《台語荒漠甘泉（全羅版）》

 | | | 轉寄

"Ap-li̍k ê kong-hāu "

作者 陳清俊 翻譯 2008.05.18

listen

Gō͘ ge̍h tsa̍p-pueh (Gō͘ ge̍h tsa̍p-pueh ji̍t)

"Guán sī siū teh-tāng tsin thiám kàu tng buē khí, liân ua̍h iā bô ǹg-bāng; … beh hō͘ guán bô uá-khò ka-kī, to̍k-to̍k uá-khò hō͘ sí-lâng koh-ua̍h ê Siōng-tè." (Ṳ Ko-lîm-to 1:8-9)

Buē niû ê ap-li̍k kàu ki̍k,
Kiông-tuā ap-li̍k tshiau-kè guá lîng-li̍k,
Tè tī sin-thé, tī lîng-hûn, tī sim-thâu,
Kàu o͘-àm-hîn, khuì buē tháu,
Tuì tuì-ti̍k lâi, tuì hó pîng-iú huat,
Ap-li̍k ka ap-li̍k, ti̍t-kàu beh sí-thuat.

Ap kàu tsai tsí-ū ǹg Siōng-tè kiû,
Ap kàu huaⁿ-hí I ê thuî I ê kuáiⁿ lâi kiâⁿ,
Ap kàu tsí siūⁿ beh tháu-khui tit tsū-iû,
Ap kàu siong-sìn bô khó-lîng ê sū uē tsiâⁿ,
Ap kàu tsí ū uī Tsú lâi tsûn-liû,
Ap kàu ua̍h tshut Ki-tok ê sìⁿ-miā.

Jîn-sing khùn-lân ê sî ê ap-li̍k hō͘ lán uē pó-sioh sìⁿ-miā. Muí pái tuì khùn-lân tshì-giām hue-hok kè-lâi, lán lóng tshin-tshiūⁿ koh tsi̍t pái ê khai-sí, koh-khah uē pó-sioh sìⁿ-miā. Hō͘ lán koh-khah uī Siōng-tè uī jîn-luī lâi phah-piàⁿ. Lán só͘ siū ê khùn-lân uē pang-tsān lán liáu-kái pa̍t-lâng ê khùn-lân, hō͘ lán lú uē pang-tsān, tông-tsîng in.
Ū lâng bô tú-tio̍h siū-khó͘, tuì khùn-khó͘ ê liáu-kái bô kàu, tsiū īng lí-lūn, á-sī ìng-ún lâi phue-phîng hiah-ê in-uī siū-khó͘ lâi tò-thè ê lâng. Nā-sī tsi̍t ê lâng, bô-lūn tsa-po͘, á-sī tsa-bó͘, king-kè tuā khó͘-lān liáu, lóng buē án-ni tsuè. In huán-tńg piàn tsin un-jiû khiam-pi, liáu-kái khó͘-lān ê ì-gī. Pó-lô kóng, “Án-ni sí ê la̍t teh kiâⁿ tī guán” (Ṳ Ko-lîm-to 4:12) tsiū-sī tsit ê ì-sù.
Khó-giām kap kan-lân tshui lán hiòng tsîng kiâⁿ. Khó͘-lān tshin-tshiūⁿ tsing-khì-ki ê lô͘-hé beh thui-tōng khí-lûn, tài-tōng ki-khì tín-tāng, hō͘ tsûn uē bīn-tuì hong-íng sái-kè tuā hái-iông. --- A. B. Simpson

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw