《台語荒漠甘泉（全羅版）》

 | | | 轉寄

"Iâ-so͘ só͘ thiàⁿ ê lâng"

作者 陳清俊 翻譯 2008.08.10

listen


Pueh ge̍h tshue-tsa̍p (Pueh ge̍h tsa̍p ji̍t)

"Kì-jiân thiaⁿ-kìⁿ I phuà-pīⁿ, tsiū tī só͘ tuà ê só͘-tsāi iû-guân tuà nn̄g ji̍t." (Iok-hān 11:6)

Tsú Iâ-so͘ hō͘ Lia̍p-sat-lō͘ tuì sí koh-ua̍h ê sîn-jiah kì-sū, sī īng “Má-tāi, kap I ê tsí-bē, kap Lia̍p-sat-lō͘, lóng sī Iâ-so͘ só͘ thiàⁿ ê lâng.” (Iok-hān 11:5) tsi̍t kù uē tsuè khai-sí. Siōng-tè ná tshin-tshiūⁿ ài īng tsit ê king-bûn kà-sī lán, I tuì-hù lán ê hong-huat bô-lūn juā am-khàm, juā sîn-pì, i ê tiong-sim-tiám, ki-pún-siōng sī ài lán káⁿ siong-sìn koh khíng-tīng I bû-hān, lán put-phuè, íng-uán put-piàn ê thiàⁿ-thàng. Tsóng-sī tī thiàⁿ ê lāi-bīn ū thòng-khó͘ huat-sing.

Má-tāi, Má-lī-a bô huâi-gî, Iâ-so͘ uē tsīn-liōng pâi-tû it-tshè ê tsó͘-tòng, bô hō͘ in ê hiaⁿ-tī sí-khì. Tsóng-sī I thiaⁿ-kìⁿ Lia̍p-sat-lō͘ phuà-pīⁿ liáu-āu, iû-guân tī só͘ khiā-khí ê só͘-tsāi tuà nn̄g ji̍t.

“Tsóng-sī” “kì-jiân” hō͘ lán thang khì siūⁿ, Iâ-so͘ bô li̍p-khik kàu Má-tāi, Má-lī-a ê tshù, m̄-sī in-uī bô thiàⁿ in, si̍t-tsāi sûn-suì sī uī tio̍h thiàⁿ. Nā m̄-sī uī-tio̍h bû-hān ê thiàⁿ, I pún uē kín-kín khì kái-tû I só͘ thiàⁿ ê lâng ê siong-pi, tshit khì in ê ba̍k-sái, bô koh siong-pi khó͘-thàng. Tsí ū Siōng-tè thiàⁿ ê li̍k-liōng hō͘ Kiù-tsú ap-tsè I tsû-ài ê sim-tn̂g, thìng-hāu khó͘-thàng ê thiⁿ-sài uân-sîng i ê kang-tsok.

Siáⁿ lâng uē kó͘-kè thua-buâ kap khó͘-thàng tuì lán ū lī-ik? Nā m̄-sī ū in, lán thái uē tit-tio̍h ki-tok-tô͘ sing-ua̍h ê tsin-tsuē hó ê tik-hīng. Nā m̄-sī ū khó-giām sìn-sim ê buâ-liān, lán ná uē ū sìn-sim? Nā sī bô tn̂g-tn̂g siū-khó͘ ê thé-giām, bô khó͘-lān ê puê-ióng, lán thái uē ū jím-nāi ah?

Tshin-ài ê! Thâu-tsîng ê lō͘ bô thang kiaⁿ,
Lán só͘ bat ê Tsú tī sin-piⁿ saⁿ kap kiâⁿ,
Tshing-tshing tshó-tshó tī lán sim-iáⁿ,
Lán sī I só͘ thiàⁿ ê kiáⁿ.

I thiàⁿ lán tng o͘-im thiⁿ,
Siong-sim ji̍t hō͘ lán oh tam khí,
Iáu sī beh sìn-khò I,
In-uī lán sī I só͘ thiàⁿ kiáⁿ-jî,

Sî-kan, kái-piàn it-tshè sū,
Khiok buē kái-piàn I ê un-huī,
Ki-tok ê sim tshiong-muá jîn-tsû,
In-uī lán sī I só͘ thiàⁿ kiáⁿ-luī.



附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com