio̍h in, Guán iā it-tīng uē khuàⁿ-tio̍h in.”
Tshin-ài ê, tng lí lâi kàu lí jîn-sing ê suaⁿ-kok ê sî, ài kì-tit tsit ê kò͘-sū!

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw