《宋澤萊新著《天路拾穗》TOJ/台灣字版》 |
 |
 |
|
 轉寄 |
Tsútê 10：Lí mā ētàng kà lâng kóng honggiân（lênggí）! _5
作者 Sòng Te̍klâi 2026.04.05
Tējī pō͘ Sènglêng koànak
Tsútê 10：Lí mā ētàng kà lâng kóng honggiân（lênggí）! _5
5） Kàutō thajîn kóng honggiân ê honghuat the̍h tio̍h
Góa koh kā kàutō thajîn kóng honggiân ê honghuat tsóng kat tī ēbīn,
A, lán ê honggiân lâitsū liāmsiōng "Halélú'iah" tsit sì jī. Tsitê honghuat pēng m̄sī"Tsin Iésu kàuhōe"ê to̍k tshòng, khiok sī tī Tsin Iésu kàuhōe sêngli̍p tsìntsêng, phó͘phiàn liûhêng tī Kitokkàu kài ê tsi̍tê honghuat, púnsin to̍h sī tsi̍tê tāitsiòng sèng ê honggiân ha̍ksi̍p huat. Inūi ū tāitsiòng ê kinggiāmsèng, tûliáu tsit sì jī ígōa, lán siōng hó m̄ thang ēng kîtha ê bûnjī.
B, Teh kà ha̍ksing honggiân tsìntsêng, lāusu ittēng tio̍h sīhoān kóng tsi̍t piàn phiautsún ê honggiân hō͘ i thiaⁿ, jîtshiáⁿ thêtshéⁿ i, honggiân náisī tsi̍t tsióng tōaliōng tsi̍h im ê gígiân.
C, Ittēng ài thêtshéⁿ ha̍ksing ittēng tio̍h"tōasiaⁿ tha̍k","soktō͘ kín", ánne tsiah ētàng tsoánōaⁿ sêngkong.
D, Kàutō ê lâng ittēng tio̍h tī ha̍ksing ê sinpiⁿ, kah i tsòhóe tōasiaⁿ, khoàisok kóng honggiân.
E, Tī kòethêng tiong, ittēng tio̍h tiāⁿtiāⁿ ūi ha̍ksing hōaⁿtshiú, jîtshiáⁿ kó͘lē i, "siaⁿim ke khah tōa leh", "soktō͘ ke khah kín leh".
F, Tng ha̍ksing ētàng kóng tshut honggiân ê sî, ingkai kó͘lē i kèsio̍k tōasiaⁿ kóng; tôngsî kèsio̍k pôephōaⁿ i kóng honggiân, ti̍tkàu kiatsok.
Tsóng kóng tsi̍t kù, lán tsò lāusu ê lâng ittēng tio̍h tshintsū tī piⁿ'á kó͘lē ha̍ksing, thêtshéⁿ ha̍ksing, kiktōng ha̍ksing, ánne, 5 huntsing, 10 huntsing to̍h ētàng kóng tshut honggiân. Tshianbān bētàng tsísī kik tiāmtiām kántan hōaⁿtshiú, á sī hòngjīm sìntô͘ tsi̍tê lâng tī tshù ni̍h tanto̍k ha̍ksi̍p, nā bô, ha̍ksing khólêng tio̍h 10 nî, 20 nî, 30 nî tsiah o̍h ēhiáu kóng honggiân.
Tsù 1, kìⁿ “Mákhó hokim” tsa̍pla̍k tsiuⁿ 16 tsat.
Tsù 2, kìⁿ "Sùtô͘ Hêngtoān" it tsiuⁿ 5－9 tsat.
