《台語荒漠甘泉（全羅版）》

 | | | 轉寄

"I-tī tuā pi-siong ê sū-hōng"

作者 陳清俊 翻譯 2008.05.04

listen

Gō͘ ge̍h tshue-sì (Gō͘ ge̍h sì ji̍t)

"I hō͘ lâng thàng-thiàⁿ, tsiū kā i pau-ba̍t; I siong lâng, iā I ê tshiú i-hó i." (Iok-pik-kì 5:18)

Tng guá kiâⁿ tī suaⁿ-lûn ê sî, kám-kak tē tuā iô, ū tuā tē-tāng. Tsit ê phò-huāi liáu-āu, hui-siông ê pîng-tsīng. Si̍t-tsè-siōng, tuì suaⁿ-tíng khuàⁿ suaⁿ-kha tsit ê tsīng-tsīng ê tsuí-tî, huán-siā tshut tsuí-liân-hue ê bí-kíng. Lô͘-uí tī tî piⁿ hō͘ hong bî-bî-á tshe teh iô, hiong-tshuan iā koh khí khí-lâi, bô koh kì-liām tsá-sî hiah ê hûn-bōng. Tē-tāng tuā phò-huāi í-āu, lé-pài-tn̂g ê tsiam-thah teh suan-kò tsiáng-kuán tsuân-tē ê Siōng-tè iáu teh pó-hō͘, iáu teh thiaⁿ lâng ê kî-tó, kian-kò͘ tsuân-tē, tsiàu-kò͘ tsuân jîn-luī. --- John Ruskin

Tē-tāng, tē tuā tín-tāng,
Ò͘ tshut tshim tshim ê liah-phāng,
Pîⁿ-iûⁿ iô ná phû-tāng,
Suaⁿ, kok iā bô koh saⁿ siâng,

Hit kûn suaⁿ ê suaⁿ phāng,
Tsiong pì-bi̍t tī hing-khám tshàng,
“Siōng-tè íng-uán ê pîng-an-pâng,”
Sī an-hioh-tsiá ê bîn-bāng.

I tsng tsìng-suaⁿ bí-iông,
Tsuè un-tián ê ka-hiong,
Thàu-tsá lâi hiòng,
Ji̍t-thâu só͘ tsiò tī in ê kíng-siōng,

Sìn-sit suî hong tuà,
Tshe kàu tuā lō͘-thâu khuan-khuah,
Lo̍h kàu ta̍k kok, tsiūⁿ-kàu ta̍k suaⁿ,
Hong-hō͘ só͘ tuà lâi ê ài-tsîng kua.

Suaⁿ sī hô-liû ê khí-guân,
Sī hûn-tshái ê khai-tuan,
Tsióng-tsióng tsíng-luī ê ka-uân,
Tsū-tsú, tsū-iû, tsū-jiân, kap an-tsuân.

Ià-siān ê to͘-tshī lâng,
Lâi tsiūⁿ sìng-só͘ kî-tó tháu-pàng,
Siōng-tè beh sù khuì-la̍t khí-tāng,
I kui kang king-kè siūⁿ ài pang-bâng.

Khuàⁿ! Guá lia̍h tio̍h suaⁿ ê pì-kuat,
Suí bô pí tsin si̍t ê pān-huat,
Khò sìn-sim, tng jîn-sing iu-būn buē thuat,
Á-sī sing-ua̍h khùn-khó͘ tuān-tsua̍t.

Siōng-tè lê tī tsìng-suaⁿ,
Suaⁿ tsiū tshut tsuí-tsuâⁿ,
Un-tián, tshing-sin sù lí kap guá,
Pîng-an lîng-tsīng buē piàn-uāⁿ. --- William C. Garnett

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw