《台語荒漠甘泉（全羅版）》

 | | | 轉寄

"Àm-tiong sing-tióng"

作者 陳清俊 翻譯 2008.08.24

listen



Pueh ge̍h jī-sì (Pueh ge̍h jī-tsa̍p-sì ji̍t)


"Guá ū tsiah ê mi̍h, kàu-gia̍h ū tshun, guá í-king tshiong-tsiok." (Hui-li̍p-pí 4:18)

Guá ū tsi̍t-pún uân-gē ê tsu, kî-tiong tsi̍t tsiuⁿ ê miâ tsin tshù-bī, kiò-tsuè “Tī im-àm-tshù sing-tióng ê hue.” Tsu nih kóng-kàu hue-hn̂g lāi ū ji̍t-kng tsiò buē-tio̍h ê só͘-tsāi, tān-sī ū ê hue m̄-nā uē tī àm-àm ê kak-lo̍h tuā-tsâng, iā sī su-iàu im-àm ê só͘-tsāi, hō͘ i sing-tióng khah hó-sè, koh uē khui hue.

Lîng-sìng ê sè-kài iā ū luī-sū ê tsîng-hîng. Ki-tok-tô͘ tī bu̍t-tsit khuân-kíng ki̍k khùn-lân ê sî, huán-tńg bō͘-sīng khui hue. Tī im-àm tiong tióng-tuā. Tsit ê tsîng-hîng nā-sī phàⁿ-kó͘ bô tsin-si̍t, lán tsuáⁿ-iūⁿ uē lâi kái-sik sù-tô͘ Pó-lô ê it-sing king-li̍k ah?

I siá tíng-bīn king-bûn ê sî, sī siū kuaiⁿ tī Lô-má, i tsú-iàu ê sù-bīng ná tshin-tshiūⁿ siū tshiat-tn̄g. Tsóng-sī tsiū tī tse o͘-àm ê khuân-kíng, i ê hue tuā-tuā khui tshut-lâi, tsi̍t-phiàn tshàn-lān. Pó-lô í-tsîng khó-lîng sī khuàⁿ-tsuè tuā-lō͘ piⁿ hiáⁿ-ba̍k ê hue, ū ji̍t-kng tsin bō͘-sīng, hiān-tsāi i siū khíng-tīng, i só͘ piáu-hiān bô-pí ê kian-kiông kap bí-lē. Siōng-tè ê ìng-ún phah-khui i só͘ tsiông-lâi buē-bat thé-giām kè ê pó-tsông.

Tsiah-ê pó-tsông tiong ū Ki-tok ê un-tián, thiàⁿ-thàng, hí-lo̍k, pîng-an tíng-tíng ê kî-biāu phín-tsit, in tī o͘-àm tiong tsiah uē hián-lō͘ tshut ún-tsông tī luē-tsāi ê kong-hui. Àm, sip, lah-sap ê kaⁿ-lô piàn-tsuè Siōng-tè tsin-tō ê tiûⁿ-só͘. Pó-lô sîng-siū tio̍h i í-tsîng só͘ buē-bat king-li̍k tio̍h ê hiah-nih hong-hù hiah-nih khuah-tuā ê lîng-sìng sán-gia̍p!

Lán kiám m̄-tsai, Sè-kan lâng, bô-lūn lâm á-sī lú tú-tio̍h o͘-àm, ko͘-tuaⁿ ê sî, tsiū ná tshin-tshiūⁿ teh tshīng kuì-tiōng ê ông-phàu, ū tit-tio̍h li̍k-liōng, kuân-ui, kap hi-bāng mah? Lâng siū kuaiⁿ-kaⁿ, tsiong i ê tsâi-sán hong khí-lâi, tsóng-sī buē-thang hong-tiâu i tsing-sîn-siōng ê tsin-tsiàⁿ tsâi-sán. In ê bu̍t-tsit khuân-kíng sī khuat-hua̍t ná sua-bô͘ khòng-iá, tsóng-sī “Khòng-iá kap ta-sò ê tuē tik-khak huaⁿ-hí; sua-bô͘ ia̍h beh khuài-lo̍k, koh tshin-tshiūⁿ muî-kuì khui-hue.” (Í-sài-a 35:1). --- John Henry Jowett

Liân siōng suí ê hue, tī ji̍t-thâu ê kng ē, i ê ē-bīn iā ū ka-kī ê iáⁿ. Kng ná kiông, i ê iáⁿ, ná bîng-hián.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com