《宋澤萊新著《天路拾穗》TOJ/台灣字版》

 | | | 轉寄

Tsútê 8："sélé" ê tshimtsân ìgī

作者 Sòng Te̍klâi 2026.02.22

Tē it pō͘ tshinggī titkiù
Tsútê 8："sélé" ê tshimtsân ìgī

1, Siūⁿ bē thong "kuiji̍p Kitok Iésu ê sí" tsit kù ōe Tongtsho͘ siūsé ê sî, góa to̍h thiaⁿkòe "kuiji̍p Kitok ê sí" tsit kù ōe, m̄koh kútn̂g ílâi, góa tùi tsit kù ōe pēng bô tsin líkái. Kahná tsaiiáⁿ ittàn kuiji̍p Kitok ê sí, lán to̍h bô tsōe ā; m̄koh bē liáukái sī ántsóaⁿ kuiji̍p Kitok ê sí lán to̍h bô tsōe?

"kuiji̍p Kitok ê sí “ Tsit kù ōe, èngtong sī lâitsū “ Lômá su” 6 tsiuⁿ 2~4 tsat ê tsit tōaⁿ ōe, "lán tī tsōe téngbīn síkhì ê lâng, kám thang iáu tī tsōe ni̍h ua̍h leh? Kám m̄tsai lán tse siūsé kuiji̍p Kitok Iésu ê lâng sī siūsé kuiji̍p I ê sí? Só͘í, lán tsià tio̍h sélé kuiji̍p sí, kah I tsòhóe bâitsòng, goânlâi sī teh kiò lán itkí ittōng ū sinsing ê iūⁿsik, tshintshiūⁿ Kitok tsià tio̍h Pē ê êngkng tùi sí ni̍h kohua̍h."

Tsit tōaⁿ ōe sī Páulô ēng lâi tâmlūn sélé ê kongiōng, jîtshiáⁿ kàsī hit kóa siūsé íāu iáu ua̍h tī tsōe ni̍h ê sìntô͘. "Lán tī tsōe téngbīn síkhì ê lâng" tsit kù ōe sī teh tsí “ Tsōe pī biántû ê lán" ê ìsù. Iā to̍h sī kóng ittàn lán siūsé, tsōe to̍h hông biántû, só͘í Páulô tsiah kóng kám thang kèsio̍k teh kòe hoāntsōe ê singua̍h. Tī tsia “ Tsià tio̍h sélé kuiji̍p Kitok ê sí liáuāu, lán ê tsōe to̍h hông biántû" siū tio̍h Páulô ê khéngtēng.

Góa tsóng sī teh siūⁿ, sī ántsóaⁿ Páulô beh ánne kóng? Kitok ê sí kiùkèng ū siáⁿmi̍h le̍kliōng, ētàng kiò lán siámpī éng sí ê tsōe? Kitok ê sí kiùkèng ēng siáⁿmi̍h hongsik tsínkiù lán? …… góa siūⁿ bē tshut tapàn.

Bô siūⁿ tio̍h kúi kang tsêng, góa tsò tsi̍tê ībāng, tit tio̍h tapàn. Sènglêng tsià tio̍h tsitê ībāng, hôetap góa ê būntê. Góa kā ībāng tōapō͘hūn biâusu̍t tshintshiūⁿ ēbīn ánne：

2, Tsi̍tê ū tshùbī ê ībāng
Góa tī tsi̍t tiâu tshia lâilâi-khìkhì ê tōa kelō͘ khiâ góa ê kitshia, hutjiânkan, góa khòaⁿkìⁿ goán bó͘ sái tsi̍t tâi tōa hêng tshia tùi āubīn tshiauua̍t góa, i sáitshia ê soktō͘ tsin kín. Góa hôethâu, to̍h khòaⁿkìⁿ goán bó͘ ê tshia āubīn tòe tsi̍t tīn kéngtshat tshia, kéngsī ting siámsiám huatkng. Bênghián goán bó͘ tsìntsêng giâmtiōng lòng âng ting á sī ûihoán kîtha kauthong kuitsik, tsiah ín lâi tsi̍t tīn kauthong kéngtshat ê tuipó͘.

M̄koh, góa khòaⁿ tio̍h tshia thang ni̍h góa ê khantshiú kahná tsin tìntsēng, i kakhoài soktō͘, hiòng tsêng phuntsáu. Lâi kàu tsi̍tê tshialióng koh khah tsē ê lō͘tōaⁿ, i siókhóa phianǹg tò pêng kínkip tsáu khì, tìsú i ê tshia kah tsi̍t tâi tùibīn o͘ kah huatkng ê tōa hêng tshia mô͘tshat siám kòe, tsōaⁿ khí tsi̍t tsūn ê hóetsheⁿ. O͘ kah huatkng ê tōa hêng tshia sái kòikhì liáu āu, góa to̍h khòaⁿ tio̍h goán bó͘ sáitshia khoàisok tsoán ji̍pkhì kelō͘ tòpêng ê tsi̍tê pa̍tlâng ê mn̂gkháu tiâⁿ. Tsit sî, góa tsiah khòaⁿ tshingtshó hit hō͘ lâng tng teh pān songsū.

Tsit ke lâng bênghián m̄sī sàntshiah jînke, inūi ū tsi̍tê siongtong kóngkhuah ê mn̂gkháu tiâⁿ. Tsiàⁿbīn ê tōathiaⁿ gîmtsîⁿ tsêng pâihòng lêngūi ê tsètôaⁿ, tsin sêng tsi̍tê tōa ê sing kî tâi, ū kóa khìphài. Tī tōathiaⁿ ê tsiàⁿpêng ū tsi̍tê ū kòa pò͘lî ê mn̂g, tùi tsitê mn̂g ji̍pkhì tāikhài to̍h ētànḡ tsìnji̍p tōathiaⁿ, hitê tōathiaⁿ ni̍h ittēng ū thêng tsng sithé ê kuaⁿtshâ.

Goán bó͘ huisiông tìntsēng, i bô tsông kàu tsètôaⁿ, khiok tsin bíntsia̍t sái ji̍pkhì hitê tsiàⁿpêng ū kòa pò͘lî ê mn̂g. Góa kìm bētiâu kiaⁿ kah huah khí lâi, kámkak i ná ēsái tsông ji̍pkhì pa̍tlâng khǹg kuaⁿtshâ ê lāi thiaⁿ. M̄koh, i ê tshia siuⁿ kín, tsi̍tē á to̍h sái ji̍pkhì mn̂g lāi, pò͘lî koh sôe lo̍h lâi, koh khah ántsóaⁿ to khòaⁿ bē tio̍h i ê tshia à, kahná siáⁿmi̍h tāitsì mā bô huatsing. Góa simlāi siūⁿ kóng, tsitmá tshám ah, tsaihō koh khah tōa à, songka ittēng bô beh pàng i suah!

Góa sûisî kā kitshia thêng lo̍h lâi, kóaⁿkín tsàu khì kàu songka ê āu tiâⁿ, beh tshōe songka tōkhiam. Tsi̍t lâi kàu āu tiâⁿ, to̍h khòaⁿ tio̍h goán bó͘ tng teh kah songka ê lâng kóngōe. Hitê songka ê lâng huisiông hôkhì, kah kakī ê tshinlâng bô nn̄g iūⁿ. In kā goán hutshe nn̄g lâng kóng, “ Tsiāmsî tòa tsia m̄thang tshut khì, inūi gōabīn ū kéngtshat!"

Songka ánne kóng, góa kóaⁿkín tsàu khì kàu khòaⁿ ētio̍h mn̂gkháu tiâⁿ ê só͘tsāi khì thaukhòaⁿ, to̍h huatkiàn kelō͘ hit pêng thêng tsi̍t pâi ê kéngtshat tshia, kéngsī ting siámsih kah koh khah līhāi, tsin tsē kéngtshat tī hia lâihôe hêngtōng. M̄koh, inūi bô huattō͘ khaktēng góa ê khantshiú sī m̄sī lâi kàu songka（inūi mn̂gkháu tiâⁿ khòaⁿ bē tio̍h i ê tshia）, jîtshiáⁿ gāi tī "songka ûi tōa" ê hongsio̍k si̍pkoàn, in mā m̄ káⁿ tōatsú-tōaì tsông ji̍plâi songka ni̍h. Kéngtshat kantaⁿ ētàng tī têngīⁿ gōa ê kelō͘ kiâⁿ lâi kiâⁿ khì, thauthau'á thàmkhòaⁿ.

Goán tī āu tiâⁿ itti̍t tánthāi, ti̍tkàu hônghun, iābō͘ bānbān'á sôe lo̍h lâi. To̍h tī àmmê ê tingkng tú beh kng khí lâi ê sî, hutjiân ū lâng huah, "thêng tiān loh!" tsiū ánne o͘àm tà tiâu thiⁿtē, khòaⁿ bē tio̍h kúi tshioh ígōa ê mi̍hkiāⁿ.

Songka tsit sî tsáu lâi tùi goán hutshe kóng, "Hósè ah, tsitmá in koh khah ántsóaⁿ to tshōe bē tio̍h lín à, lín thang līkhui."

Tsiū ánne, goán tiôngsin khísin, tùi āu tiâⁿ liu tsáu khì!

3. Bāng ê káisik
Téngbīn to̍h sī ībāng ê tāikhài tsênghêng, khòaⁿ tsi̍tē tsin, kahná m̄sī ántsóaⁿ kiatlī. M̄koh, góa tsaiiáⁿ tse sī Sènglêng hō͘ góa ê kàuhòe, náisī beh tùi góa suatbêng "kuiji̍p Kitok ê sí" tsit kù ōe ê tsintsiàⁿ ìgī!

Góa kā góa téngbīn só͘ kóng só͘ biâusu̍t ê ībāng ê tiōngtiám bûnjī káisik tī ēbīn：

A. “Goán bó͘ tsin tsìntsêng sī giâmtiōng lòng âng ting á sī ûihoán kîtha kauthong kuitsik, tsiah ín lâi tsi̍t tīn kauthong kéngtshat ê tuipó͘." sī piáubêng lán sèkan lâng hoān giâmtiōng ê tsōe, jîtshiáⁿ sī tsōetsèng khaksi̍t, bô thang thesî, tsiongkîbóe ínkhí SiōngTsú phài lâi tuipó͘ ê sùtsiá, siūⁿ beh tāipó͘ lán lâi kiùtsik.

B. “O͘ kah huatkng ê tōa hêng tshia" sī piáubêng liáu tse sī tsi̍tê ībāng, inūi ībāng tōapō͘hūn lóng ū siktshái, jîtshiáⁿ siktshái lóng tsin iāmlē, kású sī o͘sik ê, to̍h ē o͘ kah ná tshat, huattshut konghui.

C. “Góa tsiah khòaⁿ tshingtshó hit hō͘ tng teh pān songsū. Tsit ke lâng bênghián m̄sī sàntshiah jînke, inūi ū tsi̍tê siongtong kóngkhuah ê mn̂gkháu tiâⁿ. Tsiàⁿbīn ê tōathiaⁿ gîmtsîⁿ tsêng tshāi lêngūi ê tsètôaⁿ, tsin sêng tsi̍tê tōa ê singkî tâi, ū kóa khìphài. Tī tōathiaⁿ ê tsiàⁿpêng ū tsi̍tê ū kòa pò͘lî ê mn̂g, tùi tsitê mn̂g ji̍p khì tāikhài to̍h ētànḡ tsìnji̍p tōathiaⁿ, hitê tōathiaⁿ ni̍h ittēng khǹg sithé ê kuaⁿtshâ." Tse sī piáubêng siūsé tiánlé m̄sī tàng sng ê, sī kongkhai ū khìphài ê.

D, “Goán bó͘ huisiông tìntsēng, i pēng bô tsông kàu lêngūi, khiok tsin khoàisok sái ji̍pkhì hitê ū kòa pò͘lî ê mn̂g. Góa kìm bētiâu kiaⁿ kah huah khí lâi, kámkak i ná ēsái tsông ji̍pkhì pa̍tlâng khǹg kuaⁿtshâ ê lāi thiaⁿ." Tse sī piáubêng lán tī tsáutâu-bôlō͘ ê sî khoàisok kuiji̍p Iésu ê sí kah songlé lāibīn, iā to̍h sī tsí siūsé.

E, “ Tsi̍t lâi kàu āu tiâⁿ, to̍h khòaⁿ tio̍h goán bó͘ tng teh kah songka ê lâng kóngōe. Hitê songka ê lâng huisiông hôkhì, kah kakī ê tshinlâng bô nn̄g iūⁿ.” Tse sī piáubêng lán kuiji̍p Iésu ê sí liáuāu, tsin kín ū kohua̍h, tng teh kah kângkhoán sī kuiji̍p Kitok ê sí kohua̍h ê tsèng Kitoktô tshintshiat kóngōe.

F, "M̄koh, inūi bô huattō͘ khaktēng goán khantshiú lâi kàu songka（inūi mn̂gkháu tiâⁿ khòaⁿ bē tio̍h i ê tshia）, jîtshiáⁿ gāi tī 'songka ûi tōa' ê hongsio̍k si̍pkoàn, in mā m̄ káⁿ tōatsú-tōaì tsông ji̍plâi songka tshù ni̍h. Kéngtshat kantaⁿ ētàng tī têngīⁿ gōa ê kelō͘ téng kiâⁿ lâi kiâⁿ khì, thauthau'á thàmkhòaⁿ.” Tse sī piáubêng Iésu ê sí kah songlé sī útiū kan ê tsi̍t kiāⁿ giâmsiok ê tōa sū, hō͘ thiⁿsài mā m̄káⁿ sûipiān tshimhoān tio̍h Iésu ê songlé.

G. “Goán tī āu tiâⁿ itti̍t teh tánthāi, ti̍tkàu hônghun, iābō͘ bānbān sôe lo̍h lâi. To̍h tī àmmê ê tingkng tú beh kng khí lâi ê sî, hutjiân ū lâng huah, ' thêng tiān loh! ' Tsiū ánne o͘àm tà tiâu thiⁿtē, khòaⁿ bē tio̍h kúi tshioh ígōa ê mi̍hkiāⁿ.” Tse sī piáubêng tsiū ánne íāu, lán kah gōabīn ê sèkài toāntsua̍t kuanhē, lán sī sio̍k tī Iésu tsit pêng ê lâng, bô koh sī sio̍ksè ê lâng.

H, "songka tsit sî tsáu lâi tùi goán hutshe kóng, 'Hósè ah, tsitmá in koh khah ántsóaⁿ to tshōe bētio̍h lín loh, lín thang līkhui. '“ Tse sī piáubêng lán bih tī Kitok ê tô siâⁿ sèkài ni̍h, tio̍hsǹg lán tsìntsêng hoān giâmtiōng ê tsōe, hua̍t tsōe sùtsiá mā tshōe bētio̍h lán. Tī Kitok khaitshòng ê koktō͘ ni̍h, lán tit tio̍h tsūiû ā!

4, Tshògō͘ kuanliām ê kiùtsèng
Tsitê ībāng lîtshing tsìntsêng góa kúiê tshògō͘ ê kuanliām：

A. Tsìntsêng góa tsóng sī jīnûi sélé sī tsi̍t tsióng huaⁿhí khoàilo̍k ê tiánlé, m̄koh tsitmá khòaⁿ khí lâi, i koh khah sī tsi̍tê songlé. Tikkhak, nāsī ēng "kohua̍h" ê kuanliām lâi khòaⁿ, i sī ū híkhì; m̄koh nā ēng kuiji̍p Kitok ê sí lâi khòaⁿ, i kìjiân sī Iésu ê songlé, mā sī lán ê songlé.

B, Tsìntsêng góa tsóng sī jīnûi ittàn kuiji̍p Iésu ê sí, ittēng tio̍h tán tsin kú, lán tsiah ē kohua̍h, m̄koh tsitmá khòaⁿ khí lâi, kuiji̍p Iésu ê sí kah kohua̍h kahná sī tôngsî ê. Lán tī tsêng têng kuiji̍p sí, tī āu tiâⁿ to̍h ū kohua̍h.

C, Tsìntsêng góa tsóng sī jīnûi kuiji̍p Iésu ê sí, lán ê tsōe to̍h hó kahná sī tī tsōetsōng siōng pī "buah"t iāu, tsitmá khòaⁿ khí lâi khiok m̄sī. Lán kuiji̍p Iésu ê sí kah songlé, sī teh tsí Iésu ēng I ê sí kah songlé jiakhàm lán, lán tsìnji̍p Iésu só͘ tshòngli̍p ê tô siâⁿ sèkài ni̍h, hō͘ SiōngTsú ê hua̍t tsōe sùtsiá m̄ káⁿ lâi tshōe lán, á sī tshōe bētio̍h lán. Lán ê tsōe kîsi̍t iáu tsiángak tī hua̍t tsōe sùtsiá ê tshiú ni̍h, jîtshiáⁿ tsōetsèng khaksi̍t, ittàn lí līkhui Iésu ê jiakhàm（m̄ sìn Iésu）, hua̍t tsōe sùtsiá iáu sī ētàng tshōe tio̍h lí!

──2014, 09, 11 tī Lo̍kkáng