《台語荒漠甘泉（全羅版）》

 | | | 轉寄

"Hong-thai āu ê an-lîng"

作者 陳清俊 翻譯 2008.05.11

listen
Gō͘ ge̍h tsa̍p-it (Gō͘ ge̍h tsa̍p-it ji̍t)

"Guán king-kè tsuí-hé, Tsóng-sī Lí hō͘ guán kàu pù-ū ê só͘-tsāi." (Si-phian 66:12)

Ná tshin-tshiūⁿ mâu-tún ê khuán, lâng ài king-kè tshiong-thu̍t liáu-āu tsiah uē tit-tio̍h tsin-tsiàⁿ ê an-hioh. Tuì tshiong-thut só͘ tit-tio̍h ê an-hioh, m̄-sī tshin-tshiūⁿ hong-thai tsîng só͘ kiaⁿ ê an-tsīng, sī tshin-tshiūⁿ hong-thai āu só͘ tit-tio̍h khong-khì tshing-sin ê an-lîng.
M̄-bat tú-tio̍h iu-siong ê lâng khuàⁿ sī siū tsiok-hok ê, tsóng-sī khiok m̄-sī kian-kiông, sim-kíng an-jiân ê lâng. In ê phín-keh buē bat siū tio̍h khó-giām, ū sī liân tsi̍t tiám-tiám ê tshò-tsiat, sit-pāi iā m̄-tsai án-tsuáⁿ tuì-hù. Siōng khó-khò ê tsuí-siú, nā bô king-li̍k kè po̍k-hong po̍k-hō͘ ê king-li̍k, sī buē thang tit-tio̍h. Tng hong-pîng lōng-tsīng ê kiâⁿ-tsûn, ta̍k tsióng ê tsuí-siú lóng bô būn-tê. Nā-sī tú-tio̍h po̍k-hong, tuā hong-lōng ê sî, lí kiám m̄-sī ài ū king-giām ê tsuí-siú mah? I tsai án-tsuáⁿ tô-thuat po̍k-hong, tsai tsûn-sin kap soh ê kiông-tō͘, tsai án-tsuáⁿ īng tuā, tsiong tsûn an-tsuân tìng tī hái tiong.
Ah, muí tsi̍t pái thòng-khó͘ lâi-lîm ê sî, lán lóng bô li̍k-liōng. Lán ê hi-bōng ê ki, ná hông siū at-tsi̍h, lán ê sim ná tshiūⁿ phû-tô-tîn siū hong-hō͘ sàu lo̍h pîⁿ, ka-kī bô la̍t thang khiā khí-lâi. Tsit sî lán ài giâ thâu gióng-bōng kóng, "sī Tsú!" (Iok-hān 21:7), sìn-sim khai-sí tsiong lán tó lo̍h-khì ê hi-bōng koh tháⁿ khí-lâi, khîⁿ tiâu-tiâu liâm tī Siōng-tè ê kha tsîng. Tsuè-āu ê kiat-kó sī sìn-khò, an-tsuân, kap pîng-an.

Tuì-thâu-hong phah tī guá ê sìⁿ-miā,
Guá tsit ê sió tsûn iô buē tiāⁿ,
It-tshè kè-uē lóng iáu buē tsiâⁿ,
Sim-tiong ǹg-bāng piàn bô iáⁿ.
"Jiân-āu I khiā," kóng "tiāⁿ-tiāⁿ"
Guá sim tit an-uì, bô koh kiaⁿ.

Kiaⁿ-hiâⁿ giâu-gî ná tuā hong,
Sim-sîn tîm-tāng, bô thài-iông,
Tshuā guá, sù guá ū gán-kong,
O͘-àm-mî, guá buē thang tòng.
"Jiân-āu I khí-lâi" kóng "an-siông"
I ê bīn tshiong-muá un-tián hîng-iông.

Khó-giām tsing-ka, iu-lū ke-thiⁿ,
Sim-sîn tîm-tāng lo̍h tshim khiⁿ,
Sún-sit it-tshè, buē thang pó-liû sím-mi̍h,
Buē thang kái-thuat guá kau-tîⁿ,
"Jiân-āu I peh khí," Kóng, "tsīng-khì"
Hong hái pîng-tsīng, Sī Tsú! I tsiáng-lí. --- L.S.P.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw