《台語荒漠甘泉（全羅版）》

 | | | 轉寄

"Kàng hō͘, sù hok"

作者 陳清俊 翻譯 2008.06.15

listen

La̍k ge̍h tsa̍p-gō͘ (La̍k ge̍h tsa̍p-gō͘ ji̍t)

"Siōng-tè hō͘ guá tī guá siū-khó͘ ê tuē-hng hing-ōng." (Tshòng-sè-kì 41:52)

Tsi̍t uī si-jîn khiā tī I ê thang-á tsîng teh khuàⁿ guā-bīn teh lo̍h sai-pak-hō͘, sī tsin tuā hō͘, lo̍h kàu tsin lī-hāi. Tsóng-sī si-jîn só͘ khuàⁿ ê, m̄-sī kan-ta tsi̍t tsūn hō͘ nā-tiāⁿ, i khuàⁿ tio̍h siū hō͘ lūn-ti̍k ê thó͘-tē huat-tshut kok-tsióng ê hue-luí, tsuân-tē tshiong-muá suí kap phang-bī. I gîm kóng,

Lo̍h ê m̄-sī hō͘, sī tsuí-sian-hue,
Muí-tih hō͘ tih tī suaⁿ-phiâⁿ, khuàⁿ-tio̍h tsi̍t tuā phiàn iá-hue,
O͘-hûn tà lâi, jia-khàm tsuân-tshī thong-kue,
Lo̍h ê m̄-sī hō͘, sī muî-kuì hue.

Tsuè Siōng-tè ê kiáⁿ-jî, khó-lîng tú-teh siū tio̍h tshì-liān, tuì Siōng-tè kóng, “Siōng-tè ah, kin-mî lo̍h tsiah tuā ê hō͘, tshiau-kè guá só͘ uē jím-siū ê. Tsiong guá ê kè-uē tshiong khì, guá sit-bāng, thiat-té sit-pāi. Guá phī-phī-tshuah ê sim siū ki̍k-tuā ê thòng-khó͘, ai-siong. Khó͘-thàng ê hō͘, tāng-tāng phah tī guá ê lîng.”
Pîng-iú, lí uân-tsuân gō͘-kái lah! Siōng-tè bô īng hō͘ lâi phah lí, sī kàng hō͘ sù hok-khì. Siong-sìn Siōng-tè ê uē, lí beh tsai, tuā hō͘ tiong, sī uē tshut-hiān sio̍k-lîng ê hue-luí. Tsiah ê hue pí lí tī bô hong bô hō͘ ê sìⁿ-miā só͘ khui ê hue khah phang khah suí.
Tng lí khuàⁿ-kìⁿ hō͘, lí kiám ū khuàⁿ tio̍h hue mah? Tsiah ê khó-giām teh hō͘ lí siū-khó͘, lí kiám tsai, tī lí ê jîn-sing tiong ū bí-lē sìn-sim ê hue uē tshut-hiān. Lí siūⁿ beh siám-pī thòng-khó͘, Siōng-tè só͘ khuàⁿ-tio̍h ê sī tuì lí ê lîng beh ū tông-tsîng, un-jiû ê sim huat-sing. Ki̍k-tuā ê siong-pi khó͘-lān hō͘ lí ê sim kiu-thè, tān-sī Siōng-tè beh hō͘ lí ê sìⁿ-miā koh-khah hong-sīng.
Pîng-iú, m̄-sī! Hiòng lí lo̍h ê hō͘ m̄-sī thòng-khó͘, sī un-jiû, thiàⁿ-thàng, tông-tsîng, un-tsû, jím-nāi, tíng-tíng Sìng-lîng só͘ siⁿ ê tsióng-tsióng hue-luí kap ké-tsí. Lí sìⁿ-miā ê lîng só͘ tit tio̍h ê hong-hù, tī sè-kan it-tshè an-i̍k tiong sī buē thang sán-sing ê. --- J.M.M.

Po̍k-hong-hō͘ ê kua-si

Khiā-khîm tī khong-khì tiong pîng-tsīng,
Ji̍t-kng lo̍h tī tshing-tshing phang-hue tíng,
Ko͘-to̍k lú-kheh Iu-lū tîng-tîng,
Thàu-tsá kàu àm teh tsiàn-tsing,
Tuì bô-kua ê khîm-hiân siūⁿ beh huat-tshut gua̍t-sing,
Tuâⁿ koh tuâⁿ iā bô huán-ìng,
Ti̍t kàu kiông-hong po̍k-hō͘ luî-tân bô thîng,
Tsú ê tshiú huāⁿ tī po̍k-hong bīn-tsîng,
Huàn-tshíⁿ liáu bí-biāu im-ūn,
Kiông-hong ná tsiàn-sū khí hing-hùn,
Huat-tshut sìng-lī ióng-kám ê hō-kak,
Hong-hō͘ tshiùⁿ tshut Siōng-tè thiàⁿ ê im-ga̍k.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw